MARK 5

Nyi küsü sietse kümüsü nüh sietekütse saküümühie

(Mat 8.28-34; Luk 8.26-39)

1Jütisanü mari Galilee juküji anyu Gerasene ti küsa nato vü ru. 2Thinü Jisu ajuhie lo vünüh keshurute ünü nyi küsü mükümtse sietse nüh mürü taji sietekütseri küsü rükuza vünüh tseshuru ma sie mütu. 3Jümatü rükuza vü rhoküpe küsü, nyi küsü nga mürüli nga nüh vi ma müküphetera sa. 4Hozakeri nga ma tü mürü kükhetevüh nüh thi mürüli nga nüh phete wie ketünga ma nüh mürüliri nga zothuoh khekümü sasati, thi nyi küsüwienga ma shoteküpera müküsara küsü. 5Thi ma tü rüza rülo aveh vü nga rükuza vü thi küzhihori vü pehuo kümü sa, azhü zie taji aloh vi ma mpa ma satsa rhe taji kütsehuo sa. 6Thitü ma tü aleküsuo vünüh Jisu ngu ünü zhüru ma khurü; 7thinü ma tü azhü ziekürügi she tajinü, “Kürügi tsawa Saküüwuowa Tsa Jisu, noh hi vü mowa sa nti lo? hi nüh Saküüwuowa nyo vi küshie nü küza naveh, noh hi samükümnomna tümümo,” ti khuo. 8Küpakenühnyunü Jisu nüh küüza, “Noh mükümtse sietsewa, noh anyiwa vünüh shuteru luo,” ti küsa kenüh. 9Thinü ma nüh, “Noh nyo thawa lo?” ti küna, thinü ma nüh rüle taji ma vü küüza, “Eh nyo thuoüji Ashieji,” ti küza, Küpakenühnyunü hiri hozake kütse kenüh; ti küza. 10Thinü ma nüh Jisu vü azhie jüla nüh sietse kümüsüri zhemüjatümü üti wurie khuo. 11Jütiküsavü küzhiho kütuo vü awu ashieji küsü azanyo chütsa peveh. 12Thinü mükümtse sietse nüh Jisu vü khuo taji, “Hiri awuri lovü küütuna küsa kenüh hiri awuri aza lovü küüzemo,” ti khuo. 13Thinü ma nüh waluo, ti küza. Thinü mükümtse sietse jümari shutewa awu aza lovü tu nü awu lovü tetukhe: thi awu jüla anyie künyi refü kütseri zhü jojowa apothuoh ajuküji lovü tetu nü kürhothe khemü. 14Thinü awu jümari kühuori nüh prelepreza zhüwa anyu vü thi anyuküji vü küzakhe. Thinü anyiri tü momoti samüthuoh nüh no nti wa khe. 15Thi mari Jisu vü ru nü, atsuore kümüsüwa nüh ma mürü thi ashieji nüh sietekütsewa ma müshe mütsanü ma thsü müphie taji küshupela ngu nü mari krü she. 16Thi tsuore kümüsüwa nüh ma mürü kütsewa vü azanyo momowa sanüh thi awuri zhüku nga ti mari nüh viwa nyuri vü küza. 17Thinü anyi jümari nüh mari anyu tsekarietewa üti Jisu vü khuo. 18Thinü Jisu tü ajuhie lovü tetsethuoh ünü tsuore kümüsüwa nüh ma kümürüwatü Jisu vü nyitewa nti wurie khuo. 19Thitü Jisu nüh ma siemüwa nti sanü ma vü küüza, “Noh tse noh zhe noh küümzeri vü wa nü mari vü Vüwa nüh noh vü azanyo küji kürikele satsü nüh ti küsa, thi ma noh küzakele kümüze tsü nti küsa vi küzatsüluo,” ti küza. 20Thinü ma tse Dekapolis anyu aveh vü wa nü Jisu nüh ma vü azanyo küji küzakele satsü nti küsa vi nyuri vü küzawa; thinü anyiri aveh nga ngo she.

Jairus atsarülawa thi Jisu thsühu küpavühwa

(Mat 9.18-26; Luk 8.40-56)

21Jüsevü Jisu ajuhie vünüh hie ajunato tuwuovü kari wa nü, anyi ariakhuo küji küsü ru ma vü sehzhukhe, thi ma thuoüji ajuküji kütuo vü tsie. 22Thinü anyo Jairus ti küsa sinagogue ti küji künazizhe vü kübeteri küsü jüla ru ma ngu nü tsuo ma jih vü zetewa. 23Thi ma nüh, “Eh tsa rülanguowa süna küsavü pemüthuohlie; ma mühiera taji rhona küsa kenüh noh ra nü noh ke ma rügi vü thsetsüti wurie ma vü khuo.” 24Thinü Jisu tü ma sie taji tewa, thi anyi ashieji küsü ma se nyi nü chiluo taji tewa. 25Thinü nyimzavühri küsü mahvi türakünyi azühlipehuo taji; 26nahzi küthsüri hozake nüh ma no; thi ma künyirhie aveh nga poka khemüketünga saküümühiera nyunü kümüsütsasütsa teküwavüh küsü; 27Jisu zhüku thsüra nü anyiri aza vünüh tsewa ma se vünüh ru nü ma thsü pa, 28küpakenühnyunü ma mpa ma luoveh vünüh, “Hi nüh ma thsü küpawiempa nga nüh hi tü mühierana küveh kenüh,” ti sa. 29Thi kepa ünü azüh likütsewa tü shiti ngetewa; tinü ma münomüna kütsewa vünüh mühiemüthuoh ta küsa ma mpa thsüra. 30Thinü Jisu nüh ma kükhra shuteküwa thsüra nü kürele tuwuo hawuo chiluo kütseri vü noh nü, “Thawa nüh eh thsü pa lo?” ti küna. 31Thinü ma sehnyiri nüh ma vü kürüle, “Anyi hozake nüh küchiluo tsewie ketünga noh tü thawa nüh hi pa lo? ti sawie nti ülo?” ti küza. 32Jütisanü thawa nüh ma pa nüh no nti küreleraza nü no. 33Thinü nyimza watü krü nü khekheti küshü nü ma vünüh mowa samüthuoh nüh ta küsa thsü nü ru ma jih vü künyiatsuo taji ma vü küzhütsa aveh vi küza. 34Thinü ma nüh nyimzavühwa vü küüza, “Eh tsa, noh kütsotü müpa nüh no sakümühietsü müthuoh nüh, noh künawatü mühie taji noluoveh rüzi nü waluo,” ti küza. 35Ma nüh azhü jüma phrate küveh vü anyi wuori aküjiwa zhe vünüh ru taji, “Noh tsa rülawa sümüthuoh nüh! mokenüh Küsosie watü sakümnomna nü küze le na lo?” ti küza. 36Thitü mari nüh mowaküzaveh nüh Jisu tü müküthsü kümüjie samü tajinü sinagogue ti küji künazizhe vü kujiwa vü küüza, “Noh mükrütümü, kütsotü müpa nüh tsotü luo,” ti küza. 37Jütisanü ma tü Pitor thi Jems thi Jems anü Johan küchie nüh nyi küpari nü ma se mükünyi nti sa. 38Thi mari sinagogue ti küji künazizhe vü küjiwa azhe ju ünü, anyiri zie nü krie külu küpe künara. 39Thinü ma azhe lovü tu nü mari vü küüza, “Nohri mokenüh krie küruoküra peveh lo? Atsa rüla watü sümüveh, thitü zeküvehwie,” ti küza. 40Thinü mari tü ma riesangü tewa, thitü ma nüh mari tü anyulavü küzekhemü taji rülawa apa thi ma zah, thi Jisu siekütseri mpa sie taji atsa rülawa azeku lovü wa. 41Thi ma ke thsuo taji atsa rülawa ake sho nü ma vü küüza, “Talitha kumi,” mazhünyo thuoüji, rülawa, hi nüh noh vü küzaveh, süra luo, ti küza. 42Thinü rülawa tü müküzhikewiethuoh nüh süra ale tsetewa; ma tü mahvi türakünyi atsa sakümüthuoh kenüh, thinü mari jüma ngu nü küzülanga müngo. 43Thinü Jisu nüh nyuri müküüthsü nti küsa kenüh mari wurie khe, jütisanü ma n

Currently Selected:

MARK 5: POCHBSI

Highlight

Copy