MARK 7

Alanyira Wule küsosie

(Mat 15.1-9)

1Jümasevü Jerusalem vünü Farisiri thi khonyo Küsosieri wuori ti ma vü ru sehzhukhe. 2Thinü mari nüh Jisu sehnyi wuori mümütse nüh, mazhünyo, anale wule müzhe taji ake mümütso nüh ashiekütsa ngu. 3Küpakenühnyunü Farisiri thi Judahri aveh alanyira wule müzhe nü ake kümütsoshe küchie nüh ashiemütsa. 4Thi asüküsape vünü sheleru taji ajuhmüjieküüzü sevü nü ashiemütsa; jümpa mükünyu awule küpapa mümüzhe üji mükümühie: ahuo kükhrü, aküfü amürü asawuo nüh küsa küfüri thi zanyoküsape kükhrü ti müküzüküzü wule peküveh kenüh. 5Jüta küsa kenüh Farisiri thi akhonyo Küsosieriri nüh ma vü, “Mokenüh noh sehnyiri tü alanyira wule mümüzhe nüh ake mükümtse vi ashietsaveh ülo?” ti küna. 6Thinü ma nüh rüle taji mari vü küüza, Isaya nüh nohri aküthseküsari kenüh asetsaküthsüzhü phra nü rhüke küsa,

“Anyi hamari tü apo mpa nüh hi siake kütsewie,

thi mari luoveh thuoüji hi vünü kietuo shemü, ti küza.

7Thi mari tü anyiri nüh küsa wuleri vi

mari zhü sanü nyuri sosie taji hi khurü müjuju saküvehwie,”

ta setsaküthsüzhü phratekümtseju kütsü rhüsawie veh.

8Nohri tü Saküüwuowa nüh azhükütsüri thuoüji jamü taji nü anyiri nüh küsa wuleri: aküfü kükhrü, ahuo kükhrü thi jükümjie awule küpapa thuoüji satseveh, ti küza. 9Ma nüh mari vü küüza, “Nohri tü nohri mpa nohri wule sataji Saküüwuowa wule thuoüji jakhehmü nta küsawa pemüwiethuoh,” ti küza. 10#Tse 20.12; Kho 5.16; Tse 21.17; Lev 20.9. Khanavü Mosa nüh küüza, “Noh pa noh za siakeluo; thi athari nüh apa aza müzü naveh nüh jümatü küüsümü luo,” ta phrateke saveh, ti küza. 11Thitü nohri nüh küsosie, nyi küsü nüh ma pa nyutü ma zah vü küza taji, “Nohsü tü hi vünü akünyia küngu lehwa tü Korban samüthüo nü,” (mazhünyo: Saküüwuowa vü tsümüthuoh nü) ti küzazati. 12Ti sanü nohri ma pa nyutü ma za kenüh azanyo küüsalehri nga müküsanüh samümüti. 13Jütisanü nohri mpa nohri lanyiri wule vi nyuri sosie nü Saküüwuowa zhü vi müjuju samümüti, jümpa mükünyu jüma nyiavü nga azanyo küpa hozake nga satetsetseti, ti küza.

Akürho Sakümüne kümü zanyori

(Mat 15.10-20)

14Jüsevü ma nüh anyiri aveh ma vü jike nü küüza, “Nohri aveh eh zhü küna nü thsüluo. 15Zanyo alie vünüh anyiri küsü lovü kütu nü ma samükümnera, thitü anyiri lovü nü shuküruri mpa nüh anyiri sakümüne küveh wie. 16Küsüküsü nga akhüna küpehri thuoüji küüna luo,” ti küza. 17Jümasevü ma tü anyiri azavü nü tsezhuteru nü azhe lovü tetu ünü ma sehnyiri nüh ma vü küzhühiezhü azhünyowa küna. 18Thinü ma nüh mari vü küüza, “Nohri nga azanyo müthsü nüh hazake satsewie ülo? Alie vünüh anyiri lovü küturi thuoüji anyiri samükümünera ta küsa nohri müthsü ülo? 19Jümaritü aluoveh lovü mütü nüh avo lovü tu nü shute küwa kümüjie wie,” ti küza. (Ma nüh jütisanü kütsaküzhu aveh tü mütsemü ta küza). 20Jümpa mükünyu ma nüh küüzale, anyiri ülo vünü shuküruri thuoüji anyiri Sakümüne mümüti. 21Küpakenühnyunü anyiri luoveh ülo vünü zanyokümüsü kümüsheri; vüvüh vüpa pewie ketünga küüphroküphrie küsa, müsarüla küsa, nyuri küfethe, 22kürühu, zanyokümüngu, arokümüsü, nyuri kümüra, zanyokümüsü kümüshe mpa küpeh, nyuri noh nü anotha küsa; nyuri phratekümüsü, kürhieza; thi aküzhe müke. 23Zanyo kümüsü hari aveh anyiri ülo vünü shuru nü anyiri sa kümüne mümüti.

Nyimzari küsü kütsotü

(Mat 15.21-28)

24Jümasevü ma tü süra taji tse Tair thi Sidon anyu kütuo vü tewa. Thi ma tse taküsa nyi küsü nga müküüthsüna küsa kenüh azhe ülo küsü vü tetü; thitü müküthira nüh samü. 25Jüvü nyimzari küsü ma tsa rüla küsü, mükümtse sietse nüh ma mürü tekütsevühwa nüh ma zhüku thsü taji prelepreza ru taji ma jih vü külu zetewa. 26Tinü nyimza jümatü Greekri Sirofoeniciari akuoh küsü. Thi nyimzawa nüh ma vü ma tsa vünü atsuore kümüsüwa zhezhujamütü üti wurie ma vü khuo. 27Thitü Jisu nüh ma vü küüza, “Kürünguori avo sa khu luo; küpakenühnyunü kürünguori shie viwa tajinü ashu vü jakütsütü müküle,” ti küza. 28Thinü nyimzawa nüh ma vü küüza, “Azhütsawiethuoh, Vüwa, thitü ashuri wie nga akhutokütsape kükhu ülo vünü kürünguori nüh tsaküütsuotsa müzhitsatsati,” ti küza. 29Thinü ma nüh nyimzawa vü, “Azhü hakümjie küüza kenüh no wa mühievehthuoh; atsuore kümüsüwa no tsa vünü shutewathuoh nüh,” ti küza. 30Thinü nyimzawa tü ma zheh vü shele wa ünü ma tsa vünü atsuore kümüsüwa shutewa nü aze rügivü küzela ngu.

Khünarüpo thi azhümüphrara ti küsa küsü saküümühie

31Ajuküji nato vü küpe anyu Tair thi Sidon jamü taji nü ajuküji nato vü küpe anyu Dekapolis anyuri küzhila vünü vehthuoh taji Galilee ajuküji vü ru. 32Thinü akhüna nga rüpo thi azhü nga müphrara ti küsa nyi küsü anyiri nüh sie ma vü ru nü sakümühietsü üti wurie ma vü khuo. 33Thinü ma nüh anyiri azavü nü ma siezhu azhie küpavü tewa taji ma tüjü vi ma khüna künyi lovü thse thi amütse müshüke taji nü ma mizhi pa tsü; 34jütisanü rügi vü no taji ma luoveh küna jikhi sanü ma rütho alovü sahke taji ma vü, “Effatha,” mazhünyo, “Pieraluo,” ti küza. 35Thinü shiti ma khüna künyikhürü pieterü, thi ma mizhi kükho nga künya teru taji azhü phrakümtsera. 36Jütiküsavü nyi küsü vü nga müküzatümüti ma nüh mari vü khete; thitü küzakele ma nüh khenanüh jüma nyia vünü mari nüh anyiri vü phratenyuotewa. 37Jüti sataji anyiri tü ngo tü ngo küluole kümü kenüh; “Ma tü zanyo küsü nga satüsatü samühie she tsü wiewieti nü: akhüna kürüpori nga azanyo saküünara, thi azhümüküphra. Rari nga azhü saküüphraramünü,” ti phrate.

Currently Selected:

MARK 7: POCHBSI

Highlight

Copy