MARK 4

Matsüküzhuhri küsü vi küüzhühie

(Mat 13.1-9; Luk 8.4-8)

1 # Luk 5.1-3. Jüsevü ma nüh Galilee juküji nato vünüh nyuri sosie lehü, thinü anyi ariekhuo küji küsü ru ma kütuo vü sehzhu; jükenüh ma tü ajuhie küsü lovü tu ajuküji lovü petewa; thi anyi riekhuowa aveh ajuküji nato azhih küüwe vü pekhe. 2Thi ma nüh küüzhühiezhü hozake vi nü mari sosie, thi mari küsosievü hakümjie küza. 3“Künaluo, halie, matsüküzhuhri küsü amatsü zhuh nti wa: 4Thinü ma nüh zhuh nü wuori tsuotsa lekhuji nato vü tewa, jütiküsavü amüwari ru nü khrütsamü. 5Thi wuori nü tsuotsa alohza vü azhih kürüpah vü tewa, thinü azhih rüpahkümüle kenüh shiti shozhuteru: 6Thinü arünyi shuru nü chü küwazhümü, thi ma rüzo mükünyie kenüh chüthemü. 7Thi wuori tsuotsa arüzhüza lovü tetu, thinü arüzhu shosüra nü shophotekümü kenüh avi küsü nga müpe nüh samü. 8Thi wuori thuoüji tsuotsa azhih kümühie vü ka thi shora nü ato mühie she taji avipe, thi avi cherake, thi rorake, thi müzake ti pera.” 9Thinü ma nüh mari vü küüza, “Nyi küsüküsü nga akhüna pe taji küüna ngü pevehji, jümari küüna luo,” ti küza.

Küüzhühiezhü küvi zhünyo

(Mat 13.10-17; Luk 8.9-10)

10Jüsevü Jisu ma mpa peveh nüh, ma mükieshe taji küpe wuori nüh ma senyi türakünyiri sie taji ru küüzhühiezhü azhünyori küna. 11Thinü ma nüh mari vü küüza, “Saküüwuowa kajipe zhüku müküthsüwa nohri küüthsü nta tsümüthuoh, thitü alievü küperi thuoüji zanyo aveh nga küüzhühiezhü vünüh vi küzaveh. 12Küpakenühnyunü mari aküno nü no naveh,

thitü müngura,

thi mari küüna nü künaveh,

thitü müthsüra,

küpakenühnyunü jükümjie saramüthuoühji mari luoveh khaphrü nü Saküüwuowa vü teru taji mari müküle nojatsüra naküveh kenüh,” ti küza.

Jisu nüh matsüküzhuh küüzhühiewa zhünyo küzakütsü

(Mat 13.18-23; Luk 8.11-15)

13Jüti sataji ma nüh mari vü küüza, “Nohri küzhühiezhü müthsüwie la, Jütathuoüji mokümjie nohri küüzhühiezhü aveh thsürana lo, 14Amatsü küzhuh watü Saküüwuowa zhü vi zhuhveh. 15Azhü zhuh küwavü azhü tsuotsa lekhuji natovü teküwari hamari; mari nüh jüma küünaravü Atsuore nüh prelepreza ru mari luoveh lo vünüh viteküwari wiethuoh. 16Jükümjie zhuh kütsuotsa nü alohza vü teküturi thuoüji, mari azhüwa küünaravü aloküzhe vünüh shita vira; 17thi pethuohtü mari lovü arüzo mükünyie kenüh tsotho pike mpa küpe sa, thi azhüwa kenüh kümnomna, nyutü akükho shuruthuoüji müküzhikethuoh nüh aluoveh sakümüsü mümüti. 18Thi wuori arüzhü lovü zhuhkütsuotsa kümüri thuoüji, azhüwa künara, 19thitü khinyi kürho rüle müshe aluoveh kütsazari thi vi müraküveh künyirhieri thi zanyo küpa kümünguri aluoveh lovü tetu nü azhüwa we kümiemü nü avi müküpera nü sakümüri. 20Thitü azhih kümühie vü küzhuhkeri thuoüji, azhüwa künara nü vi mari zhi sara nü mari avi cherake, thi rorake, thi müzake küperariwiethuoh,” ti küza.

Anyihku azekhu lovü küthse

(Luk 8.16-18)

21 # Mat 5.15; Luk 11.33. Thinü ma nüh mari vü küüzale, “Thawa nüh anyihku tso taji alati rügi vü müsanüh azekhu lovü thse veh lo? 22#Mat 10.26; Luk 12.2. Küpakenühnyunü küthsü küngu rana küsa küchie nüh zanyo küsü nga küthi sana küsa münyie; thi küthsüjuna küsa küchie nüh zanyoküsü nga müküthsü nüh küsanü münyie. 23Anyi küsüküsü nga akhüna pehtaji nü küüna nguri nü küüna luo,” ti küza. 24#Mat 7.2; Luk 6.38. Thinü ma nüh küüzale, “Nohri azanyo küüna vü azhüzhüluo; nohri nüh küütewa nüh vi küte nohri tsüwie naveh; thi jüma nyiavü nga vi thsephe nohri tsüwie naveh. 25#Mat 13.12; 25.29; Luk 19.26. Küpakenühnyunü anyi küsüküsü nga aküpewa thuoüji tsüwie naveh, thi anyi küsüküsü nga mükünyiewa thuoüji ma vünüh pike peküvehwanga vishele tewa naveh,” ti küza.

Amatsü shoshuhru nü küjira vi küüzhühie

26Ma nüh küza kümüshoke wie taji, “Saküüwuowa kajipe thuoüji nü nyi küsü nüh amatsü vüwa azhih vü zhukenüh, 27arüza vü teru ze thi thoru thuoüji sürarati sanü ma matsü tü mokümjie shoshuhru jira nüh müküthsü kümüjiewiethuoh. 28Azhihwa nüh mavi saküpera veh; ma nyawa shizhukhu thi jümase vünüh ma vi pe, jümase vünüh ma vi lovü atha prote ruruti. 29#Joe 3.13. Jütisanü aviwa nemüthuoüji kümawie tsotho jukümüthuoh kenüh ma tü ma hira vü taji wawati,” ti küza.

Rhünyuowitha vi küüzhühie

(Mat 13.31-32,34; Luk 13.18-19)

30Thinü Jisu nüh küüzale, “Hiri mowa vi nü Saküüwuowa kajipe vikümüjiera na lo? Nyutü mozhünyo vünüh vikümüjie kütsana lo? 31Jümatü rhünyuowi tha vehküsü kümüjie wiethuoh; jüma viwa azhih vü küzho vü azhih vü azanyo atsü aveh zhie nüh aküzatsawa, 32thitü viwa zho nü shozhuru thuoüji awih aveh zhie nüh küjitsawa sasati, jütisanü atsuona aküjiji shiruruti; thi prükütse amüwari ru nü kümünyiera sasati,” ti küza. 33Jümpa mükünyu ma nüh küüzhühiezhü hozake vi nü mari vü azhü küza, küpakenühnyunü mari nüh jümari thsüraküveh kenüh. 34Thi küüzhühiezhü müvi nüh ma tü mari vü müphrate, thitü ma sehnyiri mpa sie küpevü thuoüji azhünyo jümari aveh rüle küzazati.

Jisu nüh amürhü phraküüzohkümü

(Mat 8.23-27; Luk 8.22-25)

35Thi jürülo vü münüle ru ünü, ma nüh mari vü küüza, “Hiri tsekari tuwuovü tewa ünü ra,” ti ji. 36Tinü mari anyiriekhuowa küze mütaji nü ajuhie vünüh jüti ma sie mari kürü hie tewa. Thi ajuhie küpari nga ma se nyitse. 37Thinü amürhü aküjitsatsa ru ajuküshü nü ajuhiewa vü küshüke taji aju tü ajuhie lovü tu nü prote küru sa. 38Jütiküsavü ma tü ajuhie ase vü alüche sataji ape küsü rügivü zepeveh; thinü mari nüh ma müchüke nü ma vü küza, küsosiewa, hiri poka müna saküveh noh nü noluoveh kütsaza münyie wiethuoh ülo? ti küna. 39Thinü ma nüh süra nü amürhü phra taji ajuküjiwa vü küüza, “Noh zotipetewaluo,” ti küza. Thinü amürhü tü mümürhü nüh letewa, thi zohmti petewa. 40Thi ma nüh mari vü küüza, nohri mokenüh krüsheke veh lo? Nohri tü mokenüh kütsotü müpehra nüh samü lo? ti küza. 41Thitü mari tü krü sheke taji küsü nüh küsü vü küza taji; “Anyi hamatü mokümjie küsa anyi thuoh lo, amürhü thi ajuküji wienga ma zhü künaramünü?” ti sa.

Currently Selected:

MARK 4: POCHBSI

Highlight

Copy