MATHI 7

Nyuri Küüjo

(Luk 6.37-38,41-42)

1Nohri nyuri müküjo tümü, jütathuoüji nyuri nga nohri küüjowa nyu. 2#Mrk 4.24.Küpakenühnyunü nohri nüh mowa nüh vi nyuri küjo naveh nüh nyuri nga jüma nüh vi nohri küjowie naveh, thi nohri nüh mowa vünüh küto nü nyuri tsü naveh nüh nyuri nga jüla nüh küto le nü nohri tsü naveh. 3Thi nohri tü mokenüh noh mpa noh notha lovü kümüneh kütüwa mümüshekhu nüh noh nü notha lovü kümüneh kütüwa nono ti lo? 4Nyutü noh tü noh mpa noh notha lovü kümüneh kütüwa mümüshe nüh noh nü vü, “Eh nü, no notha lovü kümüneh tüküvehwa hi küükhezhumü luo,” ti küzamühie veh lo? 5Noh küthse küsawa, noh mpa noh notha vünüh kümüneh wakhezhu khumü luo, jütathuoüji noh nü notha lovükümüneh tüküvehwa nga ngu mütsemüra naveh.

6Zanyo mowa mütseveh nüh vi ashuh mütsü tümü, nyutü zanyo ame kükhowa vi taji awu atüvü müjake tümü, küpakenühnyunü mari nüh jümari nyi kümünehmü naveh, thi jü mpa mükünyu ase vünü nohri nga müko mühiemü.

Khuo, Phah thi Küütü

(Luk 11.9-13)

7Khuo luo, khuo thuoüji vi nohri tsü naveh, phah luo, phah thuoüji nohri ngura naveh; kütü thuoüji sa nohri tsü naveh. 8Küpakenühnyunü küsüküsü nga khuo thuoüji tsütsüti, thi küphari nga ngurarati, thi thari nüh kütü veh nüh mükhie sataji mari tsütsüti. 9Nyutü nohri zhie vü anyi thawa nüh ma tsanüh alohse khuothuoüji aloh vi ma tsü veh lo? 10Nyutü ma nüh anga khuo thuoüji müre vi ma tsü veh lo? 11Jükenüh nohri anyi kümüsüri wie nga zanyo kümühie vi nohri tsa kütsü aro thsüveh üji, nohri Pa rügivü küpehwa thuoüji thari nüh ma vü zanyo kümühie khuo naveh nüh jüma nyia vünüh küjake taji mari vü mütsünüh sanaveh lo?

12 # Luk 6.31. Jükenüh nyuri nüh nohri vü mokümjie sakütsü loveh nüh jükümjie nohri nga nyuri vü satsüluo, küpakenühnyunü hamatü wulewa wiethuoh thi setsaküthsüri zhütsowa wiethuoh.

Shieku Kümünyiewa

(Luk 13.24)

13Nohri shieku kümünyiewa vünüh müzhe tu luo, küpakenühnyunü kükria vü küwa shieku thuoüji müza thi lekhuji nga rüzihmü, thi nyiri hozake wienga jüma müzhetututi küsa kenüh. 14Küpakenühnyunü kürho vü küwawa shieku thuoüji münyiemü thi lekhuji jüla küwa khomü thi jüma küngura anyi zülamü.

Ma vi vünüh ma Rhu Küthsüra

(Luk 3.9; 6.43-44)

15Küzhühja setsaküthsüri vünüh nohri azhüzhüluo, jümari tü nyihzhü thsümünyi vü taji nohri vü tseveh, thitü mari luoveh lovü thuoüji nyuri rekütsa rezanyihnyih riekhuo wiethuoh. 16Mari avi vünüh nohri mari thsüra naveh. Nyi küsü nga rüzhü rhu vünüh rhelivi lara müveh, nyutü kawurüzhü rhu vünüh jichuo lara naveh lo? 17Jükümjie athso kümühie aveh thuoüji avi kümühie peraveh, thitü athso kümüsü aveh thuoüji avi kümüsü pepeti. 18Athso kümühieri thuoüji avi kümüsü piketü küpewanyu, thi athso kümüsüri tü piketü avi kümühie müpera. 19#Mat 3.10; Luk 3.9.Athso mavi kümühie müküperari aveh thuoüji jethuoh nü anyih lovü thsemümüti. 20#Mat 12.33. Jükenüh maviri vünüh nohri tü mari thsüra naveh.

Hi tü Piketü noh Müthsüwie

(Luk 13.25-27)

21Hi vü Vüwa, Vüwa ta küsari aveh rügi kajipe lovü mütu khehra, thitü thari nüh rügi vü peküvehwa eh Pa külo sanaveh nüh jümari nüh tu naveh. 22Jü rülovü nyiri hozake nüh hi vü, “Vüwa, Vüwa, hiri tü noh nyo vünüh setsaküthsüzhü müphra ülo? Thi hiri tü noh nyo vünüh Tsuore kümüsüri zhemüja ülo? Thi hiri tü noh nyo vünüh küükrükükra küüro hozake müsa ülo?” ta phrate naveh. 23#Krh 6.8.Thitü hi nüh mari vü, “Hi nü nohri piketü müthsüwie, nohri zanyokümüsü küsari, nohri tse hi kari tewaluo,” ti küza naveh.

Azhe Küsari künyi vi Küüzhühie

(Luk 6.47-49)

24“Jükenüh anyi küsüküsü nga hi nüh küüza zhüri thsü nü jümari sa thi kümüzheri thuoüji kümütsari alokrü rügi vünüh azheh küsa kümüjie wiethuoh. 25Atso nga rüru, aju nga jiru amürhü nga mürhüru nü azhejüma küchie, thitü samüsü, küpakenühnyunü azheh jümatü alokrü rügi vünüh sakümüthuoh kenüh.

26“Thi anyi küsüküsü nga hi nüh küüza zhüri thsünü müküsari thuoüji zanyomüküthsüri thi küzheri nüh shünyi rügi vünüh azheh küsa kümüjie wiethuoh. 27Atso rüru, aju nga jiru thi amürhü nga mürhüru nü azheh jüma küchie taji nü aveh zochiekhemü,” ti küza.

Jisu Kükhra

(Mrk 1.22; 6.2; Luk 4.32; Jhn 7.46)

28 # Mrk 1.22; Luk 4.32. Thinü Jisu tü azhü jüri küzatuo ünü anyi riekhuowa tü ma nüh küsosiezhüwa küna ngo sheh. 29Küpakenühnyunü ma tü mari azhievü Wule küsosieri kümüjie vünüh nyu nü kükhra küviri kümüjie vünüh mari küsosie kenüh.

Currently Selected:

MATHI 7: POCHBSI

Highlight

Copy