MATHI 26

Jisu Lü vü Mükünongü Kümüshe

(Mrk 14.1-2; Luk 22.1-2; Jhn 11.45-53)

1Thinü Jisu nüh azhü jüri aveh küzaju kümüse vü ma nüh ma sehnyiri vü, 2#Tse 12.1-27. “Rülo künyi se vü tsekükari akhu kükhu na saküveh nohri nga thsülanathuoh, thi jüma tsotho vü Nyi Tsawa vi khieluothso rügi vünüh zekemü üta retsümunathuoh,” ti küza. 3Jütiküsa vü levü küjiri thi nyiri azhie vü kükhruori wa nü Kaifa ti küsa Levü Kümüsiewa zheh vünüh sehzhuh nü, 4Jisu re nü fethe na küsa kenüh kürüchie. 5Thitü mari nüh, “Akhu tsotho vü küsawa nyu, nyiri azhie vü küüjakünya shuteküru kükrü kenüh,” ti sa.

Bethani vünüh Vüjuh vi Jisu Küüne

(Mrk 14.3-9; Jhn 12.1-8)

6Thinü Jisu tü Bethani vü Simon wupiekünawa zheh vü wa pehküveh vü. 7#Luk 7.37,38. Nyimzari küsü vüjuh ame kükhra tsahtsah ku küsü vi ma vü ru nü ma tsazhu küpeh vü ma lü rügi vü züketsü. 8Thitü ma sehnyiri nüh jü nokürüpa taji, “Mokenüh zanyo ha zorie veh lo? 9Zanyo hatü ame hozake nüh zhu nü kümükhuori tsüra na nü,” ti küza. 10Thitü Jisu nüh jü thsü tajinü mari vü, nohri mokenüh nyimza hama saküjakünya veh lo? Ma tü hi vü zanyo kümühie satsüveh nü. 11#Kho 15.11. Küpakenühnyunü kümükhuori thuoüji nohri siepeh huo veh; thitü hi nü nohri sieküpehuowa nyu. 12Ma nüh vüjuh eh satsa vü küzüke hatü hi küchowu kenüh küche na küsawie. 13Hi nüh nohri vü küzatohke naveh, khiekhiela zhühlekümühie hama azhih aveh vü phrahte naveh nüh nyimza hama kürho müshe naküsa kenüh ma nüh küsa hama nga vi nü küza naveh.

Judas nüh Jisu Zhukütsa Ma Müsheküsa

(Mrk 14.10-11; Luk 22.3-6)

14Jütiküsa vü türakünyiri azhie vünüh nyi küsü Iskariot Judas ti küsawa nüh levü küjiri vü wa nü; 15#Zek 11.12. “Nohri mowa vi hi tsü naveh lo hi nüh ma re nohri ke vü thse thuoüji,” ti küna. Thinü mari nüh raka cherake chie nü ma tsü. 16Thi jü rülo vünüh tu vü ma tü Jisu re nü mari tsü nti lehkuji phah.

Jisu nüh Ma Sehnyiri Sie Tsekükari Shie Sie Kütsa

(Mrk 14.12-21; Luk 22.7-13,21-23; Jhn 13.21-30)

17Jüsevü ahzhi müthse nüh lohse kütsa khu rülo apowa vü ma sehnyiri Jisu vü ru nü, “Noh tü hiri khiela nüh tsekükari ashie küche nü noh küütsa noh kümüshe lo?” ti küna. 18Thinü ma nüh, nohri nyuküji vü wa nü nyi küsü vü, “Küsosiewa nüh e tsotho jumthuoh ünüh hi tü e sehnyiri sie noh zheh vünüh tsekükari khu kükhu nta lie ti küza luo,” ti küza. 19Thinü sehnyiri tü wa nü Jisu nüh mari vü küüza kümüjie sa, jütisanü tsekükari kenüh kütsaküzhuwa küche. 20Jütisanü arüza teru ünü ma sehnyi türakünyiri sie shupe nü ashietsa, 21thinü mari ashie tsapehküveh vü ma nüh, “Hi nüh nohri vü küzatohke naveh, nohri nyi küsü nüh hi retsü naveh,” ti küza. 22Thinü mari tü lorü sheh taji, Vüwa, jütü hi ülo? hi ülo? ti sa khe. 23#Krh 41.9. Thinü ma nüh, “Nyi küsü hi sie akhu küsü lovü nüh kürüwietsa küvehwa nüh hi retsü naveh,” ti küza. 24Nyi Tsawa thuoüji ma zhühku rhüküsa kümüjie tewa na savehthuoh; thitü Nyi Tsawa rekütsüwa nü amüngu kümüseri! anyi jüma tü azhih hala wuo müküruwa nüh ma kenüh küümpha naveh, ti küza. 25Jütiküsa vü ma retsü na küsawa Judas nüh ma vü, küsosiewa jümatü hi ülo? ti küna. Thinü ma nüh ma vü “ah wiethuoh,” ti küza.

Vüwa Kümüshieshie

(Mrk 14.22-26; Luk 22.14-20; 1 Kor 11.23-25)

26Thi mari ashietsapehküveh vünüh Jisu nüh lohse vi nü tsia jüma nyia vü thse taji zokhuo nü vi ma sehnyiri tsü taji, “Vi nü tsaluo; hamaha eh satsa wiethuoh,” ti küza. 27Jüma sevü ma nüh ahuowa nga vi taji tsia jüma nyia vü thse nü vi mari vü tsü taji, “Nohri aveh hama vi zhu luo; 28#Tse 24.8; Jer 31.31-34. küpakenühnyunü hama tü nyiri hozake kükhiemuo noja na küsa kenüh liküru kütsathuoh e zühwa wie thuoh. 29Thitü hi nüh nohri vü küza naveh, hi eh Pa Kajipe vünüh rhelivijuh kürüthe müjie küzhu sevü nü hi tü nosü nüh tuvü rhelivi thso hama vünüh müzhu lethuoh,” ti küza. 30Jütisanü mari aza küsü riehi nü Olive küzhiho vü tewa.

Pitor nüh Jisu Kürü na küsa Küütü vünüh Phrahtekütsü

(Mrk 14.27-31; Luk 22.31-34; Jhn 13.36-38)

31 # Zek 13.7. Thinü Jisu nüh mari vü, süta vü nohri aveh hi jamü tajinü zhütewa khe naveh, küpakenühnyunü zhütsazhü vü rhü küsa, “Hi nüh nyihzhükühuowa fethemü naveh, thi nyihzhüri tü vorietewa naveh,” ta küza saveh. 32#Mat 28.16. Thitü hi rhosheletesüra thuoüji nohri atüvü nüh hi tü Galilee vü tewa naveh, ti küza. 33Thinü Pitor nüh ma vü, “Mari aveh nüh no jamü nü tewa wieketünga hi nü no küjawa nyu,” ti küza. 34Thinü Jisu nüh ma vü, “Hi nüh noh vü küzatohke naveh, süta vü awi müjie kükhu atüvü noh küche keri hi kürü naveh,” ti küza. 35Thinü Pitor nüh ma vü, “Hi noh sie küüsü nta wie ketünga hi nüh noh küürüwa nyu,” ti küza le.

Thinü ma sekünyiri aveh nga jüüti phrahte khe.

Jisu Gethsemane vünüh Kükhuo Küsa

(Mrk 14.32-42; Luk 22.39-46)

36Jüsevü Jisu tü mari sie nü Gethsemane ti küsa azhie küsü vü wa nü ma nüh ma sehnyiri vü, “Hi wa tula nüh kükhuo sapehküveh vü nohri hala pehla luo,” ti küza. 37Jütisanü ma tü Pitor thi Zebedee tsa künyi sie wa nü ma lorü sheh thi ma luoveh küraküpre sheh. 38Jütiküsa vü ma nüh mari vü, “Eh luoveh küraküpre taji sü nta savehthuoh, nohri hala peh nü hi huo pehla luo,” ti küza. 39Jütisanü ma tü pike tsekewa nü ma nyia azhih vü lowe ünü kükhuo sataji, “Eh Pa, sara naveh üji ahuo hama tü hi küüthoriemümo; thitü eh müshe kümüjie vünüh nyu nü noh mpa noh müshe saluo,” ti küza. 40Jütisanü ma tü shele ma sehnyiri vü ru ünü mari zehküpehla ngu nü ma nüh Pitor vü, “Khielo, nohri münühu küsü nga hi huompehrawiethuoh ülo? 41Nohri kümüjimüra vü mütu nüh sana küsa kenüh zipeh luo thi kükhuo sa peh luo, sietse vü thuoüji sangü shehke pehveh thitü satsa wuovü thuoüji küchu pehveh,” ti küza. 42Jütisanü ma tü akünyiawa nga tsewa le kükhuo sataji, “Eh Pa, hi tü hama müzhu nüh mükulerawie thuoüji noh mpa noh müshe saluo,” ti küza le. 43Jütisanü ma tü shele ru ünü mari zehküpehla ngu le hü, küpakenühnyunü mari notha tü mükora nüh rühveh kümü kenüh. 44Jütisanü ma tü kücheawa mari jamü tajinü wa shientü kümüjie kükhuo sa le hü. 45Jüsevü ma tü ma sehnyiri vü ru nü mari vü, “Khinyi nü nohri zeh thi münyie luo; halie, tsotho jumthuoh, thi Nyi Tsawa tü re nü kükhiemuora ke vü thsemüna savehthuoh! 46Süraluo, hiri tewaluo nüh, hi re nü nyurake vü thsemüna küsawa shehnyi müthuoh,” ti küza.

Jisu Küre

(Mrk 14.43-50; Luk 22.47-53; Jhn 18.3-12)

47Thinü ma azhüküza pehküveh vünüh, halie, türakünyiri azhie vünüh nyi küsü Judas nüh levü küjiri thi kükhruori vünüh anyuchuwa thi athsofe küviri anyi shieji küsü sie nü ru. 48Jümatü vü ma re nü nyura kevü thsemü na küsa thsoshi küsü sa mari kütsanü, “Hi nüh thawa kümetsü naveh nüh jüma wiethuoh nüh ma re luo,” ti küza. 49Jütisanü ma shita Jisu vü ru nü, “Kümühiewa saluo Küsosiewa,” ti küza nü ma kümetsü. 50Thinü Jisu nüh ma vü, “Eh füwa, noh tü mokenüh hala tse lo? Noh nüh sa nti kütsewa sawie luo,” ti küza.

Thinü mari tü mari ke thsuoru nü Jisu shoh thi rete. 51Thi halie, Jisu se nyikütseri küsü nüh ma ke vitu ma nyusuowa shozhuru nü vi Levü Kümüsiewa siepe müwie ünü ma khüna taja mütü. 52Jütiküsa vü Jisu nüh ma vü, “Noh nyusuowa vi ma küthseku lovü thsemü luo, küpakenühnyunü anyusuowa küviri aveh thuoüji anyusuowa vünüh kümiewie naküveh kenüh. 53Noh kümüshe vü hi nüh eh Pa vü khuo thuoüji ma nüh khinyi wienga rügizhühleri anyie türakünyi nyia vü nga müküzera ti müsheveh ülo? 54Jüta sa nta thuoüji khiela nüh Zhütsazhüri tü sajura na lo?” ti küza. 55#Luk 19.47; 21.37. Jütiküsa vü Jisu nüh anyi riekhuowa vü, “Nohri tü rühukütsari küre kümüjie anyusuowa thi athsofe vi nü hi re nti tse la? Hi nüh rülotsotho Kükhurüzhe lovü peh nü nyuri sosie pehwie ketünga jü vünü nohri tü hi müre. 56Thitü Zhütsazhüri setsaküthsüri nüh rhüke küsari ju na küsa kenüh hakümjie küsa kheh wie,” ti küza.

Thinü ma sehnyiri aveh tü ma jamü tajinü zhütewa khe.

Müzakümühu atü vünüh Jisu Küüna

(Mrk 14.53-65; Luk 22.54-55,63-71; Jhn 18.13,14,19-24)

57Thi Jisu rekütseri tü Jisu re Levü Kümüsiewa Kaifa azheh vü tewa; jüla tü Khonyo küsosieri thi kükhruori wa sehzhuh pehlakhe. 58Thinü Pitor tü ma mphakewiethuoh nüh ma se nyi müzhehwa Levü Kümüsiewa nyula vü ju, jüütisanü mowa sanaveh nüh ti no nti tu ariekühuori vü nyipeh. 59Jütiküsa vü levü küjiri thi kümühu aveh nüh Jisu küfethe lehkhuji müküle povü hozake phah, 60thi küzhühja povü hozake ruthuoh tü azhü kükato küsü nga mphahra nüh samü. Ase vünüh nyi künyi rutajinü, 61#Jhn 2.19. “Nyi hamatü khana, ‘hi nüh Saküüwuowa Kükhurüzhewa phrümü tajinü rülo küche vünüh sa lera naveh’ ta küza lie,” ti küza. 62Thinü Levü Kümüsiewa nüh süra tsie nü ma vü, “Noh tü zhühnyo küsü nga rületsü nti samüvehwiethuoh ülo? Hamari nüh mowa küza nü no müte veh lo?” ti küza. 63Thitü Jisu tü zoti pehtewa. Thinü Levü Kümüsiewa nüh ma vü, “Hi nüh rhopeh huoküvehwa Saküüwuowa nyo vü nüh no küüshie nü küza naveh, noh tü Saküüwuowa Tsa Khrista ünü nyu? Vi hiri vü küza luo,” ti khuo. 64#Dan 7.13. Thinü Jisu nüh ma vü, “Noh nüh küüza kümüjie wiethuoh, thitü hi nüh nohri vü küzatohke naveh, thuohtüvü nohri Nyi Tsawa Kükhrawa zhie wuovü küpeh thi rügivü külu rügi vünüh küru ngu naveh,” ti rületsü. 65#Lev 24.16. Thinü Levü Kümüsiewa nüh ma thsümünyi zokhri nü, “Ma tü Saküüwuowa küüjo zhü phrahtemüthuoh; hiri tü povü küpa phah le mowa sanathuoh lo? Halie, nohri mpa nga ma nüh Saküüwuowa küüjo zhü thsürathuoh nü. 66Nohri tü mowa müshe veh lo?” ti küna. 67#Isa 50.6. Thinü mari tü ma nyia vü mütse müshüke nü ake shekürülo nü ma toh, thi wuori nüh amüza nüh ma je nü, 68ma vü, “Messiah, thawa nüh no fe nüh setsaküthsüzhü vünüh hiri vü küza luo,” ti küza.

Pitor nüh Jisu Küürü

(Mrk 14.66-72; Luk 22.56-62; Jhn 18.15-18,25-27)

69Jütiküsavü Pitor tü nyula vü pehveh ünü rülari küsü ma vü ru nü, “Noh nga Galilee wa Jisu sietse ah,” ti küna. 70Thitü ma nüh mari avehveh atüvü nüh nyu ti sanü, “Hi nü noh zhü müthsü,” ti küza. 71Jütisanü ma tü tse awiepa vü khru ünü rüla küpa küsü nüh ma ngu nü jüla kütsieri vü, “Nyi hama nga khanavü Jisu Nazareth sietsewie,” ti küza. 72Thitü ma nüh nyuwie ti sanü küshie taji, “Hi nü nyi jüma müthsü,” ti küza. 73Jüsevü nga jüla tsieküveh wuori ru nü Pitor vü, “Noh nga anyi jüma refü küsütsahwiethuoh, noh zhü vünüh thsüramüwiethuoh,” ti küza. 74Thinü ma tü küshiephokewie tajinü, “Hi nü anyi jüma müthsüwie,” ti küza le.

Jütiküsa vü müküzhikewiethuoh nü awi khuteru. 75Jüsevünüh Pitor tü Jisu nüh ma vü, noh awi kükhu atüvü küchekeri hi kürü naveh ti küsa azhüwa müshekera. Jütiküsa vü ma tü anyula vü wa nü khielo ti krie.

Currently Selected:

MATHI 26: POCHBSI

Highlight

Copy