HAGGAI 2

Kadhara Khorumshimwui Tekkhamatei

1Darius awungana mungda zingkum kakhane, kachāng kashinewui zimiksho maga̱da kharethang Prohowui tui chi marān Haggaiwui eina samphanga, 2Ara tui hi She-alti-elwui naomayara Judahwui khamunga Zerubbabel, Jehozadakwui naomayara Joshua kala nganingshing kahaiya saikorali hānglu, kaja, 3“Nathumwui ngachaili shim hiwui kharewui tekhamatei kathei khipā tailikhala? Ara nathumna kathāda theili? Nathumwui mikyanli khikha makhaninga mathāmala? 4Chithālala ara malung pinglu, O Zerubbabel, da Prohona hānga; malung pinglu, O Jehozadakwui naomayara pāngmon kharei Joshua; malung pinglu ngalei hiwui mi saikora, da Prohona hānga; ot sālu, kaja ina nathumli ngasomida lei, da saikorawui Prohona hānga, 5#Sho 29.45-46. kaja nathumna Egyptwui eina kashok tharan ina tuingashit sākahai athishurda nathumli ngasomida lei. Iwui manglā nathumwui ngachaili pamda lei; mangacheealu.

6 # Heb 12.26. “Kaja saikorawui Prohona hithāda hānga: Khaleilaga ina kazingram, apuk-apaga, shamadru kala ngalei katheng khanukluishitra; 7kala yur saikora ina khanukra, chithāda sāda yur saikorawui lan chi rāzangra, kala ina shimhi tekhamatei eina chipemra, da saikorawui Prohona hānga. 8Lupā hi iwuina, kala sinā hila iwuina da saikorawui Prohona hānga. 9Sakākhanaowa shimwui tekhamatei china kharewuili mataimeira, kala apam hili ina shāngngasakra da saikorawui Prohona hānga.”

Marānna Pāngmonbingli Khangasan

10Dariusna mungda zingkum kakhane, kachāng kachikowui zimiksho maga̱da khamatethang saikorawui Prohowui tui marān Haggaili rāhānga, 11“Ashangva̱wui Prohona hithāda hānga: Tui hi chukmaja̱ khavai pāngmonbingli ngahānlu; 12Kalikhada mi akhana chigat kahai kathara sā kachonmareili romkhuilaga awui kachon china khamuili nilala, hanli nilala, zamli nilala, thaoli nilala kashakazā kali-kalikhali nilala sākaza̱ chi tharmathenghaorala?” Pāngmonbing china ngahānkai “Maningmana.”

13 # Mis 19.11-22. Chieina Haggaina hānga, “Kathingunli sāza̱haida makhao kahai akhana hibingwui ngachai akhali sāza̱haiakha chi makathar onhaorala?” Pāngmonbing china ngahānkai, “Chi makathar onhaowa.”

14Chiwui thili Haggaina hānga, “Chithāda sāda mibing hila chithai, kala iwui mangāli khalei yur hila hithai, da Prohona hānga; chieina athumwui pāng eina sākahai ot saikorala chithai; kala athumna chili kachigat chi makatharana.”

Prohona Awui Sokhami Ngashitkhami

15“Seihā sālu kala aja eina thuilaga naoda khi shoknikhala kaji phaningyanglu. Prohowui shimli lunggui akhawuitungli lunggui akha maparranglakha 16nathum kathāda sāsākhala? Mi akhana shung maga̱ kazipkhuingai, kha shung tharāmāng samphanga; akhana drakhāra̱ surkhavaipamli khokthi hangphangā sokkhui khavai rai, kha maga̱māng samphanga. 17Ina nathumli kala nathumwui theishiraili sākazāt rāngasaka, theihla kachungkha tāngasaka; kha nathumna ili malatungmana da saikorawui Prohona hānga. 18Aja kachāng kachikowui zimiksho maga̱da khamatethang hi eina thuida yangphoklu. Prohowui khorumshim shimphunga haokaphok zimiksho eina thuilaga yangkhuilu: 19Athā chi arui eina tangda zātshimli leila? Drakhārong, khaorārong, kabotheirong kala oliverong arui eina tangda athei mamatheirangla? Aja eina thuida ina nathumli somira.”

Zerubbabelli Ngashitkhami

20Kachāng chiwui zimiksho maga̱da khamatethang Prohowui kakhane tui Haggaili ralui, 21“Judahwui khamunga Zerubbabelli hānglu kaja ina kazingram kala okathui khanukki jihaira, 22kala wungrambingwui wungpamkhong khuishoki jihaira, yurbingwui wungram yāng pangshap shimān ngasaki jihaira, kala siguigari eina sigui katongbingli sākazamki jihaira kala siguila, katongbingla mi kachiva̱ kachichāwui ngasotawui raighaili pitāra. 23Chithanghon ina nali khāngkhuira, O Shealtielwui naomayara, iwui rao Zerubbabel, da saikorawui Prohona hānga, kala ina nali shoi-khutop akha thāda singra; khikhalajila ina nali kapangkhui kahaina, da saikorawui Prohona hānga.”

Currently Selected:

HAGGAI 2: TANGBSI

Highlight

Copy