Yasa‘iyáh 17
17
1Damishq kí bábat bár i nubuwwat.
Dekho, Damishq ab to shahr na rahegá, balki khanḍar ká ḍher hogá. 2‘Aro‘ír kí bastiyáṉ wírán haiṉ aur galloṉ kí charágáheṉ hoṉgí: wuh waháṉ baiṭheṉge, aur koí un ke ḍaráne ko bhí waháṉ na hogá. 3Aur Ifráím meṉ koí qil‘a na rahegá; Damishq aur Arám ke baqiye se saltanat játí rahegí, Rabb u’l afwáj farmátá hai: jo hál baní Isráíl kí shaukat ká húá wuhí un ká hogá.
4Aur us waqt yúṉ hogá, ki Ya‘qúb kí hashmat ghaṭ jáegí, aur us ká charbídár badan dublá ho jáegá. 5Yih aisá hogá, jaisá koí khaṛe khet káṭkar g̣alla jama‘ kare, aur apne háth se báleṉ toṛe; balki aisá hogá jaisá koí Rafáím kí wádí meṉ ḳhoshachíní kare. 6Ḳhudáwand Isráíl ká Ḳhudá farmátá hai, ki Tab us ká baqiya bahut hí thoṛá hogá, jaise Zaitún ke daraḳht ká, jab wuh hiláyá jáe, ya‘ní do tín dáne choṭí kí sháḳh par, chár páṉch phalwále daraḳht kí berúní sháḳhoṉ par. 7Us roz insán apne Ḳháliq kí taraf nazar karegá, aur us kí áṉkheṉ Isráíl ke Quddús kí taraf dekheṉgí. 8Aur wuh mazbahoṉ, ya‘ní apne háth ke kám par nazar na karegá, aur apní dastkárí, ya‘ní Yasíratoṉ aur butoṉ kí parwá na karegá. 9Us waqt us ke fasíldár shahr ujṛe jangal aur paháṛ kí choṭí par ke maqámát kí mánind hoṉge, jo baní Isráíl ke sámne ujaṛ gaye, aur waháṉ wírání hogí. 10Chúṉki tú ne apne naját denewále Ḳhudá ko farámosh kiyá, aur apní tawánáí kí chaṭán ko yád na kiyá, is liye tú ḳhúbsúrat paude lagátá, aur ‘ajíb qalmeṉ us meṉ jamátá hai; 11lagáte waqt us ke gird iháta banátá hai, aur subh ko us meṉ phúl khilte haiṉ: lekin us ká hásil dukh aur saḳht musíbat ke waqt hech hai.
12Áh, bahut se logoṉ ká hangáma hai, jo samundar ke shor kí mánind shor macháte haiṉ; aur ummatoṉ ká dháwá baṛe sailáb ke rele kí mánind hai! 13Ummateṉ sailáb i ‘azím kí tarah á paṛeṉgí: par wuh un ko ḍáṉṭegá, aur wuh dúr bhág jáeṉgí, aur us bhúse kí tarah jo ṭíloṉ ke úpar áṉdhí se uṛtá phire, aur us gard kí mánind jo bagole meṉ chakkar kháe, ragedí jáeṉgí. 14Shám ke waqt to haibat hai; subh hone se peshtar wuh nábúd haiṉ. Yih hamáre g̣áratgaroṉ ká hissa aur ham ko lúṭnewáloṉ ká baḳhra hai.
Currently Selected:
Yasa‘iyáh 17: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
