ZECHARIAH 12
12
Jerusalemli Ngatangkhuiki kaji
1Israelwui pongli Prohona kahāngna: Kazingram phayaikashoka, okathui rungkhame kala mili manglā semsangkhame Prohona hithāda hānga: 2“Yanglu, ina Jerusalem hi kuikhamareili khalei miyurbingwui vang khamalipa tengkot ngasā ngasakra; athumna Jerusalem khuida kuikhanam tharan Judahlila khuihaora. 3Chithanghon Jerusalem miyur saikorawui vang ina kharita lunggui sāngasakra; chi kakhānga saikora zakshilāk eina khalatta khamā sāza̱khuira. Kala okathuiwui miyur saikorana rāda ali ngararra. 4Prohona hānga, chithang ina sigui kachiva̱li khangachee ning zangngasakra, kala katongbingli pāngasakra. Kha ina miyurbingwui siguimik ngapeo khangasak tharan Judahwuitungli iwui mik rakta yangmira. 5Chiwui thili Judahwui shangnaobingna athum khalatta hāngra, ‘Athumwui Vare, saikorawui Prohowui mangā eina Jerusalemnaobingna pangshap samphanga.’
6“Chithang Judahwui shangnaoli ina ngahongkashā kachuiwui meiwon thāda, māvāmbingwui ngachaili meilā kashār kathā sāngasakra; kala athumna uivāk yāvāk kuimareida khalei miyurbingli mutngasakra; kha Jerusalemli Jerusalemnaobing leipapamra.
7“Kala Prohona Judahwui shimkhurli maikhayā rida mira, chieina David shimkhurwui tekhamatei kala Jerusalemli pamda khaleibingwui tekhamatei china Judahwuili majuimeimara. 8Chithanghon Prohona Jerusalemli kapamabingli chāngvei akha eina ngākmira, kala athumwui ngachaili ngazanmeithuikaje china David thāhaora, kala Davidwui shimkhurna Vare thāda athumwuitungli khalei kazingraobing thāhaora. 9Kala chithanghon Jerusalemli khangarara yur saikorali ina shimān khavai phāra.
10 #
Joh 19.37; Phon 1.7. #Mat 24.30; Phon 1.7. “Davidwui shimkhurli kala Jerusalemli kapamabingli ina lumashankathei eina seihā sākatheiwui manglā heirormira, chieina athumna rungthat kahaiapā chili khayang tharan athumna naoho-naotongli chapkhangachā thāda chapngachāra, kala naochizai thikahai thāda ningchotlak eina chapra. 11Chithanghon Jerusalemli chapkhangachā chi Megiddo tampākli Hadad-rimmonli chapngachārei kahai thāra. 12Apam chili chapngachāra, shimkhur kachiva̱ kachichāshi chapngachāra; Davidwui shimkhurna ashi khalatta chapngachāra; kala apreiva̱̱ ngarāna athum khalatta chapngachāra; Nathanwui shimkhurna ashi khalatta chapngachāra; kala athum preiva̱̱ ngarāna khalatta chapngachāra, 13Levi shimkhurna ashi khalatta chapngachāra kala athum preiva̱̱ ngarāna athum khalatta chapngachāra; Shime-ishi shimkhurna ashi khalatta chapngachāra, kala athum preiva̱̱ ngarāna athum khalatta chapngachāra; 14kala shimkhur khangatateila kachichāshi khalatta chapngachāra, kala athum preiva̱̱ ngarāna athum khalatta chapngachāra.
Currently Selected:
ZECHARIAH 12: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
