MATHI 22
22
Kümünyute vü Kütsazhu Zhü vi Küzhühie
(Luk 14.15-24)
1Jümasevü nga Jisu nüh küüzhühiezhü wuori vi jümari vü küza lehü nti sanü, 2rügikaji thuoüji kajiri küsü nüh ma tsa avüvüh küüvi nü nyuri siekütsazhu kümüjiewiethuoh. 3Ma nüh ma siepe wuori küze taji kümünyute kütsazhu vü ru üti ji küsari wa küüji, thitü mari tü müru nti sa. 4Thinü ma nüh ma siepe küpa kürefü küsü küze lehü nü, nohri wa nü jiküsari vü, “Halie, hi nüh kütsazhu küchesavehthuoh; eh mieshüvori nga thi eh seshuh kümühieri fethe savehthuoh, jütisanü zanyo aveh küchesamüthuoh; jükenüh nohri kümünyute kütsazhu hala raluo,” ti küza. 5Thitü mari tü azhü jü müshe kühuophie nü tse mari mpa mari müshe vü tewakhe. Nyi küsü nüh ma mpa ma zhuh vü tewa, thi küpawa thuoüji ma mpa ma küüro vü tewa; 6thi küpari thuoüji ma sieperi re nü mari saküzükrü tsü taji fethemü. 7Thinü kajiwa nüh jüma thsüra taji ma rüshu nü ma thopahiri küze nü nyuri küfethe jümari poka khehmü, thi mari anyu tsomütü. 8Jütisanü ma tü ma siepe wuori vü, “Kümünyute kütsazhu küchesavehthuoh; thitü jiküsari mütsethuoh. 9Jükenüh nohri lekhuji küjiri vü wa tajinü nyiri küngu aveh vü kümünyute kütsazhu hala ru üti jiluo,” ti küza. 10Thinü siepe jüri tü lekhuji küjiri vü wa taji kümüsü kümühie küngura aveh jizhuhru sa; jütisanü kümünyute kütsazhupe jüla jiru küpro. 11Thitü kaji jüma tü jiruküsari no nti wa ünü kümünyute kütsazhu vü nyi küsü kütsazhupe thsümünyi müvü nüh rupeküveh ngura. 12Jütiküsavü ma nüh, “Eh füwa noh tü mokenüh kümünyute kütsazhu thsümünyi müvü nüh hala ru peveh lo?” ti küna. Thinü ma tü azhü küsü nga müphrara nüh samü. 13#Mat 8.12; 25.30; Luk 13.28. Thinü kajiwa nüh ma sieperi vü, “Nohri ma jih ma ke pheh tajinü ma vi alievü aküzo vü thsemü luo, jüla nüh krie thi aha hari penaveh,” ti küza. 14Jükümjie jiküsari thuoüji zhi shehmü, thitü rükaküsari thuoüji zülamü, ti küza.
Kaesar Khrü Kükhrüh Küüna
(Mrk 12.13-17; Luk 20.20-26)
15Jütiküsavü Farisi tü wa nü ma zhü kenüh ma re nti küsa müshe nü kürüchie. 16Jütisanü mari tü mari sehnyiri küze nü Herod nyiri nga sarü nü ma vü küze taji, “Küsosiewa, noh tü zhütsamü, thi küzhütsa vünüh hiri Saküüwuowa khuke küjo nyuri kütsatsa ti; thi noh tü nyi küsü wienga mükükrü hiri tü thsüwie veh, küpakenühnyunü noh tü no küümzeri thsümüküüpa kenüh. 17Jükenüh noh kümüshewa vi hiri vü küza jie, Kaesar khrü kükhrüh le ünü nyu lo?” ti küna. 18Thitü Jisu nüh mari luoveh kümüsü thsü nü, “Nohri küthseküsari, nohri mokenüh hi müteteti lo? 19Akhrü kükhrüh amehwa vi hi kütsaluo,” ti khuo.
Thinü mari nüh duli küsü vi ma vü ru. 20Jütiküsavü ma nüh, tsorhe hama thawa tsorhe lo? Thi hama tha nyowa lo? ti küna. 21Thinü mari nüh ma vü, “Kaesar wiethuoh,” ti küza.
Thinü ma nüh mari vü, “Thinü Kaesar zhiri vi Kaesar tsümü luo, thi hiri Saküüwuowa zhiri vi hiri Saküüwuowa tsümü luo” ti küza. 22Jütiküsavü mari tü azhü jüri thsü taji mari ngo kümü kenüh ma jamü taji tewa.
Aküsü vünüh Kürhole Zhüku Küüna
(Mrk 12.18-27; Luk 20.27-40)
23 #
Krr 23.8. Jüma rülo küsüri rhomüsüra le ta küsa Sadusiri ru ma küna nü, 24#Kho 25.5. “Küsosiewa, Mosa nüh, nyi küsü nüh ma tsa münyie nüh sümüthuoüji, ma nü nüh ma vüvüh küvi nü ma jie küshuküra saküshu luo,” ta küza. 25Thinü khanavü ajienü mari türü peh ünü apowa ma vüvüh vi nü ma küthsoküzhi münyie nüh sümü nü ma vüvüh ma nü vü tsü mü; 26thi künyiawa nga thi kücheawa nga jükümjie sasawa türüawa wa ju. 27Thi mari aveh asevü thuoüji nyimzawa nga sütewa. 28Jükenüh rhoküsüra le vü nyimzawa jümatü mari nyi türü azhie thawa vüvüh sana lo? Mari aveh nga ma küvi khehthuoh kenüh, ti küna. 29Thitü Jisu nüh mari vü, nohri zhütsazhü nga thi Saküüwuowa kükhra nga müthsü nüh müküle satetsethuoh. 30Küpakenühnyunü rholeküsüra vü vüvüh nga müvi nyutü vüpa nga müsa thuoh nüh thajüwu vü zhüleri kümüjie satewa küvehthuoh kenüh. 31Thi küsüri rhole küsüra zhüku thuoüji Saküüwuowa nüh nohri vü mowa küza saveh nüh nohri jüma müchie ülo? 32#Tse 3.6. Khanavü Saküüwuowa nüh nohri vü, “Hi thuoüji Abraham Saküüwuowa wie, thi Isaac Saküüwuowa wie, thi Jacob Saküüwuowa wie. Ma thuoüji aküsüra Saküüwuowa nyu nü akürhora Saküüwuowa,” ti küza. 33Thinü anyi riekhuowa tü azhü jü thsü nü ma küsosisezhü kenüh mari ngo tewa.
Zhükütsü Küjitsawa
(Mrk 12.28-34; Luk 10.25-28)
34Thitü Farisiri tü Jisu nüh Sadusiri azhü vehriekümü thsüra nü mari wa sehzhu. 35Thi mari azhievü wule küthsüri küsü ma müte nti ma vü zanyo küsü küna nü, 36“Küsosiewa, wule vü azhü küsü khiemawa nüh küjitsawa lo?” ti küna. 37#Kho 6.5. Thinü ma nüh jüma vü, “Noh luoveh aveh vi thi noh kürholi aveh vi, thi noh kümüshe aveh vi Vüwa noh Saküüwuowa kümüze thi siakeluo. 38Azhü hama azhü kütsü küji apokhuwa wiethuoh. 39#Lev 19.18. Thi jükümjie künyiawa nga, noh mpa noh küümze kümüjie noh zhephruri kümüze luo ta küza küsawa wiethuoh. 40#Luk 10.25-28. Wule aveh thi setsaküthsüri azhü aveh azhü hamasü nüh vi zhütso sakheh,” ti küza.
Khrista Zhühku Küüna
(Mrk 12.35-37; Luk 20.41-44)
41Thi Farisiri ru sehzhuküpevü Jisu nüh mari vü küna nü, 42“Khrista zhühku tü nohri nü moti müsheveh lo? Ma tü thawa atsa lo?” ti küna. Thinü mari nüh ma vü,
“David atsa wiethuoh,” ti küza. 43Thinü ma nüh mari vü, thinü, David tü mokenüh Sietsewa sie nü khanavü ma tü, “Vüwa,” ti sanü, 44#Krh 110.1. “Vüwa nüh eh Vüwa vü,
hi nüh noh mükünongüri; vi noh mphakhu lovü müjie küthse
küju nü noh eh zhie wuovü peh wie luo!
45David nüh jüla ma vü eh Vüwa ta ji thuoüji ma tü khiela nüh ma tsa sana lo?” ti küza.
46Jütiküüza vü nyi küsüwienga ma vü zanyo küsü nga müküzara nüh sa mü;
thi jü mpa mükünyu jü rülo vünüh tuvü nü nyi küsü nga ma vü azhü küüna krütewa.
Currently Selected:
MATHI 22: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
