Makekeng 23

Ngic wiac socfungoc ayemmebesonga

1 # Mke 20:16; Sese 19:11-12; Dser 5:20 Ge enacfu faifai nga sebiu faifai mi ambesena. Nga ge godzungicac maria mema ye nanggema hepucyoac ikoha mi debesena. 2Ngichabutoa yeni faka mangana meandae ge yeni mi modacyunubesena. Amma yoacfu hepucyoac denade imohai ngichabutoa yeneac sing modacma yoac dindingac mi denggbaringgebesena. 3#Sese 19:15Amma ngic makpekpea monggac yoac mong fingeru gombungaya nga manganaya ifingoc mi hesonggebesena.

4 # Dser 22:1-4 Ngabagaac burumakangiwa me donggingo sing segema yerecgema kecmanu meficgenade isoc hesickema minginaaru meremmibesena. 5Nga ngic ngabaga kecde, yeac donggi finahango kipatanggeu feu hennadeu ge ihoc bahoc amma mi wabesena, ge ngic imoc meficgema donggia yarudeac meficgebesena.

6 # Sese 19:15; Dser 16:19 Ngic makpekpea mong botucnginau kecdengo yoac ua mema kecmanu ge ye ngic makpekpea andeac yeac yoara mi denggbaringgebesena. 7Amma ge garengga mema ikoc amma yoacfu faifaifaka, imohacnac meickema herau yombong kecbesena. Ngic kopocsiha kpac nga ngic dindingac yeri homecfu mi faiyurubesena. Imoc yofiac, ni godzucngic ye dindingac mi demibade.

8Tobanggugec ge dederaac dzo mong mi mebesena. Imoc yofiac, dederaac dzongo ngic kicngina irec ireckea yeni kichedzic ayemmeude nga dindingac kecandae, yeneac yoac denggbaringgeude.

9 # Mke 22:21; Sese 19:33-34; Dser 24:17-18; 27:19 Ge ngicngac kuric kecdae yeni mong mi merandziyunubesena. Ngeni ngenang Aigitabangecfu kuric kecgecac amma kuric kekecac hania naric negentegecdae.

Tacnegeng kifaac nasotoa

10 # Sese 25:1-7 Ge uagau semengga mehomec nga fora kpememe amma kecmana kifa siks wisickebeso. 11Wisickeu kifa kpete sewen imohai tacnegemma wana eng femanu makpekpea yeneng menec anggec maunga feu kateyang yeneng nedacbisia. Waing uagaac nga oliwa uagaac siric imocngoc ambesena.

12 # Mke 20:9-11; 31:15; 34:21; 35:2; Sese 23:3; Dser 5:13-14 Ge wenac uameme siks uaga mema kecbesena nga wenac kpete sewen imohai ine tacnegembesena. Imoc yofiac, donggi burumakafocga yeni tacnegenggecdeac nga wanacngacgaac medaha amma kuricngic amagau kecdape, yeri kuc monggoc meecdeac ifi ambesena.

13Ngeni sasawa gombunga garengemema yoac edengunuai imoc mekecma sasawa modacdacbisia. Nemuonga nga anutu hania hania yeneac kpac mi kpacma debisia nga yeneac kpacngina mong enacnginaunac mi erebeso.

Nasotoa harebec

14Ge kifa mocguac manau neac nasotoa tacna atac harebec ambeso.

15 # Mke 12:14-20; Sese 23:6-8; Bki 28:17-25 Ge icsogong aenga kpacac nasotoa imoc tacbesena. Ge imohai neng dederecge anggenai imocac siricfu icsogong aenga kpac nema kecmana wenac sewen wisickebeso. Anu afo awiwac nasoya faifaia imohai ifi ambesena, nocac ge afo imohainoc Aigitabangec wama manec. Nga mongngo neac kicfu habeso negende ye neac wiac mong mariau mema habeso.

16 # Sese 23:15-21, 39-43; Bki 28:26-31 Ge nenesemenggac desi desinasotoa tacnade imoc uagau nenesemengga heihomec angannec, uaga imocac fora warac warac memeac nasotoa. Anu ge kifa wisic wisickeau uagaac fora uaunac mekpedzuc angannec imohai kpememe nasotoa tacbesena. 17Ngic sasawa ngeni kifa mocguac manau Kebungina, imocac negensima Kebuac kicfu kemma nanggec atac harebec ambeso.

18Ge neac seseyang kpema houma sawa neac aratau fainade, imohai wiac aengagoc mi faibesena. Amma neac nasotoaac seseac kerec imocac tosea wana tacmanu ama mi wereckembeso.

19 # Mke 34:26; Dser 14:21; 26:2 Ge uaunac nenesemenggaac fora warac fingec fingera, imocac desi desi gombunga imoc Kebu Anutugaac womonnu meembesena. Ge noningmedaha nonggeaac namugoc mi ohobesena.

Anutuac angerongo waraigenude

20Negennec, ni angero mong sueba waraigemma sinnu garengguma bangec mengerema geac deai imohai faiguude. 21Waraigenu ge yeac kicfu garengemema kecma yoara negentofoho ambesena nga yeac yoac mi kpebesena. Neac kpacna yeac ubaongea manau fekecdeac singyoara kpegecdeu yoackpekpengina imoc mi wangemmeude. 22Nga ge kedzac kpema yeac ubaudumenga negemma kecnade nga ni yoac deduaesoc modacnadeu ni ngabafocga ngaba ayemmebade nga ubango wagudae yeni ubango wayunubade. 23Anu neac angerongo waraigenu Amoringic, hittingic, peridzingic, kenacangngic nga hiwingic amma yewusingic yeneac bangecfu kemma faingunubade imohai ngic imoc kpedzongyunuba kpac anggecde. 24Nga ge yeneac nemuonga nga anutufocngina hania hania fafoc mi heiyemmema afeheyunuma numuyemmebesena. Ge yeneac enactofoc tofoho ua mi mebesena. Nga angammemenginaac siricfu wiac mong mi ambesena, kpahac. Ge nemuonga nga anutufocngina hania hania kpetotieyunuma yeneac hocwotung nemuonganginagoc kpetiac dema eweheiyemmeandae, imoc hedzac kpedzamedacbesena. 25Ngeni Kebu Anutungina ni enacna tofohoma ua menenggec neng yaka nga dokungina kenehema botucnginaunac hafei dzoicngina meickebade. 26Meickeba bangecnginaunac ngac mongngo sabac mong nasoya nobohasac nenggac heremanau taru homemea naric mi meude nga ngac mongngo kufing mong mi kefude. Nennoc kekecnasoga hafoangoc gembade.

Efea efea kisangyunuba woragecde

27Amma neac kengectoana deba waraingemmemanu ngicngacareng sasawa meficyunugecdesoc uba mesufu ayemmebade nga ngabafocngina sasawa yeni woragecdeac faka ayemmebade. 28Nga bidetoatoa deba fingecma waraingemmema hiwingic nga kenacangngic amma hittingic geac kicfunac kporacyunudaru woragecde. 29Anu ni kifa mocgu imocac manau ine gearunac kisangyunuba mi woradacgecde. Ifi ambadeu bangecngo eng feu kateyang yeni fingecsahe homac anggec kucnginango ngeneac kuc ferahebacac. 30Imocac amma ni nasosoc efea efea kisangyunuma kecbare ge fingecsahe amma kecma bangec mema tina enude.

Ge yenigoc dzadzahac mi mebesena

31Anu bangecgaac kpete imoc kondung sacsacfunac hanahema kengkecma pelistingic yeneac kondunnu faibade. Nga bangeckisiunac hanahema kengkecma Eufrata dokuu wisickebeso. Ni bangec mingina yeni ngeneac mariu faiyunuba kisangyunugec ngenearunac woragecde. 32Nga ge yenigoc dzadzahac mi mebesena nga ge nemuonga nga anutufocngina hania hania yenigoc ifingoc dzadzahac mi mebesena. 33Anu yeni angemmegec ngeneng neac kicfu kopocsic meficgebauac yeni bangec imohai torokpema mi kecbisia. Amma angemmegec yeneac anutufocngina hania hania yeneac enactofoc tofohofaka ayemmebauac. Nga faka imocngo botac isoc amma mendangngunubacac ifi ambisia.”

Currently Selected:

Makekeng 23: Ded

Highlight

Copy