MATHI 25

Rülari Türake Vi Küzhühie

1 # Luk 12.35. Jüsevü nga rügi kajipe thuoüji rülari türake anyihku vi nü kümünyutepawa siemütu nta küwa viküzhühiera naveh. 2Thi jüla mari münga thuoüji aro müthsü, thitü mari münga thuoüji aro mühie. 3Jütiküsavü aro müküthsüri tü mari nyihku küvi vü nyihjuh müvipheh nüh samü; 4thitü aro kümühie müngari thuoüji nyihjuh nga küütsa thi mari nyihku ti vi nü wa. 5Jütisanü kümünyutepawa münü ru ünü mari aveh küngu nü zehtewa. 6Thitü tsotüla vü zia taji, “Halie, kümünyutepawa tü tsethuoh, nohri ra nü ma mütu luo,” ti sa ru. 7Thinü rüla jümari aveh süra nü mari nyihkuri küche. 8Thinü aro müküthsüri nüh aro kümühieri vü, “Hiri nga nyihjuh tsü jie, küpakenühnyunü hiri nyihku tü kuonetewathuoh ünüh,” ti khuo. 9Thitü aro kümühieri nüh, “Jüüta thuoüji nohri nga hiri nga mütse nüh samü naveh, jükenüh nohri mpa wa nü küzhuri vünüh küsü nüh küümpha naveh,” ti küza. 10Jütiküsavü mari tü sü nti wa ünü kümünyutepawa tü teru nü kücheküsari sie nü kümünyute kütsazhu vü tewa; jütisanü mükhie kheketewa. 11#Luk 13.25. Jümasevü nüh rüla mari münga nga ru nü, vüwa, vüwa, mükhie sanü hiri tsüjie, ti khuo. 12Thitü ma nüh, “Hi nüh nohri vü küzatohke naveh, hi nü nohri müthsü,” ti küza. 13Jükenüh nohri huopehwie luo, nohri tü ma rülo nyutü tsothowa müküthsü kenüh.

Siepe Küche vi Küzhühie

(Luk 19.11-27)

14 # Luk 19.11-27. Jümpa mükünyu rügi Kajipe thuoüji nyi küsü nüh anyu lehküsuo küpa vü wa nti ma sieperi ji nü ma zanyori vi vü mari ke vü tsotü küsa kümüjie wiethuoh. 15Jütisanü mari papa küsara noh nü ame münga vi nyi küsü tsü, küpawa vü künyi, thi küpa küsüwa vü küsü vi ma tsü, jütisanü ma tü tsetewa. 16Jütiküsa vü ame münga künguwa tü müküzhikewiethuoh nüh viwa asü sanü ame azakütsa küpa münga nyiara. 17Thi jükümjie künyi küngurawa nga küpa künyi nyiara. 18Thitü küsü künguwa thuoüji wa azhih lovü chüke nü ma vüwa raka vi nü küthisamü. 19Thinü mari vüwa tü tsotho küsuo sevü nüh shele ru nü mari amewa mari sie kürüh nti sa. 20Jütiküsavü ame münga künguwa tü ame münga küpa azakütsa vipheru nü, “Vüwa, noh nüh ame münga vi eh kevü thse, thi halie, hi nüh ame küpa münga nyiarathuoh,” ti küza. 21Thinü ma vüwa nüh ma vü, “Mühie shehthuoh, noh tü siepe kümühie künyitsa küsü; noh tü zanyo pike vü nga nyitsarathuoh, hi nüh noh zanyo hozake nyia vü küji küüsa naveh; noh vüwa vü ra nyi lozheluo,” ti küza. 22Thi ame künyi küngurawa nga ru nü, “Vüwa, noh nüh ame künyi vi eh ke vü thse, thi halie, ame küpa künyi nyierathuoh,” ti küza. 23Thinü ma vüwa nüh ma vü, “Mühieshehthuoh, noh tü siepe kümühie künyitsa küsü, noh tü zanyo pike vü nga nyitsarathuoh, hi nüh noh vi zanyo hozake nyia vü küji küüsanaveh, noh vüwa vü ra nyi lozheluo,” ti küza. 24Thinü ame küsü künguwa nga ru nü, “Vüwa, noh tü anyi luoveh kükho nyi küsü, noh tü noh nüh mahtsü vüwa müküzhuhri vü nga mahwiewie ti, thi noh nüh we müküsari vü nga zhievü vü ti, 25jükenüh hi tü krü nü noh nüh ame küsü kütsüwa viwa nü azhih lovü küthi sanü halie noh nüh kütsüwa tü,” ti küza. 26Thinü ma vüwa nüh ma vü, noh khuke kümüsü küüchu siepewa, hi nüh mahtsü vüwa müküzhuhri vü mawiewie ti ta küsa, thi hi nüh we müküsari vü nga zhievü vü ti küza nti la? 27Noh tü ame künari vü tsüküsaleh thi hi küru vü ame thi ma zahkütsa nga küngule nü. 28Jükenüh ame ma ke vü pehküvehwa viwa nü ame türake viküvehwa tsümü luo. 29#Mat 13.12; Mrk 4.25; Luk 8.18. Küpakenühnyunü nyi küsüküsü nga aküpehwa thuoüji thsephe tsü naveh, thi ma tü hozake pehra naveh; thitü mükünyiewa vü thuoüji ma ke vü pike küpehri nga vitewa naveh. 30#Mat 8.12; 22.13; Luk 13.28. Thi siepe ame mükünyiewa alie aküzo vü shojamü luo, jüla nüh krie; thi aha hari peh naveh.

Ashih Sehkhewa

31 # Mat 16.27; Mat 19.28. Thitü Nyi Tsawa küthohlathovü sanü rügizhühleri aveh sie nü ru naveh, thi jüvü ma tü ma kajipe küthohlathovü rügi vü peh naveh. 32Thi ma tüvü akuoh aveh ru sehzhuh naveh, jüti sanü nyihzhükühuowa nüh nyihzhü aza vünüh nyihsü chithuohzhukümü kümüjie ma nüh mari küsü nüh küsü vünüh chithuoh küpamü naveh. 33Jütisanü ma nüh nyihzhüri vi ma zhie wuovü küpeh naveh, thitü nyihsüri thuoüji vi ma zhu wuovü küzemü naveh. 34Jütiküsa vü Kajiwa nüh ma zhie wuovü küpehri vü, raluo, eh Pa nüh tsia tsüküsari, azhih küsate vünüh nohri kenüh kücheküsari vü ra avü saluo. 35Küpakenühnyunü hi rüma nü tse ünü ashie vi hi tsü, hi jühkürie nü tse ünü hi küzhu, hi tü küzehri satse ünü nohri nüh hi sieküzeh; 36müsühsüh tse ünü nohri nüh athsü vi kümphie; hi na zehveh ünü nohri nüh hi roza, hi tü küsi satse ünü nohri nüh hi vü ru. 37Jütiküsa vü künyitsari nüh ma vü, “Vüwa, hiri tü küsie noh rüma kütse ngu nü ashie vi noh tsü lo? Nyutü no juhkürie kütse ngu nü ajuh vi no tsü küüzhu lo? 38Thi hiri tü küsie noh aküzeh sakütse ngu nü noh sie küzeh lo? Nyutü noh müsühsüh kütse ngu nü athsü vi noh kümphie lo? 39Thi hiri küsie noh na zehla nü noh roza lo? Thi küsi sala nü noh vü ru lo?” ti sanaveh. 40Jütiküsa vü Kajiwa nüh hakümjie rüle naveh, “Hi nüh nohri vü küzatohke naveh, nohri nüh anyi küriepetsa hamari vü sakütsü tü hi vü sakütsü kümüjie wiethuoh,” ta küza naveh. 41Jütisanü ma nüh ma zhu wuovü küpehri vü, “Nohri müzükümüri, hi vünüh kietuo Tsuore thi ma sehnyiri kenüh kücheküsa küsuokürho nyihsuozü vü tewaluo. 42Küpakenühnyunü hi rüma kütse vü zanyoküsü nga vi hi mükütsa; hi juhkürie kütsevü pike nga juh vi hi müküzhu; 43hi küzehri sakütse vü nohri tü hi sie müküzeh; müsühsüh tse ünü athsü vi hi müküümphie, hi tü na; thi küsi satsewie ketünga ru hi müno,” ta küza naveh. 44“Jütiküsa vü mari nga rüle naveh, Vüwa, noh tü küsie rüma, thi kürie tse taji thi aküzeh sakütse; thi rütso kütse thi nazeh küveh thi küsi saküveh ngu nü hiri tü noh müno nüh samüthuoh lo?” ta sanaveh. 45Jütiküsa vü, ma nüh mari vü rüle nü, “Hi nüh nohri vü küzatohke naveh, nohri nüh hamari azhie vü küzahtsahwa vü müküsa kümüjie hi vü nga müsawiethuoh” ti sa naveh. 46#Dan 12.2. Thi mari thuoüji küsuokürho kümnomna pe vü tewanathuoh, thitü künyitsari thuoüji küsuokürho ape vü tewa nathuoh, ti küza.

Currently Selected:

MATHI 25: POCHBSI

Highlight

Copy