ZEPHANIAH 1
1
1 #
2 Wung 22.1—23.30; 2 Thot 34.1—35.27. Hezekiahwui naomayara Amariah, Amariahwui naomayara Gedaliah, Gedaliahwui naomayara Cushi, Cushiwui naomayara Zephaniahli, Judahwui awunga Amonwui naomayara Josiahwui thotli, Prohona kahāng tuina.
Prohowui Bichar Zimiksho
2“Okathuili khalei ot saikora ina sāshimitserhaora”
da Prohona hānga.
3Ina mila sāyurla sāthatserhaora;
Ina yongkazata vānaobingla shamadruwui khaihla mashākmilakmara.
Ina makaphā makhayā chi sākazamhaora;
ina mikumoli okathuiwui eina katathaora,
da Prohona hānga.
4“Ina Judah kala Jerusalemli khalei saikorali pāng parra;
kala ina Baal varebingli khokharuma shākkahaibing eina meoma̱li khokharuma pāngmonbingwui amingla;
5shimtungli kānganinglaga zimik kachāng sirāli khokharumbing;
Prohowui mingli mingzailala Milcomwui ming eina shākhi kasābing;
6 Prohowui thi kashurwui eina sana̱thui kahaibing,
Proholi makaphābing kala awui pongli makhangathingbing katatserhaora.”
7 #
Hab 2.20; Zec 2.13. Proho VAREwui mangāli kasaikha pamlu;
kaja Prohowui zimiksho nganaihaira;
Prohona pha̱kaphayā akha ngarānhaira,
kala awui mibingli tharchikathaira.
8Kala Prohowui pha̱kaphayā zimiksholi—
“Ina otva̱bing kala wungnaobingli,
kala miyur khangateiwui kashankachon khangavaibinglila tandi mira.
9Chithanghon khāmongpheili ngawokkakābing,
kala akhavāwui shimli khangashao kala kateikazā eina kachipembing athumli ina tandi mira.”
10Chithanghon Khaih Ngaveiwui eina akhon akha shāra,
kakhane shimwui eina ringkhangā,
panglāk kahai akhon phungrāwui eina shāra.
11Chaplu, O keinungwui thukkhameishong kapamabing!
Kaja leihkhalon mi akhala maleiluimana;
lupāsā khān katama mi saikorali katathaira.
12“Chitharan ina thaomei singlaga Jerusalemli phāra,
khalatta ningyāngkhaung kala ningnganungda Prohona kaphā otla zakkashi otla masāmara,
da kaphaninga athumli tandi mira.
13Athumwui otbing ngaponkhuihaora,
kala athumwui shimla khikha masā khavai ngasāhaora.
Athumna shim sālala chili athumna mapamara;
athumna drakhā yāmgui vālala drakhāra̱ khamang masamphangmara.”
14 Prohowui kahaka zimiksho chi nganaihaira,
nganaihaira, thaklāk eina rārāli;
Prohowui zimikshowui akhon chi khāshihai,
pangshapa mi chi chili ngavao tarangra.
15Malungkathurwui zimiksho chi chithangna,
sipkasā eina reokharangwui zimikshona,
sākakazam eina sākashimān zimikshona;
muiyā eina tangmangting kahaiwui zimikshona,
16raipan ngaveiphin kahai keinung kala hakkhamahā ngararphungli
talla̱ kakhong eina raikhon khangavao zimikshona.
17Ina mibingwuitungli sipkasā khuirāra,
chithāda athumna mik khangapeo thāda zatra,
khikhalajila athumna Proholi morei sāhaira;
athumwui ashee chifa thāda heitha̱ra,
kala asā seipaih thāra.
18 Prohowui malungkathui zimiksholi,
athumwui lupāsānala,
sinānala mangatangkhuirarmara,
awui yuishātwui malungkhavāt alungli okathui saikora shimān ngasakra.
Okathuili khalei saikora kashuirak hunkhawui alungli shimān ngasakra.
Currently Selected:
ZEPHANIAH 1: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
