HAGGAI 1
1
Khorumshim Sakālui khavai Kakaso
1 #
Ezr 4.24—5.2; 6.14. Darius awungana mungda zingkum kakhanewui kachāng katharuka, zimiksho kharethang, Prohowui tui china Haggai marānwui mangā eina Judahli khamunga, She-alti-elwui naomayara Zerubbabel kala Jehozadakwui naomayara pāngmon kharei Joshuali rāhānga, 2“Ashangva̱wui Prohona hithāda hānga: Prohowui shim sakāluiki kaji atam marāranga da mibingna hānga.” 3Chiwui thili Prohowui tui chi Haggai marānna hānga, 4“Khorumshim kaikhayāngda khalei theitheilaga nathum khalatta sākharirik kahai shimli kapam atamla? 5Chieina saikorawui Prohona hithāda hānga: Nathum kathāda sāhairakhala kaji machukyanglu. 6Nathumna kachungkha yaosanga kha kateokhamang hātkhui; nathumna zālala kapen mavaimana, nathumna manglala machirlakmana; ngavailala khipākha khalum masamphangmana; ngalang pheikhuilala akhur khawutta khaoli pheisānga. 7Ashangva̱wui Prohona hithāda hānga: Nathumna kathāda sāhairakhala kaji machukyanglu. 8Kaphungli kāda thing akhuilaga shim chi sakālu, chieina ina chiwui vang ringphāpaira kala iwui tekhamatei eina rāchitheipaira da Prohona hānga.
9“Nathumna kachungkha samphang khavai phai, kha yanglu, kateokhamang ngasāhaowa; kala nathumna chi shimli khuikhaung tharan, ina malitāmihaowa. Khiwui vangkhala? da saikorawui Prohona hānga. Kaja nathum khalatta kachichā shimwui vang ngalang zārda ot sālaga, iwui shima ja̱tāda lei. 10Chiwui vang eina atungshong khalei kazingna ikra̱ matāmimana, kala ngaleina athei mamatheimimana. 11Kala ina ngaleitungli, kaphungtungli, theishiraiwuitungli, drakhāra̱ kadhartungli thaowuitungli, thingnā-ra̱hāwuitungli, miwui kala sha̱keiwuitungli, kala athumwui ot kasā saikorawuitungli ina kazing kāngkhavai kasohaira.”
12Chithāda She-alti-elwui naomayara Zerubbabel, kala Jehozadakwui naomayara pāngmon kharei Joshuana, miyur chiwui shākkahai saikorali ngasoda athumwui Vare Prohowui tui chi nganai, kala Haggaiwui tui chi ali athumwui Vare Prohona chihokharāna da theilaga khuisanga; kala mibing china Prohowui mangāli ngacheeda shitsanga. 13Chiwui thili Prohowui paopho Haggaina, “Ina nathumli ngasodalei”, da Prohona kahāng pao chi athumli hāngchithei. 14Kala Prohona She-alti-elwui naomayara Judahwui khamunga Zerubbabelwui ning, kala Jehozadakwui naomayara pāngmon kharei Joshuawui ning kala mibing chiwui shākkahaiwui ning ngatha̱ ngasakta; athumwui Vare saikorawui Prohowui shim chi sāphoka, 15chi kachāng katharukawui zimiksho maga̱da khamate thangna.
Currently Selected:
HAGGAI 1: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
