MARK 6

Nazareth vü Jisü kulekumü

(Mat 13.53-58; Luk 4.16-30)

1Jüsevü ma jüla nüh shuteru nü tse ma mpa ma nyu vü teru, thi ma sehnyiri nga ma se müzheteru. 2Thinü Sabbath üti küji Judahri kümünyierülo ju nü sinagogue üti küji künazizhe vünü nyuri sosie, thi ma zhü küünari hozake wienga khielo üti ngo nü küphrate, “Anyi hamatü khiela nüh azahnyo haritü ngura lo? Thi vi ma tsü küsa aküthsü ha nga mokümjie küsathuoh lo? Thi mokümjie ma ke vünü azahnyo küji hakümjie saraveh lo? 3Hamatü athso misitiriwa nyu ülo? Ma zah Maria thi ma nüri Jems thi Jose thi Judah thi Simon nyu ülo? Thi ma tsehvüri nga hiri sie hala pemüveh ülo?” üti sa, jüütisanü mari ma vü aluoveh müsütewa. 4#Jhn 4.44.Thinü Jisu nüh mari vü, setsaküthsüri tü ma mpa ma nyu thi ma mpa ma küshuküra thi ma mpa ma tsapatharuo vünü küchie nüh azhieküpa aveh vünü küsiake ngura veh, ti küzah 5Jütisanü ma aküna wuori pa taji jümari sakümühie kütsü küchie ünü jüma nyievü jüla azahnyo küji müsara nüh samü. 6Thi mari nüh mütsotü nta sakümü kenüh matü ngo sheh.

Jisu nüh ma sekünyi türakünyiri küüze

(Mat 10.5-15; Luk 9.16)

Thi Jisu tu anyunyu vü sosie tewa. 7Thinü ma nüh türakünyiri ma vü jike taji nyi künyihnyih vünü küzenta sa, thi mükümtse nyiaza anyia vü kükhrara akükhra vi mari tsü. 8Thi mari tseküwa vü akütsüh vehküsü küchie nüh achükhu nga satü, alohse nga satü thi apesa nga satü zahnyoküsü nga vimüwatümü üti küzah. 9Thi mari ajiküükruvüh küthse küchie nüh satsaküüzhuvüh nga künyi müvütümü üti küzah. 10Jümpa mükünyu nohri wuovüwuovü nga watü azhe khiela tuna ve ünü nohri anyu jüla ünü müjie tseteküwa küju nü jüla pewie luo, üti küzah. 11#Krr 13.51. #Luk 10.4-11.Thi wuovüwuovü nga nyuri nü nohri müsieke nta thi noh zhüri müküna nta thuoüji, nohri anyu jula nüh tewaluo nta küsa vü mari küüthsü nta küsa kenüh nohri ampha kükhu vü azhitho nga kükojamüluo, ti küzah. 12Thinü mari tsewa taji aluoveh mükhaphrüji mümühie üti küsa vi sosie. 13#Jos 5.14. Thinü mari atsuore kümüsüri hozake zheja, thi akünari hozake vü avüjüh vi künetsü nü mari sa kümühietsü.

Johan Baptist küsü

(Mat 14.1-12; Luk 9.7-9)

14 # Mat 16.14; Mrk 8.28; Luk 9.19. Herod kajiwa nga Jisu kükra künara, küpakenühnyunü ma zhükuwa tü tholanyuo teküwa thuoh kenüh, wuori nüh küüzah, Johan nyuri baptis küsawa tü aküsü vünü rhoküsüra thuoh kenüh akükhra hari mavü nü saraküvehwie, ti küzah. 15Thitü küpari nüh küüzah, hama tü Elijah wiethuoh, ti küzah. Thi wuori nüh küüzah, “Khanavü setsaküthsüri küsü kümüjie ma nga setsaküthsüri küsü wiethuoh,” üti küzah. 16Thitü Herod nüh jüküthsüra vü, khanavü hi nüh ma lü zahthuohkümüwa Johan rhosürale müthuoh, ti küzah. 17#Luk 3.19,20.Herod ma mpa nüh Herodia, ma nü avüvüh kenüh anyiri küze taji Johan re küsizhe lovü thse nü khehkemü, küpakenühnyunü ma nüh ma nü Filip vüvüh zahkümü kenüh. 18Johan nüh Herod vü küüzah, “Noh nü noh nü avüvüh küvi awulemükünyu kenüh,” ti küzah.

19Thinü Herod avüvüh Herodia vühwa nga Johan vü sieküproluo nü ma fethe ngü, thitü müsara nüh samü. 20Herod tü Johan krü, küpakenühnyunü Johan tü künyitsari küsü thi kümtseri küsü ta küsa küthsü kenüh ma huotepe thi ma zhü küüanara vünü azahnyo hozake sara, thi küna lozhe.

21Jütiküsavü atsotho kümühie küsü, Herod küwuo rülo ru ünü ma ünü ma kükhu vü küji saküvehri thi arienyiri anyia vü aküji sa küvehrithi Galilee vü sierhüri üti sie tsazhü. 22Thinü Herod vüvüh Herodia vühwa atsa rülawa tü turu tsi kütsanü Herod thi ma nüh sietsazhuküvehri sakülozhe tsü, thinü kajiwa Herod nüh rülawa vü küzah taji, noh mowa loveh nüh hi vü khuoluo, hi nüh jüma satsüwie naveh, ti küzah. 23Jütisanü ma nüh rülawa atü vünüh küshiewie taji nü, noh hi vü mowa khuo nthe nüh, hi nüh tsüwie naveh, eh kükaji küzhila nga vino tsüwie naveh, ti küzah.

24Thinü rülawa tü tseshuwa taji ma zah vü küna nü, “Hi tü mowa khuo üti lo?” ti küna ünü, ma zah nüh ma vü küüzah, Johan nyuri baptis kütsüwa alü khuo luo, ti küzah.

25Thinü rülawa tü külesho prezahzah kajiwa vü ru nü, noh nüh Johan Baptist alü khinyi akhu lovü shita thseru nü hi küütsüngüveh, üti khuo.

26Thinü kajiwa tü ma lomüra nüh sa sheh, thitü ma nüh küshie kümüzhüwa kenüh thi ru ma sietsazhu küvehri kenüh rülawa zhü mükürüra nüh samü. 27Thinü müküzhikewiethuoh nüh kajiwa tü ma huoküveh arienyiri küsüküze nü ma lü viru üti azhütsü. Thinü ma tü wa nü küsizhe vünü ma lü thuoh, 28Jütisanü akhu küsü lovü thse nü viru rülawa tsü, thi rülawa nga viwa ma zah tsümü. 29Jütiküsavü Johan sehnyiri tü ju thsüra nü ru ma kümo khawa tajinü arüku küsü lo vünü chowumü.

Jisü nüh anyiri anyie münga vo küsa

(Mat 14.13-21; Luk 9.10-17; Jhn 6.1-14)

30Jüsevü povüküsari tü shehle ru Jisu vü sehzhu tajinü mari nüh momowa sa thi momo üti sosie nüh ma vü küzah kheh. 31Thinü ma nüh mari vü küzah, “Nohri ra nyuri mükünyie vü pike münyie pela luo, küpakenühnyunü anyiri khielota ru le wa le üti sanü atsotho rüzi nü kütsaküzhu küsa nga müsara nüh sakümü kenüh.” 32Jütisanü mari ajuhie vünü tse anyiri mükünyie ape vü tewa. 33Thinü anyiri nüh mari kuoküwa ngu nü anyiri hozake wienga mari wiethuoh ta küsa thsü nü anyunyu vünü zhü mari atüvü üti wa kheh 34#Nyi 27.17; 1 Kaj 22.17; 2 Kkz 18.16; Eze 34.5; Mat 9.36. jürü Jisu tü ajuhie lo vünü shuru ünü anyiri ashieji küsü ngura; thinü ma tü jümari ngu nü kümüze sheh, küpakenühnyunü mari tü anyizhü mari kühuowa mükünyie kümüjie küsa kenüh, jükenüh ma nüh azahnyo hozake vi mari sosietsü. 35Thi arülowa münü tetsethuoh ünü, ma sehnyiri tü ma vü ru nü küüzah, hatü areza thuoh, thi atsothowa tü münümüthuoh; 36tinü mari anyu luo wie küze tajinü mari mpa mari kütsaküzhu küüsümuluomo, küpakenühnyunü mari tü zahnyo küsü nga kütsa mükünyie kenüh, ti küzah. 37Thitü ma nüh mari vü küüzah, nohri mpa mari vo saluo, ti küzah. Thinü mari nüh ma vü küüna, “Noh tü hiri wa taji alohse duli müzah künyi ame süru nü mari avo sa üti lo,” üti küna. 38Thinü Jisu nüh mari vü küüzah, nohri alohse küzahke vü tse ünü wa nü nonoluo, ti küzah. Mari nüh wa nono taji ma vü küüzah, alohse münga thi anga künyi üti vü tse, ti küzah. 39Thinü ma nüh anyi jümari aveh ajiejie vünü apra kümüzhi rügi vüpe üti küzah. 40Thinü mari ajiejie vünü wuori müzahke wuori tünyieke üti shupewa. 41Jüti satajinü ma nüh alohse münga thi anga künyi üti vi nü rügi vü no nü tsia tsü, thi alohseri zokhuo nü küsuo anyiri vü tsü üti vima sehnyiri tsü, thi anga künyi nga küsuo nü mari tsü. 42Thi mari aveh tsa taji müwara kheh. 43Thi mari anga thi alohse kütsatü aveh phazhü nü akhuo türakünyi vizhuhra. 44Jüla nyimpari alohse kütsa mari anyie münga.

Jisu aju nyia alekütse

(Mat 14.22-33; Jhn 6.15-21)

45Jümase vü müküzhikewiethuoh nüh ma nüh anyiri saküze küveh vü ma sehnyiri tü shi üti ajuhie lovü tu nü apo sa tuwuovü Bethsaida vü tewa üti küzah phoke. 46Jüti mari küzekhehkümüsevü ma tü akükhuo santi küzhiho vü tewa. 47Thi münüleh teru ünü ajuhie watü ajuküji azhila vü tewa, thi ma thuoüji ma mpa alievü ajuküüwe vü petewa. 48Thi amürhü nüh mari atü vünü mari wuo vü weke kümü kenüh mari ajuhiewa hie khosheh taji kuoküwa ngu taji arüne münühu müzü kümüjie küsavü mari sieteküwangu kenüh mari vü wa. 49Thitü mari tü ma nüh ajuküji nyia aletse kütse ngu nü ma tü atsuore tünüh ti sanü azhü zie. 50Küpakenühnyunü mari aveh ma ngu nü aluoveh küzah üti sateküwa kheh kenüh. Thinü ma nüh shi üti mari jüle taji mari vü küüzah, nohri lozheluo, hi wiethuoh nüh, mükrütümü luo, ti küzah. 51Jütisanü ma tse mari vü wa ünü ajuhie lovü tu, thinü amürhümüürhü nüh letewa: thi mari mükümüshehphiera sanü khielo üti mari mpa krü ngo sheh. 52Küpakenühnyunü mari tü alohse vünü küükrükükra küsa nga mümüshehünü samü, thi mari luoveh tü khotekütsethuoh kenüh.

Jisu nüh Gennesaret vü künari sakümühiekütsü

(Mat 14.34-36)

53Jümasevü mari jüma kari ru, thi Gennesaret azhih vü ru nü ajuhiewa ajuküji nato vü viru sa. 54Thi mari ajuhie lo vünü shurü ünü, anyiri nüh shi üti ma thsütera. 55Thinü anyu jüma natonahuo vü küpe aveh vü zhüwa taji akünari aze rügi vü nazeküvehri khavü taji ma khiekhiela peveh nüh vü wa. 56Jüti sanü anyuküzahri vü nga, anyuküjiri vü nga, azhü vünü nga, asüküsape vünüh nga ma khiekhiela wa naveh nü akünari sieru nü lekhuji aveh vü sataji ma thsühuwie nga küüpa üti khuo, thi ma küpari aveh nü mühierara üti sa.

Currently Selected:

MARK 6: POCHBSI

Highlight

Copy