KÜÜRORI 15

Jerusalem vü Müzakümühu

1 # Lev 12.3. Thitü anyi wuori Judea vünüh ru nü anyu jüla afürivü, “Nohri Mosa Khonyo müzhe taji ahu mükürhewienü mükülolera,” ti sosie. 2Thi Paul thi Barnabas masü nüh mari sie küzülamüküproluo thi mürüluo nüh sakümü asevü Paul thi Barnabas thi küpari wuori nga ti chuh taji nü azhü hama kenüh Jerusalem vü povüküsari thi kümühu kühuorivü küze.

3Jüti sataji kümühuwa nüh mari küüze vü mari tü tse Foenicia thi Samaria kariru nü Judahmükünyuri luoveh kükhaphrü zhükewa küza, thitü mari tü afüri vü hozake loküzhe tsü. 4Jütisanü mari ru Jerusalem ju ünü kümühuwa thi povüküsari thi kümühu kühuori nüh lozhe taji mari sieke, thi Saküüwuowa nüh mari sie momowa sanüh küza kheh. 5Thitü Farisiri zhie vü kütsotüri wuori nüh süra tsie taji, “Mari nga ahu mürheji mümühie, thi Mosa Khonyowa müzhe üta müküzaji mümühie,” ti küza.

6Jütiküsavü povüküsari thi kümühu kühuori tü sehzhu nü azhü hama kürüchie. 7#Krr 10.1-43.Jütisanü tsotho hothake azhühnyo hama rüluokümüsevü Pitor nüh süra taji mari vü, “Eh füri, khanavü nüh Saküüwuowa nüh nohri azhie vünüh hi chuhnü eh po vünüh Judahmükünyuri tü Zhühthe Kümühiewa küna thi tsotü ti sana ta nohri nüh thsüvehthuoh. 8#Krr 10.44; Krr 2.4. Thi Saküüwuowa nyiri luoveh küthsüwa nüh mari vü povü satsü thi hiri vü kütsü kümüjie Judahmükünyuri vü nga Kümtse Sietse tsü. 9Thi ma tü hiri vü nga satü mari vü nga satü amüsheküpa münyie, jüüti küsanyunü kütsotü vünüh mari luoveh sakümtsera. 10Jükenüh nohri tü mokenüh khanavü apari nga thi hiri nga müküvüra thsokhuonyiwa vi sehnyira ku lovü thse nü Saküüwuowa müte veh lo? 11Thitü hiri kütsotü thuoüji hiri nga Vüwa Jisu küümze vünüh mari kümüjie külole naveh,” ti küza.

12Jütiküsavü mühupeküvehri aveh nga zohmti peh nü Barnabas thi Paul masü nüh Judahmükünyuri azhie vü Saküüwuowa nüh küngoküürori thi küükrükükra küsari zhüku küphrate küna petewa. 13Masü nüh phratuo kümüsevü Jems nüh rüle taji, “Ehfüri, eh zhü künaluo! 14Saküüwuowa nüh ma nyo kenüh Judahmükünyuri azhie vünüh nyiri ji nta mari vü wa khu üta küsa Simon nüh phratetsüthuoh. 15Thi setsaküthsüri nga jüma zhü sie kümüshe küsüsa, jüma zhü rhüküsa hakümjie:

16“Hamasevü hi nüh sheleru David kürhope jiezeküvehwa salenaveh,

samüsü küsari hi nüh sale taji khakütoke le naveh.

17Anyi küpari nga Saküüwuowa küüpha,

thi Judahmükünyuri eh nyo jiküvehri aveh Vüwa küüphanaveh.

18Hamari küsawa nüh khana vünüh thsümüthuoh,

ta Vüwanüh küza,” ti rhüsaveh.

19Jükenüh eh kümüshe thuoüji Judahmükünyuri Saküüwuowa vü sühle kütseri saküüjakünya vühnyu. 20#Tse 34.15-17; Lev 18.6-23; Lev 17.10-16.Thitü mari tsorhe kükhurü, kütsaküzhu vünüh, thi küüphroküphrie amüke vünüh thi azüh kütsavünüh sakümüne küveh zhünyo rhü mari tsüluo. 21Jümatü khana teküwa tsotho vünüh nyuküji aveh vü Mosa Khonyo küsosieri nüh kümünyierülo aveh vü kükhurüzheri vü chiewiethuoh, ti küza.

Lasi rhü Judahmükünyu Kütsotüri Kütsü

22Jütiküsavü povüküsari thi kümühu küwuori tü Nazizheh aveh sie nyiri mari azhie vünüh chuhzhu nü Paul thi Barnabas masü sie Antiok vü küzeji mühienatünyie ti müshe. Jütisanü mari nüh afüri azhie vü rühle küjokütsüri: Judas, Barsabas ti küjiwa thi Silas masü tü Paul thi Barnabas masü vü nyi küze. 23Thi lasi hama rhü nü tsüküzenyie:

“Hiri füküsari thi povüküsari thi kümühu kühuori nüh nohri Judahmükünyuri Antiok thi Siria thi Silisia vü küpe afüri vü loküzhe tsü veh. 24Hiri nüh küünara, hiri nüh jüle nü müküüze nyiwuori ru nü nohri vü zhüküza nü nohri saküjakünya thi nohri luoveh sakümüsü ta küsa thsüra. 25Jükenüh hiri aveh kürü sehzhu nü kümüshe küsü sataji anyi wuori rüka nü hiri küümzetsa Barnabas thi Paul masü ase nyiküze veh, 26nyi hamasü tü hiri Vüwa Jisu Khrista kenüh kürho nga mükürüpa nüh kütsü künyi. 27Jükenüh hiri nüh Judas thi Silas masü küzeveh, masü tü masü apo vü nga nüh azhü jümari küzara naküveh kenüh. 28Küpakenühnyunü Kümtse Sietse kenüh nga thi hiri kenüh nga kümühiewa thuoüji nohri vü zanyo hamari küthse nyiavü küji münyie; 29jüma thuoüji nohri tü kütsaküzhu vi tsorhe vü kükhurü küsa vünüh thi azhüh kütsa vünüh thi samüwa künyithekütsa vünüh thi küüphroküphrie küsavünüh nohri mpa nohri khetemü luo. Nohri hamari vünüh kükhetera nyia vü kümühie münyie. Kümühieti peh kheluo,” ti sanü rhütsü.

30Jüti sataji mari nüh mari küüze kümüjie mari tü Antiok vü ru, thi kümühuwa jizhuh nü lasi rhüküüzewa vi tsü. 31Mari nüh küthokütsü lasi jüma chie nü lozhe sheh. 32Thinü Judas thi Silas masü tü setsaküthsüri küsakenüh azhü hozake vi afüri küthotsü thi sakükhratsü. 33Jüti sataji tsotho pike mari kürü peh nü afü jülaküperi nüh kümühieti mari küüzeri vü küzemü le. 34Thitü Silas nü jüla peteküwa nüh küümpha kümüjie küsa kenüh jüla petewa.

35Thitü Paul thi Barnabas masü thuoüji Antiok vü peh nü nyiri hozake sie nü Vüwa zhü sosie thi küza peh.

Paul thi Barnabas masü Poriekümü

36Rülo pike sevü Paul nüh Barnabas vü, “Ra, hisü kürü khanavü Vüwa zhü küza küsa nyuri vü wa lenü afüri mokümjie savehthuoh nüh wa no ünü,” ti ji. 37Thinü Barnabas tü Johan, Mark ti küjiwa nga masü vü siewangütewa. 38#Krr 13.13.Thitü küsükeri Johan nüh masü sie küüro vü müwa nüh Pamfilia vünüh ma mpa shele teküwa kenüh masiemüküwawa nüh küümpha ti Paul nüh müshe. 39Jüti sataji masü hozake rüluo nü poriemü nü Barnabas nüh Mark sie taji juhie hie nü Saipras vü tewa. 40Thitü Paul thuoüji Silas rüka nü Vüwa küümze vünüh afüri nüh küüze kümüjie tewa. 41Jüti sataji ma tü Siria thi Silisia vü wa nü kümühuri sakükhra wa.

Currently Selected:

KÜÜRORI 15: POCHBSI

Highlight

Copy