MATHI 20

Rhelivi Zhuh vü Küürori

1Thi rügi kajipe thuoüji azhe avü küsü nüh ma rhelivi zhuh kenüh rüne kümüto wa nü ake küpha kümüjie wiethuoh. 2Thi rülo küsüvü dulili sanaveh ta kürüchie nü ma zhu vü küzemü. 3Jüsevü bafe küche kümüjie küsavü ma tü asüküsape vü wa ünü anyi küpa kürefü küsü zanyo müsanüh pela nü ngu. 4Thinü ma nüh mari vü, “Nohri nga eh rhelivizhuh vü wa jie; jütathuoüji hi nüh nohri akewa khem ta vi nohri tsü naveh nüh,” ti küza. Thinü mari tü ma zhu vü tewa. 5Jüsevü ma tü bafe türo thi tügu kümüjie küsavü alievü wa le nü jükümjie sa. 6Thi bafe türaluoke kümüjie küsavü ma tü alievü wa lehu ünü anyi küpa wuori nga tsiela nü ngura; thinü ma nüh mari vü, “Nohri tü zanyo müsanüh mokenüh anyisho hala tsieveh lo?” ti küna. 7Thinü mari nüh ma vü, “Nyi küsü nga küüro vi hiri mükütsü kenüh wie,” ti küza. Thinü ma nüh mari vü, “Nohri nga e rhelivizhuh vü wa mo,” ti küza. 8#Lev 19.13; Kho 24.15. Thinü münüle teru ünü rhelivizhuh vüwa nüh ma siepewa vü, “Küro küperi ji nü ase tsawa vünüh wa apo tsawa küju mari ake sa mari tsüluo,” 9Thinü bafe türaluoke ase vünüh küüzeri nga ru nü nyi küsü vü dulili ngura. 10Jütiküsavü rüne vünüh küwari tü mari nyia vünüh ngu zhirana tünti müshe nü ru, thitü mari nga shientü atükhuri küngu kümüjie dulili ngura. 11Jütisanü mari jüzake mpa ngura ünü mari tü azhuh vüwa vü sieküpro luo taji, 12“Mari tü münühu küsü nyia vü müküro, thi mari tü hiri arünyi na taji küürori sie zarike sataji akeme wa ngu,” ti küza. 13Thitü ma nüh mari nyi küsü vü, “Eh füwa hi tü no vü mükünyu zanyo küsü nga müsawie, noh tü hisü loküsü vü dulili sanaveh nüh ti mükürüchie ülo? 14Noh zhi vi nü tewaluo; noh vü küzake tsü nüh jüzake vi anyi ase vünüh küruwanga tsü na küsa eh müshe. 15Hi tü eh zhiri vi eh müshe küsa wule nyu ülo? Hi kümühie kenüh noh tü hi ngu nü noh notha sa veh ülo?” 16#Mat 19.30; Mrk 10.31; Luk 13.30. Hakümjie aseri nüh apo samü naveh, thi apori nüh ase samü naveh, küpakenühnyunü jiküsari thuoüji zhimü thitü kürükari thuoüji zülamü, ti küza.

Jisu nüh Ma Sühle zhü Küüza kücheawa

(Mrk 10.32-34; Luk 18.31-34)

17Jüsevü Jisu tü Jerusalem vü kütsevü ma sehnyi türakünyiri sie küpa tse taji ma nüh lekhuji vünüh mari vü, 18“Halie, hiri tü Jerusalem vü khru nti tse, thi khruju thuoüji anyi Tsawa tü re nü kükhruori thi Wule küsosieri ake vü thsemü naveh; jütisanü mari tü ma müshemüsü taji ma küüsümüluo, ta sanaveh. 19Thi ma vi riesa thi ma fe thi khieluothso rügivü zekemü üta ma re nü mükütsotüri ake vü thsemü naveh, thi ma tü rülo küche rülo rholesüra tewa naveh,” ti küza.

Zebedee Tsa Künyia Zah nüh Kükhuo

(Mrk 10.35-45)

20Jüti sapeküveh vü Zebedee tsa künyi zah nüh masü sie ma vü ru khotsü nü ma khurü taji ma nüh kümünguwa zanyo küsü khuo. 21Thinü ma nüh jüma vühwa vü, “Noh tü mowa khuongü veh lo?” ti küna.

Thinü jüma vühwa nüh ma vü, “Noh kükaji vü eh tsa hamasü nyi küsü nüh noh zhie wuovü thi nyi küsü nüh noh zhu wuovü ti pera na küsa azhü tsüjie,” ti khuo. 22Thitü Jisu nüh masü vü, nosü nüh khuoküvehwa müthsü nüh khuoveh. Nohsü tü hi nüh ahuo zhu nta küche küsawa zhura naveh lo? Thi hi nüh baptis küsawa nüh vi baptis sara naveh lo? ti küna.

Thinü masü tü ma vü, “Hisü nga sara naveh,” ti rüle tsü. 23Ma nüh masü vü, “Nohsü tü eh huo zhurawie naveh, thi hi nüh baptis küsawa nga sarawie naveh, thitü eh zhie wuovü thi e zhu wuovü peh na küsanü hi nüh mütsü nü eh Pa nüh küchetekütseri vü tsü naveh,” ti küza. 24Thinü mari türakeri tü azhü jü thsü taji masü vü lomüra nüh sa. 25#Luk 22.25,26. Thitü Jisu nüh mari sie ma vü ru tajinü mükütsotüri tü küjiri nüh mari nyia vü avü küüsasati, thi kükhrari nüh mari nyia vü kükhra küüviviti. 26#Mat 23.11; Mrk 9.35; Luk 22.26. Thitü nohri azhie vü thuoüji jüta küsawa nyu; jüütanyunü nohri azhie vü nyi küsüküsü nga küji ngüri thuoüji nohri kürozawa küüsaluo. 27Thi nyi küsüküsü nga nohri azhie vü apo küsangüri thuoüji nohri siepe müsaji mümühie. 28Jükümjie anyi Tsawa wienga nyuri nüh ma küüroza nta nyu nü nyuri roza nta thi nyiri hozake rhesa nta küsa kenüh ma mpa ma kürho tsü nta küru wie.

Jisu nüh Nothaküüjuri Künyi Samühiekütsü

(Mrk 10.46-52; Luk 18.35-43)

29Jütisanü mari Jeriko vünüh tsezhutekütsevü nyi shieji küsü ma se nyiru. 30Jüvü halie, nothaküüjuri künyi lekhuji natovü peh tajinü Jisu jü wuovü tse ta küsa thsü nü zia taji, “David Tsa, noh tü hisü nokümüze tsüluo,” ti khuo. 31Thinü nyi riekhuowa nüh masü tü zoti peh üti sakükrü; thitü masü tü kümüsütsa zia taji, “Vüwa, David Tsa, noh tü hisü nokümüze tsüjie,” ti sahuo peh. 32Jütiküsavü Jisu tü tsie taji masü ji nü, “Hi nüh nosü vü mowa sakütsü nosü müshe lo?” ti küna. 33Thinü masü nüh ma vü, “Vüwa, hisü nothari satsü luo,” ti khuo. 34Jükenüh Jisu tü masü nokümüze taji masü notha pa tsü kheh; thinü müküzhike wiethuoh nüh zanyo ngu teru nü masü tü ma se nyitewa.

Currently Selected:

MATHI 20: POCHBSI

Highlight

Copy