MATHI 19

Jisu nüh Küürüsuo zhü vi Küsosie

(Mrk 10.1-12)

1Thi Jisu nüh azhü jümari phratethuoh kümüsevü ma tü Galilee jamü taji Jordan rüku wuovü nüh mürhü Judea azhih nyokhie vü teru. 2Thinü anyi shieji küsü ma se nyi ru, jütiküsavü ma nüh jüla nüh mari sakümühie tsükheh. 3Jütiküsavü Farisiri wuori ru ma müra tajinü, “Nyiri tü zanyo muomuo kenüh nga vüvühri jakümü wule ülo?” ti küna. 4#Atü 1.27; 5.2. Thinü ma nüh, “Atükhu vünüh Saküüwuowa nyiri sakütsü vü nyimpari thi nyimzari sa tsü,” ti rületsü. 5#Atü 2.24. Thi jüla küüza, “Hama kenüh nyimpawa tü ma pa ma za jamü tajinü masü tsarümünathuoh, thi masü küsü samünathuoh. 6Jütisanü masü tü künyi nyunü kürü satsa küsü samüthuoh. Jükenüh hiri Saküüwuowa nüh sakütsarü kütsüwa nyiri nüh samüküüporie tümü,” ti küza. 7#Kho 24.1-4; Mat 5.31. Thinü küürüsuo lasi tsü taji ma jamü luo ta küsa küza ülo? ti küna. 8Ma nüh mari vü, “Mosa nüh nohri luoveh kükho kenüh nohri vüvüh jamü luo ta küüza wie; thitü atükhuvü thuoüji jüüta müküza. 9#Mat 5.32; 1 Kor 7.10,11. Jütanyunü, hi nüh nohri vü küza naveh, nyi küsüküsü nga küüphroküphrie kenüh mükünyu mari vünüh ri jamü tajinü küpa vithuoüji küüphroküphrie samü wiethuoh; thi anyi küsüküsü nga nyuri nüh jakümüvühwa vi thuoüji ma nga küüphroküphrie samüwiethuoh,” ti küza. 10Thinü ma sehnyiri nüh ma vü, “Anyiri nüh ma vüvüh vü jüta sathuoüji, avüvüh müküviwa nüh küümphakhe,” ti küza. 11“Vüwa nüh kükhra tsüküsari küchie nüh nyiri aveh nüh azhü hama mümüzhera,” ti Jisu nüh rületsü. 12Küpakenühnyunü anyi wuori thuoüji azari volovü kütü vünüh nga, thi wuori thuoüji nyiri mpa nga nüh, thi wuori thuoüji rügi kajipe kenüh ma mpa ma müshe sanü vüvühvüpa müsara nüh küsa nga peveh. Nyi küsüküsü nga azhü jüma kümüzherari nü küümüzhe luo, ti küza.

Jisu nüh Tsia taji Rünguori Kütsü

(Mrk 10.13-16; Luk 18.15-17)

13Jütiküsavü ma ke thsuo taji mari vü tsü thi makeri’a nüh kükhuo ti küsana küsa kenüh kürünguori kürefü küsü sie ma vü ru; thinü ma sehnyiri nüh jümari phra. 14Thitü Jisu nüh mari vü, “Kürünguori mükhetü hi vü küüru luo, küpakenühnyunü rügi kajipe tü mari zhi küsa kenüh,” ti küza. 15Jütisanü ma nüh ma ke thsuo mari vü thse taji tewa.

Viza Nyirhieri Küsü nüh Zhüküüna

(Mrk 10.17-31; Luk 18.18-30)

16Thinü halie, nyi küsü ma vü ru tajinü, “Küsosie Kümühiewa, hi tü küsuokürho ngu naküsa kenüh zanyokümühie mowa müsaji mümühie lo?” ti küna. 17Thinü ma nüh jüma vü, “Noh tü mokenüh hi vü kümühiewa zhü künaveh lo? Kümühiewa thuoüji küsü mpa wie, jümathuoüji Saküüwuowa, thitü noh nüh akürho vü tungüveh üji, azhütsüküsari müzhe luo,” ti küza. 18#Tse 20.13; Kho 5.17; Tse 20.14; Kho 5.18; Tse 20.15; Kho 5.19; Tse 20.16; Kho 5.20. Thinü jüma nüh ma vü, “Khiemari lo?” ti küna. Thinü Jisu nüh ma vü, “Noh nyuri kefethevüh nyu, noh küüphroküphrie küsavüh nyu, noh kürühuvüh nyu, noh akürie povü küsavüh nyu, 19#Tse 20.12; Kho 5.16; Lev 19.18. noh pa noh za siakeluo, thi noh mpa noh küümze kümüjie noh zhephruri kümüze luo, ta küza küsari”, ti küza. 20Thinü viza jümawa nüh ma vü, “Hi tü kürünguo vünüh zanyo jüri aveh müzhe tetsethuoh, tinü hi tü mowa müjieju nüh peveh lo?” ti küna. 21Jisu nüh ma vü, “Noh tü mühieju ntheji, wa nü noh zhi küperi aveh zhumü tajinü vi kümükhuori tsümü luo; jütathuoüji rügivü noh suope pera naveh, thi jütisanü ru eh se nyi luo,” ti küza. 22Thitü viza jüma tü azhü jüma thsü nü ma lokhu sheh taji tewa, küpakenühnyunü ma tü nyirhieri küsa kenüh. 23Thinü Jisu nüh ma sehnyiri vü, hi nüh nohri vü küzatoke naveh, nyirhieri rügi kajipe lovü tuna küsa khomüwie. 24Jümpa mükünyu hi nüh nohri vü küza naveh, “Nyirhieri nüh Saküüwuowa kajipe lovü tunta küsanü ut nüh rüje gu lovü müriküwa nüh küürüzi naveh,” ti küza. 25Thinü ma sehnyiri tü azhü jü thsü nü mari ngo sheh tajinü, “Thinü thawa nüh küülole nguranathuoh lo?” ti küna. 26Thinü Jisu nüh mari no taji mari vü, “Nyiri thuoüji jüma küsara münyie, thitü hiri Saküüwuowa thuoüji zanyo aveh sara naveh,” ti küza 27Jütiküsavü Pitor nüh ma vü, “Halie, hiri tü hiri azhi küperi aveh jamü tajinü noh se nyitetsethuoh, jükenüh hiri tü mowa nyia na lo?” ti küna. 28#Mat 25.31; Luk 22.30. Thinü Jisu nüh mari vü, hi nüh nohri vü küzatoke naveh, nohri eh se nyitekütseri, zanyo saküürüthele vü anyi Tsawa ma kajipe kütholathovü rügivü küpevü nohri nga kajipe türakünyi rügivü peh tajinü Israel akuoh türakünyiri küüna sanaveh. 29Jüvü anyi küsüküsü nga eh nyo kenüh azheh nyutü ajienü, nyutü atsehvüri, nyutü apari, nyutü azari, nyutü atsari, nyutü azhih jakümüri jüzake müzamüza ngura naveh, thi küsuokürhonga ngulehü naveh. 30#Mat 20.16; Luk 13.30. Thitü apori hozakewie nga asevü tewa naveh, thi aseri hozake apo satewa naveh.

Currently Selected:

MATHI 19: POCHBSI

Highlight

Copy