ZECHARIAH 9
9
Khongnai Yurbingwui Bichar
1 #
Isa 17.1-3; Jer 49.23-27; Amos 1.3-5. #Isa 23.1-18; Ezek 26.1—28.26; Joel 3.4-8; Amos 1.9-10; Mat 11.21-22; Lk 10.13-14. Prohowui tui china Hadrach ngaleili mamayāmana,
Damascuswuitungli ngasāmra.
Kaja Aramwui keinung saikora,
Israel shang saikorala, Prohowuisera.
2Chili thari sāda khalei Hamathla thangmeilala Tyre eina Sidonla zanga.
3Tyrena raikānphung akha sakāhaira,
kala lupāsā chifa thāda,
sināla shongfawui chifa-chihā ngayāda kazipkhui.
4Kha yanglu, Prohona awui khalei ngapaikhuihaora,
kala awui lan shamadruli horsanghaora,
kala ali mei eina shimān ngasakra.
5 #
Isa 14.29-31; Jer 47.1-7; Ezek 25.15-17; Joel 3.4-8; Amos 1.6-8; Zep 2.4-7. Ashkelonna chi theira, kala ngacheera,
Gazala chotta reorangra;
Ekronla kachihān maungshungmada chithāra.
Awungana Gazawui eina shimānhaora.
Ashkelonli mi masomluimara.
6Khamānga yurna Ashdodli pānra;
kala Philistiawui lāngkaso chi ina ngalat ngasakra.
7Mashaikhangayi kashakazā kala ashee kazanga asā athumna mashailuimara,
shākkahai mi saikora Varewui ngasāra,
Judahwui shang kathā ngasāra,
kala Ekronna Jebusnao kathā thāra.
8Chiwui thili iwui shimli ina kashina sāda pamra,
chithāda khipānakha mashok mazangpaimara;
singkakharengana athumli khikha masāthukmara,
kaja ina imik eina theihaira.
Rārāda Khalei Awunga
9 #
Mat 21.5; Joh 12.15. Ringphālu, O Zionwui naongalāva̱!
Pangda vaolu, O Jerusalemwui naongalāva̱!
Yanglu, nawui awunga gadhā alānao akhali tongda nawuili rārāli;
maikhayā kala khayuiya chi alaka,
10 #
Laa 72.8. Ephraimwui eina siguigari,
kala Jerusalemwui eina raisigui ina katathaora.
Kala ngararphungwui malā chi katathaida,
ana yurbingli chingrihai khavai kasora;
Shamadruwui eina thuilaga shamadru vāshungda,
Kong chiwui eina thuilaga okathui akatanga
eina tangda ana mungra.
Zionli Khuikasang
11 #
Sho 24.8. Nawui vangla, ashee eina ini tuingashit sākahaiwui vang,
tara̱ makhalei chomwui eina nawui tuknar kahaibingli ina chihomira.
12Nawui raipanli latunglu, O kachihān khalei phātopnaobing;
khanishida mataida hanmira da aja ina hāngtā kahaina.
13Kaja Judahli ina malā thāda hunhaira;
Ephraimli chiwui malāthing sāngasakhaira.
Ina nawui naomayarabingli khayitra, O Zion,
nanao mayarabingwuitungli O Greece,
kala nali raimi akhawui khutlai thāda singtitra.
14Chiwui thili Prohona athumli rāchitheira,
kala awui malāthing rikhān thāda vāra;
Proho VAREna talla̱ khongra,
kala azingshongwui sur kakhaningwui ngachaili muivāra.
15Saikorawui Prohona athumli makānmira,
kala athumna lunggui eina kahorbingli tukkhuilaga naitāhaora;
kala athumwui ashee drakhāra̱ khamang thāda mangra,
tengkot kapem thāda pemtinghaora,
hanphutwui achikunbing thāda ya̱sophaora.
16Chithang Proho athumwui Varena athumli huikhuira;
kaja athum awui yaoshangwui mibing kathāna;
kala kuihonwui muktā thāda awui ngaleili horngasakra.
17Mha, chi kayākha phā, kayākha mathāra!
Mayar ngalābingli theishirai kala kadhara drakhātheina pangsang ngasakra,
kala mayā ngasakra.
Currently Selected:
ZECHARIAH 9: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
