KÜÜRORI 17

Thesalonia vü Paul thi Silas Küüro

1Jüti sataji masü tü tse Amfipolis thi Apollonia kari nü Thesalonia vü ru, jüla tü Judahri künazizhe küsü peveh. 2Thinü Paul tü ma müke sakümüthuoh kenüh nazizheh lovü tu, jütisataji Zhia küche zhütsazhüri vi mari sie rüluo, 3Khrista tü münomüna she nü küsü vünüh rhomüsüraleji mümühie ta küsa zhünyo ma nüh phrate thi küza kümtsetsü. Jümpa mükünyu ma nüh, “Jisu hama hi nüh nohri vü küzaküvehwa tü Messiah wiethuoh,” ti küza. 4Jütiküsavü mari azhie vünüh anyi wuori thi Greekri künyitsari hozake thi nyimzari afüri azhie vü zanyo küsarari hozake ti Paul thi Silas masü ase nyizhetewa.

5Thitü Judahri kürefü küsü nüh noküma taji nyiri khukekümüsü küjakünya nü rhokütseri shieji küsü jizhuh nü nyuküjiwa saküjakünya tsü taji masü rewa nyiri ake vü thsena küsa kenüh Jason azhe mürie. 6Thitü mari nüh mari mphara nüh samü ünü mari tü Jason thi kütsotüri wuori sho taji nyuküji jüla kükhraküviri ake vü thse nü, “Anyi azhih khamülele kümüri tü hala nga tsethuoh,” ti küza. 7Thinü Jason nüh mari ma zhe vü sieke, thi mari aveh nga Romri Kajiwa khonyori mülo nüh sanü kaji küpa peveh, thi jüma thuoüji Jisu, ti küza. 8Thi nyiri nüh thi anyu jüla kükhraküviri nüh hama thsüra taji mari saküjakünya tewa. 9Thi mari nüh Jason vünüh thi küpari vünüh ti ame küthuohwavi nü küzemü.

Berea vü Paul thi Silas Küüro

10Thinü kütsotüri nüh müküzhikewie thuoh nüh Paul thi Silas masü rüza vünüh Berea vü küzemü, thi masü ru jüla ju nü Judahri künazizhe lovü tu. 11Judahri hala küperi tü Thesalonia vü küperi nyia vünüh amüshe pie, küpakenühnyunü mari tü amüshe thse nü Vüwazhü vi, rülo tsotho aveh wie nga zhütsazhü watü kheta thuohnü nyu nüh ta küsa müshe sheh nü küvi kenüh. 12Jükenüh nyiri hozake tsotü thi Greekvühri kümüsie vünüh kürhori thi nyimpari nga küzüla mütsotü. 13Thitü Thesalonia vü Judahri nüh Paul nüh Berea vü nga Saküüwuowa zhü sosieveh ta küsa küthsüra vü mari tü jüvü nga ru nü saküjakünya tsü thi anyi riekhuowa luovehküchü kümüsü tsü. 14Thinü kütsotüri nüh müküzhikewie thuoh nüh juküji wuovü Paul küzemü, thitü Silas thi Timothi thuoüji jüla küpemü. 15Thi Paul sieküwari nüh Athen küju sierutsü taji Paul nüh azhü vi Silas thi Timothi masü shiti ma vü ru üti küsazhülewa vü nü shele tewa, jütisanü mari poriemü.

Paul Athen vü Küpeh

16Jüti sataji Paul nüh Athen vünüh Silas thi Timothi huopeküvehvü anyu jüla tü tsorhe mpa nüh proküveh ngu nü ma sietse tü ma lo vünüh küraküpre tewa. 17Jükenüh ma tü rülo tsotho künazizhe vünüh Judahri nga thi jüla khurü küveh küpari nga, thi asüküsape vü nga thari mütu naveh nüh sie rüluo peh. 18Epikuria thi Stoik vü zanyoküthsüri wuori nga ma mütu nü sierüluo. Thi wuori nüh, ajaküzhiwa hamatü mowa küzana saveh nüh, ti sa.

Küpari nüh, “Ma tü müküthsüri nyiaza kükhurü küsosieri kümüjie,” ti küza. Küpakenühnyunü ma tü Jisu thi kürholezhü küsosie kenüh. 19Jütisanü mari nüh ma shoh nü ma sie Areopagas vü ru nü, “Noh nüh küsosiezhü kürüthe vi hiri vü küüzawa hiri tü thsümühieveh ünü nyu lo?” ti küna. 20Küpakenühnyunü noh tü zanyo kürüthe viru hiri khüna vü thse, jükenüh zanyo jüri tü mowa nüh hiri nga thsü nthelie, ti küza. 21Athenri thi anyi alie vünüh ru jüla kürhori aveh tü tsothoküpa vünüh müküze nüh kühaluo thi küsosiezhü kürütheküüna vünüh tsotho küüze sa.

22Jütiküsavü Paul tü Areopagas zhila vü tsie taji, Athen nyiri, nohri tü anale vikümühieri ta küsa hi nüh zanyo aveh vünüh thsüra. 23Küpakenühnyunü hi nüh tse kari küru vü nohri nüh kükhurüperi ngura, thi kükhurü vü hakümjie nga ngu, “Müküthsü Saküüwuowa kenüh,” ta rhü saveh. Nohri nüh müküthsüwa kükhurü ta saküsawa mazhünyo hi nüh nohri vü küza naveh. 24#1 Kaj 8.27; Isa 42.5; Krr 7.48.Saküüwuowa azhih thi zanyo ma vü küperi aveh küsawa tü thajüwu thi azhih vü Vüwa sakümü kenüh anyira kenüh küsa kükhurüperi vü ma nü mpeh. 25Jümpa mükünyu ma tü zanyo müma nüh kürholi thi rüthoküsah thi zanyo aveh vi nyiri aveh vü tsüküveh kenüh. 26Thi ma nüh nyi küsü vünüh nyi rhoküveh aveh satsü, thi azhih aveh vü kürho nyiri satsü. Küütü vünüh mari rho na küsa tsothowa nga küte mütü thi mari kürhope azhiewa nga küte taji samütüthuoh. 27Mari tü Saküüwuowa küüphawie, thi küluozhe vünüh ma kümüngu nü ma küphara ti sana küsa kenüh. Thitü ma thuoüji hiri nyi küsüvü nga nüh kietuomüveh wie. 28Küpakenühnyunü wuori nüh küüza kümüjie:

ma vünüh hiri tü rhoveh thi küngaveh thi hiri kürholi peküvehkenüh;

Jüma zhüku tü nohri küriehiri wuori nga nüh küza,

küpakenühnyunü hiri wienga ma tsari wiethuoh,

ta küza saveh.

29Jükenüh hiri tü ma tsari sakümü kenüh hiri ma kürhowa tü suna nyutü aloh amekükhrawa nyutü aloh anyira kesie thi kümüshe kümüjie vi küsavüh nyu.

30Nyiri zanyomüküthsü vü thuoüji Saküüwuowa nüh ngu tü müküngu kümüjie nothoria mütüthuoh,

thitü khinyi thuoüji nyiri azhie aveh vü luoveh kükhaphrü zhü tsüvehthuoh.

31Küpakenühnyunü ma nüh Nyi küsü rüka küsawa nüh künyitsa vünüh azhihwa ashi sana küsa kenüh rülo küsü küchesamüthuoh;

thi nyi küsü sü taji nü saküürhole vünüh nyiri vü küzatomüthuoh.

32Thi mari tü küsüri kürhole zhüku küthsüra vü wuori nüh riesa kükhri, thitü wuori nüh, “Hama no vünüh küna lehü naveh,” ti küza. 33Jükenüh Paul tü mari vünüh alievü shutewa. 34Thi nyi wuori thuoüji ma se nyi nü tsotü, jümari azhie vünüh Areopagit ti küsa ashiküsape vü levüwa Dionisius thi nyimzawa ma nyo Damaris thi küpari nga mari se nyi nü tsotü.

Currently Selected:

KÜÜRORI 17: POCHBSI

Highlight

Copy