ZECHARIAH 14
14
Jerusalem eina Yurbing
1Yanglu, nawui eina ngaponkakhui ot chi nawui miktāli ngayarki kaji Prohowui zimiksho rārāli. 2Kaja Jerusalemli rai sākhavai yur saikorali ina kazipkhuira, kala keinung chi khuithuihaida, shimla ngaponkhuira, sha̱naobingla sākhamāngmihaora; keinung tangkhai raikathāli vāhaora, kha taikahaibing chili keinungwui eina makatatmara. 3Chiwui thili rai sāthang khangarar thāda Prohona yurbingwuitungli ngarar khavai vāra. 4Chithanghon awui phei Jerusalemwui mangāli zingshoshong khalei Olive Kaphungli nganingra; kala Olive Kaphung chi khani sāda zingsho eina zingtun ngachaili tampāk kahakva akhana ngakaipakhaora; chieina Phungrei chiwui tangkhai atungshong ngakhunshanghaora, kala tangkhai azingshong ngakhuntāhaora. 5Nathumna phungrei khani sāda ngakai khavai tampāk eina yāmshokra; nathumna navā ngarāna Judahwui awunga Uzziahwui thotli neina̱ kakhanukli khayām thāda yāmra. Chiwui thili Proho nawui Vare rāra, kala katharabing ali ngasoda rāra.
6Chithang kasik maleimara, phāmla matāmara. 7Khangayā mavaimara (chi Prohona katheina), ngashun ngayā maleimara, ngazinla kahor leira.
8 #
Ezek 47.1-12; Phon 22.1-2. Chithanghon kharinga tara̱ Jerusalemwui eina urshokra, tangkhaina zingshowui shamadruli, kala tangkhaina zingtungwui shamadruli longvāra; sikachāngwui thāda lumkachāngla chithāchingra.
9Kala Prohona okathuiwuitungli awunga sāra; chithanghon Proho akhamāngra kala amingla akhamāngra. 10Jerusalemwui azevāk khalei Geba eina thuilaga Rimmon eina tangda ngalei katonga chi tampāk akha onhaora. Kha Jerusalema, Benjaminwui Ngavei eina thuilaga kharewui ngavei vāshung, Achithek Ngavei vāpeida, kala Hananelwui Raikānphung eina thuilaga awungawui drakhāra̱ surkhavaipam vāshungda, awui apamli ngakheikhang eina leipapamra. 11#Phon 22.3. Kala chili mi pānra, kaja chili khonkashi maleiluimara; Jerusalem mirai-sārai mavailuimara.
12Jerusalemli rai rākatā yurbing saikorali Prohona mimao rāngasaki kaji chi hina; athumna phei eina nganingda leilakha aphi shuihaora, mikla alungli kala athumwui malela khamorlungli shuihaora. 13Kala chithang hakkhamahā khangachee akha Prohowui eina athumwuitungli tāra, ngasotnao eina ngasotnao pāng kāngarokra, akhana akhali ngasungra, 14Judah eina tangda Jerusalemli ngararra. Kala kuimareida khalei yur saikorawui lan, sinā, lupāsāla kala kashankachon yāng eina kazipkhuira. 15Kala hikathā mimao hi sigui kahaka yur, kateowa yur, ut, gadhā, kala apam chili khalei sāyur saikorawuitungli tāra.
16 #
Pāng 23.39-43. Chiwui thili Jerusalemli ngarar khavai kharā yur saikora chiwui eina ringkasā mi kachiva̱na kum kachida saikorawui Proho, Awungali khorum khavai kāra, kala chumpha̱ phanit chi mayonra. 17Kala okathuiwui shimkhur kachikathāna saikorawui Proho Awungali khorum khavai Jerusalemli makaakha athumli kazing marotāmimara. 18#Isa 19; Jer 46; Ezek 29—32. Egyptwui shimkhurna athum khalatta marākaakha, chumpha̱ phanit makhamayon yurbingli rekakhareka mimao chi athumwuitungli tāra. 19Chumpha̱ phanit mayon khavai makharā Egypt kala yur saikorawui tandi chi hina.
20Kala chithanghon siguiwui mareochungtheili “Proholi Kathara ngasāranu” da kapisangserra. Kala Prohowui shimli khalei hambing chi hanphut mangāli khalei tengkotbing thāserhaora; 21Kala Jerusalem eina Judahwui ham kachiva̱ saikorawui Prohowui mangāli kathara ngasāda pha̱kaphayā mi saikorana rāda chieina pha̱kaphayā sā chi hangpaira. Kala chithanghon saikorawui Prohowui shimli leihkhalona mi akhala maleiluimara.
Currently Selected:
ZECHARIAH 14: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
