ZECHARIAH 7
7
Ningmakathar Kakhum
1Awunga Dariusna mungda zingkum khamate, kachāng kachiko kaja Chislev kachāng, zimiksho khamatethang, Prohowui tui Zechariahli rāhānga.
2Kaja Bethelwui mibingna Sharezer eina Regem-melechli ngasoda mi kachungkha Prohowui lukhamashan pokhavai chihoi, 3kala saikorawui Prohowui shimli khalei pāngmonbing eina marānbingli ngahān khavai chihovāda hānga, “Zingkum hirankha ina sākharā hithāda, kachāng kaphangāli chapta khumluirala?”
4Chieina saikorawui Prohona ili rāhānga; 5“Ngalei chiwui mi saikora kala pāngmon saikorali hānglu, Nathumna kachāng kaphangā eina kashineli zingkum hangshini khumda kachap chi, iwui vangla? 6Kala nathumna kazā tharan kala khamang tharan, nathum khalattawui vang kazā kala khamang maningmala?”
7Jerusalemli kala kuimareida khalei keinung kachiva̱ kashakazā mavātlakla okthuikasā azingshongla, tampāklila pānkasa chi Prohowui tui, paokazatbingna hāngmihaikasā maningmala?
Raikathā, Kahāng Makhanganāwui Athei
8Kala Prohowui tui chi Zechariahli rāhānga, 9“Saikorawui Prohona kahāngna: Khamashung bichar sāmilu, lumashantheilu kala kachichāwui achināli ningshi ngaroklu, 10ra̱meinaoli, avāva̱ makhaleibingli, kha̱mili, lah kachāmali marekhareklu; kala nathumwui alungli mi khipākhana achināwuitungli makaphā ning maphumhaialu.
11“Kha athumna manganāsanglakla hiksor nātengseng eina thuihaowa. 12Saikorawui Prohona awui Manglā eina achālakhawui marānbingli chihoda rākahāng tui kala ain chi shāpaishina da athumwui wuklung lunggui thāda makang ngasaka. Chiwui vang eina ashangva̱ Prohowui eina malungkhavāt rai. 13Ina vaolaga athumna makashā thāda, athumna vaolala ina mashāmimana, da saikorawui Prohona hānga. 14Kala sur kakhaning eina athumna matheikasā yur saikorawui ngachaili chaiyāngmi kahaina. Hithāda sāda athumna chiho kahai ngalei chi ramchohaoda khipākha zatung zatvā masāmana, kala ringkaphā apam chi ngaleikhamor sāngasak kahaina.”
Currently Selected:
ZECHARIAH 7: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
