ZECHARIAH 11
11
Sākashe Khamungabing Kongkhalui
1Nawui khāmong sholu, O Lebanon,
nawui cedarthing mei chuikhavai!
2Sifalu, O cypress, kaja cedarthing tekhaira;
kaja tekhamatei thingrong arema sāserhaira.
Sifalu, Bashanwui shirimthing,
kaja ngahong kashāshā wuthaira.
3Nganālu, yaokahomabingwui kachapkhon,
kaja athumwui seihomphung chuikhup tāhaira,
kazingkha̱wui kakhangang nganālu;
kaja Jordanwui ngahong sāshimānhaira.
Yaokahoma Khani
4Iwui Vare Prohona hithāda hānga: “Taithat khavai yao ashangvawui kahoma ngasālu. 5Athumli khalobing china taithāta khikha tandi mamimana; kala athumli khayorbingna ‘Proholi solu, I shānghaira’ da hānga, kala athumli kahomabingna athumli lukhamashan maleimana.”
6“Kaja ngalei hili okathuibingli ina malumashanluimara, da Prohona hānga. Yanglu, mi kachiva̱ kachichāwui yaokahoma kala kachichāwui awungawui pāngli pitā ngasakra; kala athumna ngalei hi sākazamra, kala ina athumwui pāng eina makanmimara.”
7Chieina I leihkhalon athumwui vang sāthatki kaje yaobingli kahoma ngasāhaira. Kala ina khāmshui khani khuiya; akhale aming Lukhamashan hoi kala akhapale Khokkha hoi. Kala ina yaobingli homa. 8Kachāngkhawui alungli ina yaokahoma kathum shimān ngasaka. Kha ina athumli maja̱mirarthuwa, kala athumnala ili yangkharinghaowa. 9Chiwui vang eina “I nathumwui yaokahoma masāmara. Thiki kaje chi thihaoranu; shimānhaoki kaje chi shimānhaoranu; kala kataibing china akha eina akha shaingarokhaoranu,” da ina hānga. 10Kala Lukhamashan kaho iwui khāmshui chi ina khui kala chi ina sātekhaowa, ina saikorali tuingashit sākahai chi arema sāngasaka. 11Chithang eina thuida arema sāhaowa, kala yao leihkhalonbingna ili yanglaga hi Prohowui tuina da thei. 12#Mat 26.15; 27.9. Chieina ina athumli hānga, “Nathumnala mashunga da phaningakha iwui ngalangman milu; maningakha thāhaolu.” Kala athumna iwui ngalangman lupāsā shekel thumra shānmi.
13Chieina Prohona ili hānga, “Chi lupāchumli sanghaolu”— athumna ili pāngtonglak eina khami chi. Chieina ina lupāsā shekel thumrā chi khuilaga Prohowui shimwui lupāchumli sanghaowa. 14Chiwui thili iwui khāmshui kakhane “Khokkha”, chi sāteka, Judah eina Israelwui ngachaili chinaongarāwui khamashit chi sāshimitmihaowa.
15Chieina Prohona ili hānga, “Makankhanā yaokahomawui khutlai akhashida singluilu. 16Kaja yanglu, kashimānbingwui vang ning makakharika, ma̱kazatbingli maphākhuikhame, sheikasha̱abingli mayangkhame, kazāt makhaleibingli mangakuikhame, kha asā kakā kapangshaida akhomareng eina tangda serkakazama yaokahoma akha ina shokngasakra.”
17“Makānkhanā iwui yaokahoma,
yao chipen kahai, nali kakhanang ngasāranu!
Awui pāngthei kala yāmikla raighai eina shātranu!
Apang tongda thihaoranu, awui yāmik ngapeochanghaoranu.”
Currently Selected:
ZECHARIAH 11: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
