HABAKKUK 3
3
Habakkukwui Seihā
1Shigionothwui athishurda, Habakkuk Marānwui seihā kasā.
2O Proho, ina nawui pao shāhaira, kala O Proho,
nawui otsakli ngachee.
Zingkumbingwui alungli shokngasakmiluishitlu;
zingkumbingwui alungli chitheimiluishitlu,
malungkhavāt tharan khalumashanmilu.
3Varena Temanwui eina rai,
kala Kathara china Paran Phungreiwui eina rai.
Awui tekhamateina kazingram pei kala okathui awui masotna pema.
4Awui kahān chiya kahor tākamhai,
apāngwui eina zingrān shoka;
kala chili awui pangshap thumhai.
5Awui mangāli kazātkashi rai,
kala mimaona yunronda shurzata.
6Ana nganingda okathui hi ngatama;
kala yurbingli yanglaga khanuka;
chieina makhangachei kaphung khareirei ngapha̱yānghaowa,
katang makhavai kaphungnanao ngasunzanghaowa.
Awui pangshap achālakhawui chichinga.
7Cushan shimkhurwui sipkasā ina thei;
Midian ngaleiwui chonrān nganuka.
8Nawui malungkathui kongbinglilā O Proho?
Nawui malungkhavāt chi kongbinglilā,
chikā shamadruli malungkakangkhala,
nana nawui sigui, khayuiyawui siguigari katong tharan?
9Nana nawui malākhorwui eina malā khuishokta malāthing khara̱li parhaira.
Nana okathui ngachakkhaida kong longngasaka.
10Kaphungbingna nali theida reoranga;
tara̱na kungkung longa;
kathuka ngayina ngaphaokāda,
akhon ngarungninghai.
11Nawui malā kāpkharāwui kahān,
nawui kazei pharkharāwui khangashei theilaga,
zimik eina kachāngna kachichāwui apamli ngasāmhaowa.
12Nana malungvātta okathuili makānvai,
nana malungvavāt eina yurbingli naikazama.
13Nawui miyurli huikhui khavai rai,
nana neomi kahaiali huikhui khavai.
Nana makaphā makhayāwui kui naikhaiya,
khaishāng eina thuilaga akahung eina tangda khamasai eina haimi.
14Ili sakathān khavai surkakhaning thāda kharā,
kala kachāmbingli ngathumda tukshaiki kajiwui ringkaphā thāda kharā
raikhokabingwui kuili nawui zeipa̱ eina phara.
15Nana shamadrutungli nawui sigui eina naikazamda,
hakkhamahā tara̱ malaokai.
16Ina shālaga iphasā kathira,
akhon chi shāda imorchai kathira ara̱kui makazang thāda, pheila makārthukthuwa.
Ithumli rai rākatā athumwuitungli kachotkachāng kharā atam chi ina kasaikha honsāra.
17Khaorārongna awon mawonlala,
drakhārongna mamatheilala olive heiun maunglala,
luili zāt mashoklala,
yaoshimli yao mazanglala,
seishimli sei maleilala;
18 Prohowui mangāli I mathānchingra,
Huikhame Varewui mangāli I ringphāchingra.
19 #
2 Sam 22.34; Laa 18.33. VARE, Proho iwui pangshapana;
ana iphei chaowui kathāk thāda sāmi,
ana ili kajujuipamli zatngasaka.
Currently Selected:
HABAKKUK 3: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
