MATHI 21

Jisu Kütholathovü sa Jerusalem vü Kütu

(Mrk 11.1-11; Luk 19.28-40; Jhn 12.12-19)

1Jütisanü mari Jerusalem shenyi ru ünü tse Olive küzhiho rügivü Bethfage vü ru, thinü Jisu nüh ma sehnyi nyi künyi atüvü küze, 2jütisanü masü vü, nohsü tse anyu nosü atüvü peküvehvü waluo; thi wajura thuoüji nyuri nüh rawuküzawa avüh küsü thi ma tsa; ti hute küsala ngu naveh nüh jümasü le taji hi vü sie ru luo. 3Thi nyuri nüh nosü vü azhü küza thuoüji; “Vüwa nüh hamasü müviji mümühie nüh saveh lie, ma nüh masü küze mülewie nata,” ti nosü nüh küza luo, jütathuoüji tsü naveh nüh, ti küza. 4Hama tü küpakenühnyunü, thitü setsaküthsüwa nüh küza küsa:

5 # Zek 9.9. “Nohri wa Zion atsa rülawa vü küza luo, halie,

noh Kajiwa tü ma khuke mühie nü rawu küzawa avüh küsü,

mazhünyo arawuh küzawa rügivü peh nü noh vü tse nüh,

ta küsa zhüwa ju na küsa kenüh jüta küsa wie,” ti küza.

6Thinü ma sehnyi jümasü tü wa nü Jisu nüh masü vü küüza kümüjie sa. 7Jütisanü masü tü rawu küza avühwa thi ma tsawa shoru tajinü mari tü rawu künyi rügivü athsü shieke taji ma jürü givü kuo küshupe. 8Thi anyi riekhuowa aküzhi vünüh athsü vi lekhuji vü shieketü; thi wuori thuoüji athso vünüh ma tsuonari zahru lekhujivü shieketü. 9#Krh 118.25,26. Jütisanü nyiri ma tüvü kütseri thi ma se vü kütseri zia taji, “Hosanna, David Tsa tü kükhrarawa saluo; Vüwa nyo vi kütsewa kümüngatsawa, Hosanna kürügitsawa,” ti zia. 10Thinü ma Jerusalem vü ru ünü nyuküji jüla aveh künga taji, “Hatü thawa thuoh lo?” ti sa. 11Thinü nyi riekhuowa nüh, “Hama tü Galilee azhih vü Nazareth setsaküthsüwa Jisu wiethuoh,” ti küza.

Jisu nüh Kükhurüzhe vü asü saküvehri zheküja

(Mrk 11.15-19; Luk 19.45-48; Jhn 2.13-22)

12Jümasevü Jisu tü Saküüwuowa Kükhurüzhe#21.12 Kükhurüzhe: Nazizheh nyutü Kümhuzhe mari zarike kümjie wiethuoh. lovü tu ünü kükhurüzhuh lovü zanyo sü thi zanyo zhuküperi aveh zhejamü, thi raka müzhi küvehri zanyo küsape nga thi mükhrietü zhuküperi ape nga khajakhehmütü. 13#Isa 56.7; Jer 7.11. Jütisanü ma nüh mari vü, “Eh zhe tü kükhuozhe ti sa naveh, ta küsa rhüsawie veh, thitü nohri nüh hama vi rühukütsara zheh samütü thuoh,” ti küza. 14Jütiküsavü nothaküüjuri thi jiküjiri Kükhurüzhe vü tse ma vü ru; thi ma nüh jümari sakümühie tsü kheh. 15Thitü kükhruoküjiri thi Wule küsosieri tü ma nüh sakütsü küngo küürori, thi rünguori Kükhurüzhe vünüh zia taji; David Tsa Hosanna ti sakütseri nga ngu nü mari luoveh mütho nü mari nüh ma vü, 16“Noh tü hamari nüh mowa küza tseveh nüh künara veh ünü nyu lo?” ti küna.

Thinü Jisu nüh mari vü, “Ah, rünguori thi kürünyiri apo vünüh nga noh küsiake sajuwie naveh; ta küsa nohri khanavü zanyoküsü nga müchiewie ülo?” ti küza. 17Jütisanü ma tü mari jamünü nyuküji jüla nüh tse Bethani vü tewa nü jü rüza jüla zetewa.

Jisu nüh Jichuorhu Müzükümü

(Mrk 11.12-14,20-24)

18Jümasevü rüne vü ma tü nyuküji jüla shele tse ünü ma vo rüma tewa. 19Thi lekhuji natovü jichuo rhu küsü küpela ngura nü tse jüma kütuovü wa thinü manyawa küchie nüh zanyoküsü nga mpehla nüh sa, thinü ma nüh jichuorhuwa vü, “Nohsü nüh tuvü küsuokürho noh vünüh noh vi küsü nga müküthuoh tümü luo,” ti küza. Thi jüti kephratethuoh nüh jichuo rhu wa tü wazhütewa. 20Thinü ma sehnyiri nüh jü ngu tajinü, “Jichuo rhu wa tü mokenüh shita wazhütewa thuoh lo?” ti phrate. 21#Mat 17.20; 1 Kor 13.2. Thinü Jisu nüh mari vü, hi nüh nohri vü küzatoke naveh, nohri luoveh künyi müsanüh kütsotü peh tsathuoüji, nohri tü jichuo rhu vü hakümjie küsara mpa nyu nü thitü nohri küzhiho hama vü nga, “Noh hala nüh tse juküji lovü tetu luo,” ta wie ketünga jüwienga sarawie naveh. 22Jümpa mükünyu nohri nüh tsotü phake nü zanyo küsüküsü nga khuo thuoüji ngurawie naveh, ti küza.

Jisu Kükhra Küüna

(Mrk 11.27-33; Luk 20.1-8)

23Jümasevü Jisu tü Kükhurüzhe lovü tu nü nyuri sosie peküvehvü kükhruo küjiri thi nyiri azhie vü sierhüri ma vü ru nü, “Noh tü mowa kükhra vi nü zanyo hari satse veh lo? Thi thawa nüh kükhra hama vi no tsü lo?” ti küna. 24Thinü Jisu nüh mari vü, “Hi nga nohri vü zanyoküsü küna naveh, nohri nüh jüma hi vü küza thuoüji hi nga nohri vü hi tü mowa kükhra vünüh zanyo hamari satse nüh küza naveh. 25Johan Baptist tü khievünüh ru lo? Rügi vünüh ru ünü nyiri vünüh ru lo?” ti küna. Thinü mari mpa kürüchie nü, rügi vünüh ti hiri nüh küza nti ünü ma nüh, thinü mokenüh ma mütsotü lo, ta küza naveh. 26Thi nyiri vünüh ru ti hiri nüh küza nti ünü nyi riekhuowa krü, küpakenühnyunü nyiri aveh nüh Johan tü setsaküthsüwa ta satetsewiethuoh. 27Jüti sape nü mari nüh Jisu vü, “Hiri nü müthsü,” ti küza. Thinü ma nga mari vü, “Hi nga mowa kükhra vi nü zanyo hari satseveh nüh nohri vü küüzawa nyuthuoh,” ti küza.

Atsa Künyi vi Küzhühie

28Nohri tü mowa müshe veh lo? Nyi küsü ma tsa nyimpari künyi peh; thi ma tü ma tsa kükhruowa vü ru nü, “Eh tsa no nosü wa nü rhelivi zhuh vü küüro saluo,” ti küza. 29Thinü Ma nüh, “Hi nü müwara,” ti rületsü; thitü asevü nüh ma luoveh khaphrü le nü wa. 30Jüsevü ma tü atsa kürünguowa vü wa taji jükümjie küza, thinü ma nüh, “Nyia, eh pa wa naveh,” ti küza, thitü ma tü müwa nüh samü. 31Thinü jüma masü khiemawa nüh ma pa külo sa lo? ti küna.

Thinü mari nüh, “Apowa wiethuoh,” ti küza.

Thinü Jisu nüh mari vü, “Hi nüh nohri vü küzatoke naveh, atheküviri nüh thi küüphroküphrievühri nüh nohri atüvü apo sa Saküüwuowa kajipe lovü tu naveh. 32#Luk 3.12; 7.29,30. Küpakenühnyunü Johan tü künyitsa lekhujiwa müzhe nü nohri vü ru, thitü nohri nüh ma mütsotü nüh samü, thitü atheküviri thi küüphroküphrievühri ma tsotüra thi nohri tü jü nguwie ketünga asevü nga nohri luoveh tsaza taji kükhaphrü müsa,” ti küza.

Zhuhküürori Khukekümüsü Kürefü Küsü vi Küzhühie

(Mrk 12.1-12; Luk 20.9-19)

33 # Isa 5.1,2. Küüzhühie zhü küpa küna lehü luo, khanavü nyi küsü nüh ma rhelivizhuh küsü tsa, thi arüpe sa jüma mükieshe, jütisanü rheliviju kütsüzhu kenüh azhih küsü phieke, jütisanü azie küsü jüke taji vi azhu küüro wuori tsotü münü tse anyu aleküsuo vü tewa. 34Jütisanü ma küüro avi küpe tsotho juru ünü ma nüh ma küüro aviri phazhuh nti küsa kenüh asiepe wuori zhuküro küveh jümari vü küze; 35thinü azhuküüro jümari tü ma siepe jümari re taji nü nyi küsü femü, thi küpa küsüwa thuoüji fethemü, thi aloh vi küpa küsüwa vethemü. 36Jüsevü nga apokhuwa nyia vünüh siepe küzhi küpa küze lehü; jüla nga atükhuvü kümüjie mari vü salehü. 37Thitü asevü thuoüji ma mpa ma tsa küze taji mari vü, “Mari nga eh tsanü küsiake tsüra naveh,” ti sa. 38Thitü azhuküüro jümari tü tsawa ngu ünü mari mpa kürüchie nü, “Hama thuoüji azhu vüwa tsa wiethuoh; rah, hiri ma fethemü nü ma zhezhu vi ünü,” ti sa. 39Jütisanü mari ma re nü ma sho rhelivizhu tsuosü vü wa nü ma fethemü. 40“Jükenüh rhelivizhu vüwa ru thuoüji azhuküüro jümari vü mowa sana lo?” ti küna. 41Thinü mari nüh ma vü, “Ma nüh anyi khuke kümüsü jümari zoriejamnathuoh, jütisanü rhelivi zhu jüma vi tsotho khemta küsa vü ma küüro aviri küpe nü ma tsü na küsa kenüh zhuküüro küpari tsümü naveh,” ti küza. 42#Krh 118.22,23. Thinü Jisu nüh mari vü, nohri khanavü zhütsazhü vü: “Aloh küsari nüh Jakümü alohwa nyuri nüh jüma vi ajühke vü aküjiwa küüsamüthuoh; jümatü Vüwa vünüh wiethuoh; ta rhüküsa müchierhuowie ülo? ti küna” 43Jükenüh hi nüh nohri vü küza naveh, “Nohri vünüh Saküüwuowa kükaji vitewa avi küüpera na küsa akuoh küsü vü tsümünathuoh. 44Thi nyi küsüküsü nga aloh hama rügivü tsuotsa küwari thuoüji külorie khemüwienathuoh; thi aloh jümatü tsuotsa külorie nü azhitho jemü naveh,” ti küza. 45Kükhruo küjiri thi Farisiri nüh ma küzhühiezhü jümari thsüra nü ma nüh mari zhüku küzaküveh müshera. 46Jütisanü mari tü ma re nti sa ünü anyi riekhuowa nüh ma tü setsaküthsüri küsü ta sakümü kenüh jümari krü tewa.

Currently Selected:

MATHI 21: POCHBSI

Highlight

Copy