ZEPHANIAH 3
3
Jerusalemwui Morei kala Ngatangkhami
1Ngakaikashe, makhao kahaiya, kala singkakharenga keinung chi kalākashi ngasāranu!
2Ana khipākhawui akhon manganāmana,
mashungkhami makhuisangmana;
Ana Proholi machihānmana,
awui Vareli manganaimana.
3Awui otva̱bing kakhanganga kazingkha̱na;
awui bicharwobing ngathorshongwui vang
khikha mataikakhuia ngazinshongwui ramfana.
4Awui marānbinga ningkhān sāngailaka,
shitkasang makhaleiamānga;
awui pāngmonbingna kathara ot sāmakhaowa,
athumna ainla sakhai.
5Awui alungli khalei Prohova khamashung khangarongana,
ana khangui ot masāmana;
ngathor kachida awui mashun chithei,
zingthanlam kachida khavāt maleimana;
kha makathara china kakhayak matheimana.
6“Ina yurbing katathaira;
athumwui raipan sākazamserhaira;
ina athumwui shongfa sākathānmihaida khipākha chili mazatluimana;
athumwui keinung ramcho sāngasakhaira,
mi akhala maleimana,
ramnao akhala mapānluimana.
7Ina hānga, makahatlakla ana ili ngacheera,
mashungkhami ana khuisangra;
kala ina kahahāng chi ana theishingkhuira.
Kha athumna khamakhao ot kasāli ningsangmeihaowa.”
8“Chiwui vang eina ili ngarailu,
ina shākhi akha sāda nganingkāthang zimiksho chi” da Prohona hānga,
Kaja iwui tuitakva yurbing kazipkhuiki kajina,
wungrambing kharupkhuiki kajina,
iwui ningyāng makhaungwui mei thāda kasā,
iwui malungkhavāt katonga athumwuitungli heiror khavaina;
kaja iwui yuikashe malungvāt alungli okathui hupta shimānra.
9“Mha, chitharan mibingwui tuimatui mashun tui onmihaida,
athum saikorana Prohowui mingli ngakaora,
kala ali ning akha sāda otram ngatha̱ra.
10Ethiopiawui kong makānda ngapha̱yāng thuikahaibingwui naongalāva̱ ngarāna ili rāchigatra.
11Chithanghon nali makhayak ngasakluimara,
ili ngakaishida sākahai otsak chiwui vang;
kaja ina nathumwui alungwui eina lāngkasobing chi khuishokhaora,
kala iwui kathara phungreili nathum malāngsoluimara.
12Kaja ina nathumwui alungli malungkhanim kala ngahuirikahai miyur akha haimihaora.
Athumna Prohowui mingli ngayin khavai phāra,
13 #
Phon 14.5. Israelli nothākahaibing china khangui ot masāmara,
kakapik tui mamatuimara,
lah athumwui khamorli kachipat tui akhala masamphangmara.
Kaja athumna phāshak phashailaga ngayaipi ngayaipamra
kala athumli khipānakha mangachee ngasakmara.”
Ringkaphā Laa
14Pangda laa sālu, O Zionwui naongalāva̱;
horailu, O Israel!
Mathānlu kala naning tongda ringphālu,
O Jerusalemwui naongalāva̱.
15Nawuitungli bichar khalei chi Prohona khuithuimihaira,
ana nawui yangkashebingli kashamhaira Israelwui Awunga Proho chi nathumwui alungli lei,
nathumna makaphā chili mangacheeluimara.
16Chithanghon Jerusalemli hāngra:
“Mangacheelu, O Zion;
nawui pāng mangazan ngasakalu.
17Nawui Vare Proho nathumwui alungli lei,
raikhoka rai yuikhame chi;
ana nawui vang ringphāda mathānra,
nali awui leikashi alungli mirin kadhar miluishitra;
nawuitungli ana ringkaphāwui laa pangda vaora,
phanit phanaoli kasā thāda.
18Ka̱lākashi chi ina nawui eina khuishokhaora.”
chiwui vang mamaishiluimara.
19“Yanglu, chitharan nali singkakharengbing chili ina singra,
Ina phei katekbingli huikhuira kala horkahaibingli kazipkhuira,
kala ina athumwui kakhayak chi maikhayā onngasakta okathuili mingmayāng ngasakra.
20Ina nathumli manākakhui tharan,
ina nathumli shimli thanungmira;
kala nathumwui lan hanmilui kahai tharan,
okathuiwui miyur saikorana nathumwui mingkhamayāng shālaga masochikatra,” da
Prohona hānga.
Currently Selected:
ZEPHANIAH 3: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
