KÜÜRORI 14

Ikonium vü Paul thi Barnabas Küüro

1Jüti satajinü masü tü Ikonium vü wa nü Judahri künazizhe lovü tu nü sosie, thinü Judahri nga thi Greekri nga anyi hozake tsotüra. 2Thitü Judahri mükütsotüri nüh Judahmükünyuri küchükümüsü thi mari luoveh sakümüsü nü kütsotüri sieküproluo. 3Jükenüh tsotho hothake luoveh müzho taji Vüwa kenüh azhüphra, thi ma küümze zhü povüwa satsü, thi thsoshi thi küngo küüro küsa masü ake vü tsü. 4Thitü nyuküji jüla anyi küsuo künyi satewa; wuori nüh Judahri wuovü thi wuori nüh povüküsari wuovü ti küsuomü.

5Jütiküsavü Judahri thi Judah mükünyuri nüh mari sierhüri sie nü kütsotüri sakümnomna thi aloh vimari veh nta sa. 6Mari tü jüma thsüra nü zhü Listra thi Derbe, Likaonia nyuküjiri vü thi anyu jüma natonahuo vü tewa. 7Jüti sataji masü tü azhie jüri vü Zhühthe Kümühiewa küza.

Listra thi Derbe vü Paul thi Barnabas Küüro

8Thinü Listra vü ma küwuo vünüh ajih müsü nü majih vü zanyoküsü nga müsara nüh alemütsewiethuoh nüh shuküpehuo küsü peh. 9Ma tü Paul nüh küzaküveh künaphoke; thi Paul tü ma saküümühiera kütsotü peküveh kenüh ma nophoke taji, 10zia nü, “Noh jih künyi kümüshoti süra tsie luo,” ti küza. Thinü ma tü süra jo nü tsetewa. 11Jütiküsavü anyi riekhuowa tü Paul nüh küsa jüma ngu ünü mari jikhi zia nü Likaoniari azhü vünüh, “Nyiazari tü nyiri atso sanü hiri vü tetsethuoh,” ti küza. 12Mari nüh Barnabas thuoüji Zeus ti ji thi Paul thuoüji zhüküüza küjiwa küsa kenüh Hermes ti ji tsü. 13Thi Zeus levüwa kükhurüzhe tü nyuküji atüvü peküveh kenüh nyiri sie nü shüvotsa thi aküwu akheri vü viru nü kükhurü sangü.

14Thitü povüküsari Barnabas thi Paul masü nüh jüma küthsüra vü masü thsümünyi zokhrimü nü nyiri azavü zhüwa taji zia nü, 15#Tse 20.11; Krh 146.6.nyiri, nohri mokenüh hakümjie saveh lo? Hisü nga anyi nohri kümüjie wie, thi nohri tü zanyo müjuju hari vünüh khaphrü nü thajüwu thi azhih thi juküji thi jü lovü kütseri aveh sakütsü rhoküpehuo Saküüwuowa vü khaphrüle teru ti küsa Zhühthe Kümühiewa vi nohri vü kütsüwie. 16Khanavü teküwa tsotho vünüh nyiri aveh papa lekhuji vü tse üta ma nüh tsümüthuoh. 17Thitü ma tü ma mpa ma povüwa thuoüji müjawie, küpakenühnyunü ma nüh zanyo kümühie sanü rügivünüh atsorü thi azale aviküpe, nohri luoveh lokürakütsaküzhu thi loküzhe sa nohri tsüküveh kenüh. 18Azhü hamari küza nü nyiri nüh masü vü kükhurü sana küsa khetera zahza.

19Thitü Antiok thi Ikonium vünüh Judahri kürefü küsüru nü anyi jümari küchü nü aloh vi Paul veh taji ma tü sümüthuohtünyie ti sanü ma showa nyuküji alievü jamü. 20Thitü sehnyiri nüh ma mükie peveh ünü ma tü süranü nyuküjiwa vü tetu, thi rülo künyiawa ma tü Barnabas sie nü Derbe vü tewa.

Povüküsawa masü Antiok vü shele Teküwa

21Nyuküji jüla masü nüh Zhühthe Kümühiewa viküüza vü nyiri hozake sosie vira, jütisanü masü tü shele Listra thi Ikonium thi Antiok vü tewa. 22Tsotükümü sietse jümari vü sakükhra thi kütsotü müja tümü üti küthotsü thi kümnomna hozake vünüh Saküüwuowa kajipe lovü tu naveh ti küza. 23Jütisanü masü tü Nazizheh aveh vü sierhüri rükanü kükhuo sa thi assa sanü mari nüh tsotü kütseVüwa akevü thsemü.

24Jüsevü masü tü Pesidia kari nü Pamfilia vü teru. 25Thi masü nüh Perga vü azhü küzakümü sevü Atalia vü tetsuo. 26Thi jüla nüh masü tü juhiewa hie le Antiok vü teru, azhie jüla nyuri nüh masü vi Saküüwuowa küümze küüro sa üta küza nü masü nüh jüma sajutsü.

27Thinü masü tü Antiok vü ruju ünü kümühuwa jizhuh nü Saküüwuowa nüh masü sie küürori aveh thi ma nüh mokümjie Judahmükünyuri vü kütsotü mükhiewa satsü nüh mari vü küzatsü. 28Jüti sataji masü tü rülo hothake kütsotüri sie petewa.

Currently Selected:

KÜÜRORI 14: POCHBSI

Highlight

Copy