MATHI 8

Jisu nüh Wupie künari küsü saküümühie

(Mrk 1.40-45; 5.43; Luk 5.12-16)

1Jümasevü Jisu tü küzhiho vünüh turu ünü nyiri riekhuo küji küsü ma se nyi müzheru. 2Thinü halie, wupie künari küsü ma vü ru ma khurütaji nü ma vü, “Vüwa, noh nüh no kümüshe thuoüji notü hi sakümühie tsüwienanü,” ti küza.

3Thinü Jisu nüh ma ke thsuowa ma pa taji nü, “Eh müshewiethuoh; noh küna mütsemü luo,” ti küza, thinü müküzhikewiethuoh nüh ma wupie künawa tü shiti mütsetewa. 4#Lev 14.1-32. Thinü Jisu nüh ma vü, “Noh nyi küsüvü nga müküzatümü üti küsa thsüluo, thitü wa nü levüwa vü kütsa tajinü nyiri nüh küüthsü na küsa kenüh Mosa zhütsüküsa müzhe nü küsathuoh küürowa samü luo,” ti küza.

Jisu nüh Romri Küjiri küsü Siepe Saküümühie

(Luk 7.1-10)

5Jüti sataji nü Jisu tü Kapernaum vü tsuo ünü arienyiri müzake nyia nüh küji küsü ma pharu tajinü, 6“Vüwa, eh siepewa wiechuküsü küna nataji ma luoveh küraküpre tajinü ma zheh vü ze pewievehthuoh,” ti küza.

7Thinü Jisu nüh ma vü, “Hi nüh ru tajinü ma sakümühietsü naveh,” ti küza.

8Thinü arienyiri müzake nyia küjiwa nüh ma vü, “Vüwa, hi nüh noh tü eh zheh lovü turumo ta küsanga mükütse küsü lie, thitü noh nüh zhühnyo küsüwie nga phratetsü thuoüji eh siepewa tü mühiera wienaveh,” ti rületsü. 9Hi nga kükhra küviri kükhu vü peveh, eh kükhu vü nga thopahiri peveh. Thi hi nüh nyi küsü vü, noh tsewaluo, tathuoüji ma tü tsewawati, thi hi nüh nyi küsüwa vü, havü raluo, ta thuoüji, ma tü ruruti; thi hi nüh eh siepewavü, “Noh zanyo hama saluo, ta thuoüji ma tü sasati,” ti küza.

10Thinü Jisu tü azhü jü thsü nü ma ngo she tajinü, mase nyikütseri vü, hi nüh nohri vü küzatoke naveh, hi nüh kütsotü küji harike müjie ngu wie, küpakenühnyunü Israelri zhievü nga müngu wie. 11#Luk 13.29.Hi nüh nohri vü küza naveh, rünyiküshupe vünüh thi rünyi kütupe vünüh anyi khielota ru nü Abraham thi Isaac thi Jacob sie taji rügi kajipe vü petewa nathuoh. 12#Mat 22.13; 25.30; Luk 13.28.Thitü kajira tsa kürhiezari thuoüji nü vi alievü kütsozovü thsemünathuoh; jüla nüh krie thi aha hari tajinü petewanathuoh. 13Jüti satajinü Jisu nüh müzake nyia nüh küjiwa vü, “Tsewaluo, thi noh nüh tsotü kümü kümüjie vünüh küsawa saluo,” ti küza.

Thinü siepe jümawa tü tsotho jüla kheti küsavü mühiera.

Jisu nüh Nyiri Hozake Sakümühiekütsü

(Mrk 1.29-31; Luk 4.38-41)

14Jüsevü Jisu tü Pitor azheh lovü tu ünü, Pitor anyitü mühi latajinü ngu. 15Thinü Jisu nüh ma ke pa ünü ma kümühiwa tü letewa, thi ma nüh süra tajinü kütsaküzhu küche taji mari tsü.

16Thi münüle ru ünü nyiri sietsekümüsüwa nüh mürü taji kütseri hozake sie ma vü ru, thinü ma nüh ma zhü vünüh sietse jüri zheja khehmütü, thi künari aveh sakümühie tsükheh. 17#Isa 53.4.Jütisanü khanavü Isaya setsaküthsüwa nüh, “Ma mpa hiri satsazüh küüchu mükümühieri thi künari aveh vi vümütüthuoh,” ta küüzawa sajutsü.

Jisu Sehnyi Zhütsari Thsoshi

(Luk 9.57-62)

18Jümasevü Jisu nüh nyiri shieji küsü ru ma mükieshe peküveh ngu ünü ma tü ma zhü tsü taji juküji küpawuo vü tewa nti sa. 19Jüti küsavü Wule küsosieri küsü ru taji ma vü, “Küsosiewa, noh nüh wuovüwuovü nga wa tü hi nga no senyiwa wie naveh,” ti küza.

20Thinü Jisu nüh ma vü, “Jiperü nga mari aku peveh, thi müwari nga aphra peveh, thitü anyi Tsawa thuoüji ma lü küüthipe nga münyie luo,” ti küza.

21Thinü ma sekünyiri küpa küsü nüh ma vü, “Vüwa, noh tü hi küze taji eh pa küüchowu khumüjie,” ti khuo.

22Thinü Jisu nüh ma vü, “Eh se nyi luo, thi aküsüri mpa mari kümo küüchowu mü luo,” ti küza.

Jisu nüh Mürhü Phraküüzohkümü

(Mrk 4.35-41; Luk 8.22-25)

23Jüti satajinü ma tü juhie lovü tetu ünü ma sehnyiritü ma se müzheh ru. 24Thinü halie, juküji vü mürhü khieloti mürhüterünü ajuküshü taji juhiewa müzhiewuotewa, thitü Jisu thuoüji zapewie. 25Thinü mari tü wa taji ma müchüke nü, “Vüwa, noh tü hiri rükietsüluo, hiri tü sümüna savehthuoh nü,” ti küza.

26Thinü ma nüh mari vü, “Halie, nohri kütsotü küzülari, nohri mokenüh krüveh lo?” ti satajinü ma tüsüra nü mürhü thi juküjiwa phra, thinü zomti petewa.

27Jütiküsavü nyiri nüh khieloti ngo tajinü, “Mürhü thi juküji tsatsawienga ma zhü künaküveh hatü moranyi thuoh lo?” ti phrate.

Jisu nüh Nyi Künyi vünüh Sietse Kümüsüwa Zheküja

(Mrk 5.11-20; Luk 8.26-29)

28Jüti satajinü ma tü azhie jüma kari tajinü anyu küpa Gadara ti küsa vü ru ünü sietse kümüsü nüh küprütekütse nyi künyi rüku lo vünüh shuru tajinü ma sie mütu, masü akhuke tü müsü sheh kümü kenüh nyi küsü nga ale jü wuo vü kükashukari küsa khomü. 29Thinü halie, masü tü zia tajinü, “Jisu, Saküüwuowa Tsa, noh tü hisü vü mowa sa nti tse lo? Tsotho müjieküju vünüh noh tü kümnomna vi hisü tsü nti tse ülo?” ti küza.

30Thinü awu kürefü küsü tü kületsuo zah vünüh ashie chütsa tse ünü, 31sietsekümüsüri nüh ma vü, “Noh tü hiri zhezhu nta thuoüji hiri zhezhu awu tumari aza vü küze luo,” ti khuo.

32Thinü ma nüh mari vü, “Shuwaluo,” ti küza ünü mari tü shutewa awu aza lovü tetu, thinü, halie, awu aveh rüshe taji pothuoh vü tewa nü ajuküji lovü tetu nü kürhothe khehmü.

33Thinü awu kühuori tü nyuküji vü zhüwa taji awuri momota samüthuoh nüh thi sietse kümüsüwa nüh mürütekütse künyi mota samüthuoh nüh aveh viküzakheh. 34Thinü halie, nyuküji jüla küperi aveh nüh Jisu siemütu nti shuhru, thinü mari tü ma ngu nü, mari anyu tsekari tewa üti ma vü khuo.

Currently Selected:

MATHI 8: POCHBSI

Highlight

Copy