ZEPHANIAH 2
2
Ningatei khavai Kaphayat
1Rālu, rākazipserlu,
O kakhayak makathei yur,
2phanthui kahai māhik thāda nathumli makashamranglakha,
Prohowui sākashi malungkhavāt chi nathumwuitungli matāranglakha
Prohowui malungkathuiwui zimiksho nathumwuitungli matāranglakha.
3 Proholi phālu, ngalei hiwui malungkhanimbing,
awui kahāng khanganābing;
khamashung khangarong phālu,
kala ngahuiri kahai phākhuilu;
Prohowui malungkathui zimiksholi nathumli thummihaipai.
Israel Kuimareida Khalei Yurbing Kashimān
4 #
Isa 14.29-31; Jer 47; Ezek 25.15-17; Joel 3.4-8; Amos 1.6-8; Zec 9.5-7. Khikhalajila Gaza ramcho ngasāhaora;
Ashdodwui mibingli ngashunshong kashamshokhaora,
kala Ekronli angayung eina phurhaora.
5Yireipheili kapama, Chereth yur nathum kakhanang ngasāranu!
Prohowui tui china nathumli mamayāmana,
O Canaan, Philistinenaowui ngalei;
nathum akhala mashāklakla shimān ngasakra.
6Kala O shamadrupheiwui ngalei, na yaohomphung ngasāhaora,
yaokahombingwui seizat katimpam ngasāhaora,
kala yaoshangwui shim ngasāhaora.
7Shamadrupheiwui ngalei chi Judahshi shāk kahaibingwui shimlui ngasāhaora,
chili athumna yao hompamra,
kala Ashkelonwui shimli athumna ngazinshong ungngasāmkhuira.
Kaja Vare Prohona athumwui vang phaningmida athumwui shimlui hanmira.
8 #
Isa 15—16; 25.10-12; Jer 48; Ezek 25.8-11; Amos 2.1-3. “Moabnaona khamashāt kala Ammonnaona mana̱kashi
athumna iwui mibingli kathāda mana̱shi kala athumwui ngaleili matheikhamiwui pongli ina shāhaira.
9 #
Hao 19.24. Chiwui vang Moab eina Ammonnaobing Sodom eina Gomarrah thāhaora,
akhar mashokkapai ka̱shātmāng kaji kala machi kotkhavai,
makānkhanā lam ngasāchanghaora,
iwui shāk kahai mibingna athumli ngaponra,
kala iwui yurwui thishāk kahaibingna chili pānra,”
da saikorawui Proho, Israelwui Vare ina kahāngna.
10Hi athumwui langkasowui atheina,
khikhalajila athumna saikorawui Prohowui miyurli mautshitla mana̱shi.
11 Prohona athumli sāshilak eina sāra;
mha, okathuili khalei varebing saikorali ana khumngasakra;
kala yur kachiva̱na kachichāpamwui eina ali khoruma.
12 #
Isa 18. O Ethiopiawui mibing, nathumlila iwui raighai eina yortāra.
13 #
Isa 10.5-34; Nah 1.1—3.19. Kala ana atungshongwuitungli mamayāmada pāng khāngkāra,
kala Assyria sākazamhaora;
kala ana Nineveh ramcho sāngasakra,
siwuk thāda thengchenghaora.
14Seishang eina luiwukwui sāyur saikorana
chiwui alungthungli ngaleovaira,
chiwui keinungli ngaleihok eina khalāng sāsha pemra;
pawungna charfali khongra,
hangkhāna lamzanli khongra;
kaja awui cedarthing eina kasā ot saikora masaikonghaora.
15Hi nganongrei kahai leikhayā keinung akhana,
akhalatta, “Ilaka, ili lāngda khangatei maleiluimana”
da kahānga china.
Ramcho kathāda ngasāhao,
sāyurbingwui pikhavai ngasāhaira!
Ali rākhamakāna mi kachiva̱na kasirora,
kala pangkhum heimachita.
Currently Selected:
ZEPHANIAH 2: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
