ZECHARIAH 13
13
1“Morei kala makathar otwui eina samathā khavai, chithanghon David shimkhurwui vang kala Jerusalemnaobingwui vang ura̱ akha shokmira.
2“Kala chithanghon ngalei hiwui eina meoma̱bingwui aming ina katathaida athumli maphaningungluimara; kala ngalei hiwui eina marānbing kala makathara manglāla kashamhaora da saikorawui Prohona hānga, 3Kala kachikathāna marān sāda rāluishitakha ali pharākakhuiya ava̱ eina avāva̱na hāngra, ‘Na maringmara, kaja nana Prohowui ming eina kakapik tui matui.’ kala ali pharākakhui ava̱ eina avāva̱na ali khamarān ot sāda leilakha rungthathaora. 4Chithanghon khamahā khamarān chitharan marānbingna chiwui vang khayakra; ana kapik khavai sāhahwui katuma phahon chi masangmara, 5kha ana hāngra, ‘I marān maningmana, kha luikhavā mina; kaja ngalei hi nganuilakhawui eina thuida iwui ngasārā kahaina.’ 6Kala mi kachikathāna, ‘Nawui khumkhorli khamā kakā chi khikhala?’ da ngahānakha ana, ‘Iwui ngasotnaobingwui shimli leilakha sākaza̱na’” jira. 7#Mat 26.31; Mk 14.27. O raighai, iwui yaokahomali thuingasunglu,
ili khangalengpa chili ngasunglu
da saikorawui Prohona hānga.
“Yaobing chaiyanghai khavai yaokahomapā chili ngaphitlu;
kateonaobingli ina pāng parra.
8Ngalei katongawui khum kathumwui khani katathaida shimānhaora,
kakathuma khum chimāng ringra, da Prohona hānga.
9Kala akhum kakathuma hi ina meili sangra,
lupāsā heikakhui thāda heikhuira kala sinā khayāng thāda yāngkhuira.
Athumna iming ngakaora,
kala ina athumli ngahānkāra.
kala ina ‘Athum iwui miyurna’ jira;
kala athumna Proho iwui Varena” da hāngra.
Currently Selected:
ZECHARIAH 13: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
