KÜÜRORI 16

Timothi nüh Paul thi Silas masü vü Nyiteküwa

1Thi Paul tü Derbe thi Listra vü nga ru. Thinü sehnyiri küsü Timothi, ma za thuoüji Judahri kütsotüvühri, thitü ma pa thuoüji Greekri ti küsa küsü peh. 2Ma tü Listra thi Ikonium vü afüri nüh phrateküümühieri küsü. 3Jütiküsavü Paul nüh Timothi tü ma se küünyingü taji Judahri anyu jüri vü küperi kenüh ma siewa ahuküürhemü, küpakenühnyunü ma pa tü Greekri ta küsa mari aveh nüh thsüküveh kenüh. 4Jüti masü tse anyuküji vehthuoh küwa vü Jerusalem vü küpepovükusari thi kümühu sierhüri nüh zhühthuo kütsüwa müzhe üta vi mari vü küza. 5Thi kümühuri tü kütsotü sakükhra nü rülo tsotho anyi saküzhi pehuo.

Troas vü Paul Kümohtsa Küngu

6Thi masü tü Asia vü Vüwa zhü küphra Kümtse Sietse nüh khekümü kenüh tse Frijia thi Galatia vü tewa. 7Jüsevü masü tü tse Misia küüprü vü ru nü Bithinia vü wanti sa, thitü Jisu Sietse nüh masü müküze nti samü. 8Jükenüh Misia tsekari nü masü tü Troas vü tetsuo. 9Thinü jü rüza vü Paul vü kümohtsa küsü ru taji Mesedoniavü nyi küsü tsie nü ma vü, “Mesedonia vü ru taji hiri kükra tsü jie,” ti khuo. 10Jüti ma tü kümohtsa ngu kümü sevü Mesedonia vü wa nti müshe, Saküüwuowa nüh Mesedonia vü wa taji Zhühthe Kümühiewa mari vü küza üta hisü jivehthuoh, ti küza.

Filipi vü Lidia luoveh Kükhaphrü

11Jüti sataji Troas vünüh juhie hie nü külesho Samothra vü mürhü tewa taji jü rülovü nüh Nipoli ju. 12Thi jüla nüh Romri nüh wa anyu küsa Mesedonia vü nyuküji kümühiewa Filip vü wa. Nyuküji hala hisü rülo pike petewa. 13Thi Sabbath ti küji Judahri kümünyierülo vü hisü tü shiekukari arügu Judahri nüh sehzhu taji kükhuope vü kükhuo küsape ngunatünyie ti müshe nü wa shupe. Thi nyimzari refü sanü küperi vü azhü küza. 14Hisü zhü küna peküvehri azhie vü küsü thuoüji ma nyo Lidia, ma tü Thiatira nyuküji vünüh küru thsümünyi küsümo küüzhuri thi Saküüwuowa kükhurüri. Vüwa nüh ma luovehsaphie tsü nü Paul nüh azhü küüzari kümühieti küna. 15Jüti sataji ma tü ma zhelori sie baptis sa kümüsevü ma nüh hisü vü, “Nosü nüh hi tü Vüwa kütsotütsari ta müshevehüji eh zhe vü ru nü pe luo,” ti küza. Jütisanü ma tü hisü müja nta satewa.

Filipi vü Paul thi Silas Küsiküsa

16Jütisanü hisü tü kükhuo küsape vü wa nti tse ünü rülari kütüma sietse küsieri küsü hisü siemütu; ma nüh kütüma zhü küphrate vünüh ma nüh nyiküpe vüwa tü nyia shesheti. 17Ma tü Paul hisü senyi zhemüngu zia taji, “Anyi hamasü tü Aveh Kümüsietsa Saküüwuowa siepe nohri vü küülole lekhuji phratekütseri,” ti küza. 18Rülo hozake ma tü hakümjie sa pe. Thi ma tü Paul küjakünya tekütse kenüh ma tü sülewa sietsewa vü, “Jisu Khrista nyo vünüh nyimzawa vünüh shuteru luo,” ti küza. Thinü müküzhikewie thuoh nüh jüma tsotho vü kheti shuteru.

19Jütiküsavü ma nüh nyiküpe avüri nüh jü ngu taji akünyia luozhe küpe münyie nüh sakümüvü mari nüh Paul thi Silas renü masü shoh zanyo küzhupe vü sierhüri atüvü wa. 20Jütisanü mari nüh masü sie taji ashiküsa küjiwa vü ru nü, “Anyi hamasü tü Judahri thi masü tü hiri anyu khieloti saküjakünya tsüveh. 21Masü nüh hiri Romri tü khonyo mükünyuri sa thi müzhe üta vi sosie veh, thitü hiri nü jüri mümüzhera,” ti küza. 22Nyi shiejiwa nga mari sietsarü nü masü müküle phah.

Thi ashiküsa künyi nüh masü thsümünyi zokhrimütü, thi amürü vi masü fe luo ti azhütsümü. 23Masü fe she taji sakümnomna kümüsevü masü showa küsizhe lovü thsemü, thi kümühieti masü huo üti küsizhe kühuowavü azhütsümü. 24Azhü hakümjie tsükümü kenüh küsizhe kühuowa nüh masü siewa küsizhe azhila lovü thsemü nü athso vünüh masü ajih jiete mütü.

25Thitü rüza tsotüla kümüjie küsavü Paul thi Silas masü tü Saküüwuowa vü kükhuo sa thi aza riehi ti sa, jütiküsavü küsiri tü masü nüh jüti küsa küna peh. 26Thinü zhürüluo khieloti mükhrü küzhüteru taji küsizhe azhie aveh vikünga, thinü müküzhikewiethuoh nüh amükhie aveh sajamütü thi mari phehküsa mürüli aveh kületewa. 27Jütiküsavü küsizhe kühuowa josühra nü küsizhe mükhie aveh sakümü ngura taji ma nyusuo shozhu nü ma mpa ma rethe nti sa; küpakenühnyunü küsiri tü küthi tewa khe thuohtü nti kümüshe kenüh. 28Thitü Paul tü ziekürügi she taji, “Noh mpa no kürholi müvitümü, hiri aveh hala pekheh wieveh nüh,” ti küza.

29Thinü ma tü anyih khuotaji zhü azhe lovü tu nü khekheti küshü thi krü taji Paul thi Silas masü atüvü künyiatsuo. 30Jütisanü masü sie alievü ru taji, “Küji künyi, hi tü külole na küsa kenüh mowa müsaji mümühie lo?” ti küna.

31Thinü masü nüh, “Vüwa Jisu tsotüluo, jütathuoüji noh nga thi noh zhelori nga aveh külole naveh,” ti küza. 32Jüti sataji masü tü Vüwa zhü vi ma vü thi azhe jüla küperi aveh vü küza. 33Thinü ma nüh jürüza vünüh masü siewa nü masü küfe thsopori khrütü, thi ma nga thi ma zhelori nga aveh küsükeri vünüh baptis sa. 34Jütisanü ma nüh masü sie ma zhe vü wa nü kütsaküzhuküche nü masü tsü, thi ma tü Saküüwuowa kütsotüra kenüh ma zhelori aveh sie lozhe she.

35Jütiküsavü thoru ünü ashiküsa küjiwa nüh kütsüküünari küze taji, “Anyi jümari küzemü luo,” ti küza.

36Thinü küsizhe kühuowa nüh Paul vü azhüke tsü taji, “Shiküsaküjiwa nüh nosü küzemüluo üta zhüle küzemüthuoh, tinü alievü shutera nü lozhe nü tewaluo,” ti küza.

37Thitü Paul nüh mari vü, “Mari tü hiri ashi müsanüh hiri tü Romri ketünga müzakümühu atü vünüh hiri fe thi hiri viküsizhe lovü thsemü thi khinyi thuoüji mari tü küüthi vünüh hiri küzemüluo nta küsanü müsara, mari mpa ru nü hiri sie taji alievü küüshu luo,” ti küza.

38Kütsüküünari nüh zhüle hamari viwa taji shiküsaküjiwa vü küza, thi mari tü Romri ta küsa küthsüra vü mari tü krüshe. 39Jükenüh mari tü ru nü masü vü müküle khuo. Jüti sataji mari nüh alievü masü siezhumü nü anyu jüma karitewa üti khuo. 40Jüti sataji Paul thi Silas masü tü küsizhe vünüh tewa nü Lidia azhe vü wa; thi masü tü kütsotüri siekümütuvü mari küthotsü nü porietewa.

Currently Selected:

KÜÜRORI 16: POCHBSI

Highlight

Copy