ZECHARIAH 10
10
Ngatangkhui khavai Prohowui Khangashit
1Kazing romi khavai Proholi polu,
mayo kachāngwui zingrot atamli,
zingrot muiyā ngakhuikhame Prohowui eina,
miwui vang kazing rokhame,
mi saikorali luiwui theishirai khameli.
2Kaja Teraphimna makakachanga tui matui,
kameo khangasobing kapika,
mang katheibingna kakapikmāng hānga,
ninglum khavai hangphāphai.
Chiwui vang eina mibingna yao thāda ma̱zata,
yaokahoma maleithuda athumna khananga.
3“Yaokahomabingli I malungvātshunhaira,
kathānabingli ina tandi mira;
kaja saikorawui Prohona awui yaonaobing,
Judahwui shimkhurli saklāk eina yangmi,
kala athumli maikhayā raiphungwui sigui kathā sāngasakra.
4Athumwui eina pakra̱ akhoka,
athumwui eina kachonshimwui karhui,
athumwui eina raiwui malā,
athumwui eina awunga shokra.
5Athum ngarumlaga raili kapingabing thāda;
yangkashebingli chānrei khangavāttungli nairorra;
Prohona ngasokhamiwui vang athumna ngararra,
kala athumna sigui katongbingli pa̱ngapā ngasakra.”
6“Kala Ina Judahwui shimkhur pang ngasakra,
kala ina Josephwui shimkhurli huimira.
Athumli ina khuiungluishitra kaja ina athumli lumashana,
kala athum ina mahorhailakrang kajebing thāra;
kaja I athumwui Proho Varena,
kala ina athumli ngahānkāmira.
7Chieina Ephraim raikhoka kathā ngasāra,
kala drakhāra̱ khamang thāda ringphāra.
Anaongarāna thuitheida mathānra,
athumwui wuklungna Proholi mathānkhailakra.
8“Ina athumli machut eina hokhuilaga kazipkhuira,
aja ina athumli ngatangkhui kahaina,
kala achālakhawui kachung chiyākha kāshungra.
9Athumli yurbingwui ngachaili chaivāhailala,
ngalei katātāva̱wui eina athumna ili phaningungra,
athumwui naongarāli ngasoda ringra kala latungra.
10Ina Egypt ngaleiwui eina athumli shimli thānungra,
kala athumli Assyriawui eina kazipkhuira;
kala athumli ina Gilead kala Lebanonli khuiungra,
apam mangaziranglakha eina tangda.
11Athumna Egyptwui shamadru kānkāra,
shamadru mangaphao ngasakmara;
Nilewui kathuthuk thenghaora.
Kala Assyriawui lāngkaso chi nemngasakra;
Egyptwui khānthing shimānhaora.
12 Prohowui mangāli ina athumli pingngasakra,
kala athumna awui mingli tekmatei ngasakra”
da Prohona hānga.
Currently Selected:
ZECHARIAH 10: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
