MATHI 27
27
Jisu Re nü Pilate Tüvü Tsükümü
(Mrk 15.1; Luk 23.1-2; Jhn 18.28-32)
1Jüsevü thoru ünü levü küjiri aveh thi nyiri azhie vü sierhüri aveh Jisu fethemüluo nti ru nü kürüchie; 2jütisanü mari tü ma pheh tajinü ma sie Pilate küjiwa ake vü tsümü.
Judas Küsü
(Krr 1.18-19)
3 #
Krr 1.18,19. Jütiküsa vü ma re nü nyurake vü thsekümüwa Judas tü Jisu müshemüsü kümü küthsüra vü ma luoveh nanü raka cherakewa visheleru levü küjiri thi kükhruori vü tsüle taji, 4“Hi nüh müküle müküsa azüh zhutsaküveh hi tü khiemuomüthuoh,” ti küza.
Thitü mari nüh, “Hiri wuovü nü mowa lo? Noh mpa müsheluo,” ti küza.
5Jütisanü ma nüh arakari Kükhurüzhe lovü vehjakemü tajinü tewa; thi wa nü ma mpa huthuohmü.
6Thinü levü küjiri nüh raka jüri vi tajinü, “Hatü azühme wiethuoh jükenüh rakaku lovü thse küsa Khonyo nyuthuoh,” ti küza. 7Jütisanü mari kürüchie nü raka jüri vi nü Küfüküsara Zhuh sü nü jüla nüh küzehri chowuwu ti sa. 8Jükenüh nosü küju wienga azhuh jüma tü “Azüh Zhuh” ta satse wieveh.
9 #
Zek 11.12,13. Jümatü khana Jeremia setsaküthsüwa nüh küüzawa küsajuwiethuoh; ma nüh küüza, mari nüh raka cherake vima me Israelri nüh ma kenüh tsü nta saküsa, 10Vüwa nüh hi vü küüza kümüjie, “Mari nüh raka jüri vi küfüküsawa zhuh sü,” ta küza saveh.
Pilate nüh Jisu Küüna
(Mrk 15.2-5; Luk 23.3-5; Jhn 18.33-38)
11Jütiküsavü Jisu tü wa küjiwa tüvü tsie nü küjiwa nüh ma vü, “Noh tü Judahri kajiwa wiethuoh ülo?” ti küna.
Thinü Jisu nüh ma vü, “Ah wiethuoh,” ti rületsü. 12Thitü levü küjiri thi kükhruori nüh ma müshemüsü kümü kenüh ma tü zanyo küsü nga rülemütsü nüh samü.
13Jütiküsa vü Pilate nüh ma vü, “Mari nüh no vü küzakele phrahteveh nüh noh tü mükünara ülo?” ti küna.
14Thitü ma tü rüle kütsü zanyoküsü nga müsa le wie, jükenüh küjiwa tü ma ngo sheh.
Jisu Zekemüluo üta Zhütsükümü
(Mat 15.6-15; Luk 23.13-25; Jhn 18.39—19.16)
15Thi akhu jüla küji jümawa nüh nyiri küsi saküveh nyiküsü ma müshewa vi anyi riekhuowa kütsüra rühlepehveh. 16Thi jütiküsa tsotho vü Barabas ti küsa küsi saküvehnyiri nüh küthsü küsü pehveh. 17Jükenüh mari wa küserü vü Pilate nüh mari vü, “Hi nüh khiemawa vi nohri kütsü nohri kümüshe lo? Barabas naveh ünü Jisu Khrista ti küsawa na lo?” ti küna. 18Küpakenühnyunü mari tü ma noküüjizhi vünüh ma vi ma ke vü thseküsa kenüh.
19Thinü ma tü ashihküsape rügi vü pehküveh vünüh ma vüvüh nüh ma vü azhü küze tajinü, “Noh tü nyikünyitsa hamawa vü zanyoküsü nga müsatümü luo, küpakenühnyunü küza hi tü e mo vünüh ma kenüh münomüna shehthuoh,” ti küza.
20Thitü levü küjiri thi kükhruori nüh Barabas khuo thi Jisu fethemü üti nyi riekhuowa küchü. 21Thitü küjiwa nüh shele mari vü, “Hi nüh hamasü khiemawa vi nohri kütsü nohri müshe lo?” ti küna le.
Thinü mari nüh, “Barabas tsüluo,” ti khuo.
22Pilate nüh mari vü, “Thinü hi tü Jisu Khrista ti küjiwa vi mowa sa üti lo?” ti küna. Thinü mari aveh nüh, “Ma vikhieluothso rügi vünüh zekemü luo,” ti küza.
23Thinü ma nüh, “Mokenüh na lo? Ma tü zanyokümüsü mowa samü lo?” ti küna.
Thitü mari tü khielo ti zia taji, “Ma vi khieluothso vünüh zekemü luo,” ti küza.
24 #
Kho 21.6-9. Jüti küsavü Pilate tü zanyo saküümühiera nyu nü küüjakünya küzhiküzhi tekütsethuoh kenüh ma tü nyiri atüvü nüh ajuh vi ma ke mütso taji, “Nyi hama züh kenüh nü hi nü zanyo küsü nga kümüsü küsawanyu, nohri mpa noluo,” ti küza.
25Thinü nyiri aveh nüh, “Ma züh tü ma mpa hiri lü vünga thi hiri tsari lü vü nga küürumü luo,” ti küza.
26Thinü ma nüh Barabas vi mari tsümü thi ma tü alikümülah nüh vi Jisu fetsü nü viwa khieluothso rügivünüh zekemü üti mari ke vü tsümü.
Rienyiri nüh Jisu vi Kümürümüle
(Mrk 15.16-20; Jhn 19.2-3)
27Jütiküsa vü Pilate rienyiri nüh Jisu sie müzape lovü tu nü rienyiri riekhuowa aveh ru ma mükieshe. 28Jütisanü mari nüh ma thsümünyi phrehmütü taji nü athsü küsümo küsü vi ma küüzhu. 29Thi mari nüh kaji lüwe kümüjie küsa küsü rüzhünüh to taji vi ma lü rügivü thse thi amüshüh küsü vi ma ke azhie wuovü tsü, jütisanü mari tü künyiatsuo ma tüvü khotsü nü ma müküchie sanü, “Judahri Kajiwa, Küsuo kürhowa saluo,” ti sa. 30Jütisanü mari tü ma vü mütse müshüke thi amüshüh ma ke vü pehküvehwa vi nü ma lü kürhietsü. 31Thi mari ma vi mürümüle kümüse vü ma vünüh thsümünyi fomütü nü ma mpa ma thsümünyiri küvüle taji khieluothso vünüh ma zekemüluo nti ma sho nü tewa.
Jisu Zekekümü
(Mrk 15.21-32; Luk 23.26-43; Jhn 19.17-27)
32Jüti sataji nü mari tsezhu wa ünü Simon ti küsa Sairenri küsü mütu, thinü mari nüh wurie nü Jisu khieluothso ma küükha. 33Jütisanü mari tse Golgotha, mazhühnyo thuoüji “Lürü Zhie” ti küsa küsü vü ju. 34#Krh 69.21.Thinü mari nüh rhelivijuh thi kükhajuh masü sarü nü vi ma küüzhu, thitü ma nüh jü mpono nü müzhu nüh samü.
35 #
Krh 22.18. Jüti sataji mari nüh ma zekemü nü ma thsümünyi vi aküze sanü mari mpa küsuomü. 36Jütisanü mari tü jüla peh nü ma huopeh. 37Jü mpa mükünyu mari tü ma müshekümüsü zhü malü rügi vü rhüke taji, “Hamaha Judahri Kajiwa Jisu,” ti küsa rhüke sa. 38Thi rühukütsari nyi künyi nga: nyi küsü ma zhiewuovü thi nyi küsü ma; zhu wuovü ti ma sie zeke.
39Jütiküsa vü aleh vü kütsuokükhru küsari nüh mari alü küngo nü ma riesa taji, 40#Mat 26.61; Jhn 2.19.“Noh Kükhurüzhe sakümüsümü nü rülo küche azhie vünüh sara nata küsawa; noh mpa no külole luo, noh tü Saküüwuowa Tsa thuoüji khieluothso rügi vünüh turuluo,” ti küza.
41Jükümjie levü küjiri nga, Khonyo küsosieri thi kükhruori sie ma riesanü, 42ma tü nyi küpari nü külole thitü ma mpa ma nü mükülolera, ma tü Israelri kajiwa thuoh nü khieluothso rügi vünüh küüturu luo, jüüta thuoüji hiri nga ma tsotüra naveh. 43Ma tü Saküüwuowa tsotü veh, Saküüwuowa nüh ma kümüshe thuoüji ma nüh khinyi ma küülole luo, ma nüh, “Hi tü Saküüwuowa Tsa wiethuoh ta satsetseti nü,” ti küza.
44Mari mpa mükünyu rühukütsa ma sie küzeke künyi nga azhü jükümjie vi nü ma phrakümüsü.
Jisu Sükümü
(Mrk 15.33-41; Luk 23.44-49; Jhn 19.28-30)
45Thinü münühu küche küju azhie jüla aveh tü zomthsüthsü tewa. 46#Krh 22.1.Thi bafe küche kümüjie küsa vü Jisu zia rera nü, “Eloi, Eloi, lama sabakthani,” mazhühnyo, “Hi Saküüwuowa, Hi Saküüwuowa, no mokenüh hi jamüthuoh lo?” ti küza.
47Thinü jüla tsie küveh wuori nüh azhü jü thsü taji, “Nyi hama tü Elijah jivehthuoh,” ti küza. 48#Krh 69.21.Thinü nyi küsü tü zhüwa achieshu vi rhelivijuh lovü tehke nü vi amühshüh lovü toke taji vi ma kümüpo.
49Thitü nyi küpari nüh, “Pehlachi, Elijah ru ma külole na ünü nyu nüh nolano,” ti küza.
50Jisu nüh zia le taji ma rüthoküsa sehkhe saküzemü.
51 #
Tse 26.31-33. Thinü halie, Kükhurüzhe vü athsüthuoh küsawa ma lüvü nüh kriwa ma jih ju nü kükri künyi sa kritewa; thi amükhrü nga küzhüh, thi alohri nga kuoriekuorietewa. 52Thi rüku nga pie teru khe, thi kümtseri sü zehküvehri kümo hozake rhoküüsüra. 53Jütisanü jümari tü mari rüku lovü nüh shuru taji Jisu rhoküsüra ase vünüh mari tü Kümtse Nyuküjiwa vü wa nü nyiri hozake nüh mari ngu.
54Jütiküsa vü müzake nyia nüh küjiwa thi ma sie Jisu rüku huoküvehri nüh mükhrüküüzhüh thi momowa sanüh jüri küngu vü mari tü ngo sheh, thi mari nüh küüza, “Hama tü Saküüwuowa Tsa tsah wiethuoh,” ti küza.
55 #
Luk 8.2,3. Thi Galilee vünüh Jisu asenyi nü ma kükra kütse nyimzari hozake kületsuo vü tsie nü no pehveh. 56Thi jümari azhie nüh Magdalene Maria, thi Jems thi Josef masü aza Maria, thi Zebedee tsa künyi aza nga nyi tsieveh.
Jisu Küchowu
(Mrk 15.42-47; Luk 23.50-56; Jhn 19.38-42)
57Jütiküsa vü münüleh teru ünü Arimathea vünüh küru küsüma nyo Josef ti küsa künyirhieri küsüma nga khanavü Jisu sehnyiri küsü sa ru. 58Ma tü Pilate vü wa nü Jisu kümo khuo. Thinü Pilate nüh tsümü üti azhütsü. 59Jütisanü Josef nüh ma kümo viwa alo külohzü nüh kütothsü kümtse küsü vi nü küzhu. 60Jütisanü vi ma mpa ma rüku kürüthe küsü khana aloh küsü phieke küsa lovü thsemü, thi aloh küji küsü küpriru küpiewa mürhetemü nü tewa. 61Thinü Maria Magdalene, thi Maria küpavühwa nga wa nü rüku küwiejie wuovü shupe.
Riehuori nüh Rüküwa Huoküüpe
62Jütisanü rülo künyiawa zanyoküüche rülo asevü levü kükhruori thi Farisiri tü kürü Pilate vü wa nü, 63#Mat 16.21; 17.23; 20.19; Mrk 8.31; 9.31; 10.33,34; Luk 9.22; 18.31-33.küjiwa, nyuri mürakütsewa hama tü ma rhoküvehvü, “Hitü rülo küche asevü rhosheletewa naveh,” ta küsa azhü hiri tü müshekerathuoh. 64Jükenüh rülo küche küju ma rükuwa kümühie ti huoküüpeh azhü tsüjie, ma sehnyiri ru ma kümorühutewa taji nyiri vü, ma tü aküsü vünüh rhosheletewathuoh, ta küsa nga müthsü, jüütathuoüji küüjakünya tü atükhu nyia vünüh ase vünüh küümüsü sanaveh, ti küza.
65Thinü Pilate nüh mari vü, “Riehuo ji tajinü nohri mpa küsakümhie sanü kümühieti saluo,” ti küza.
66Thinü mari wa nü rükuwa zephohkemü taji riehuori sanü kümühie ti huoküüpehmü.
Currently Selected:
MATHI 27: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
