MALACHI 1
1
1Malachina Israelli Prohowui tui marānkhami.
Prohona Jacobli Leikashi
2 #
Isa 34.5-17; 63.1-6; Jer 49.7-22; Ezek 25.12-14; 35.1-15; Amos 1.11-12; Oba 1-14. “Ina nathumli leishiya” da Prohona hānga, kha nathumna, “Nana ithumli kathāda leishihairakhala?” da hānga. “Esau hi Jacobwui achinā maningmala?” da Prohona hānga. “Chithālala ina Jacobli leishi, 3kha ina Esauli ningkachai; ina awui shimlui chi khikha masākhavai kaphung sāngasakmi kala awui shimlui chi lamhāngli kazata ramfali mihaowa.” 4Kalikha Edomna, “Ithumli sākhayānghaira, kha sākhayāng kahai chi ithumna sakāluishitra” da hāngakha, saikorawui Prohona hānga “Athumna sākālapai, kha Prohona katang mavaila malungkhavāta yur, makaphā makhayā ram da mahoranglakha eina tangda ina sākhaira.” 5Nathum khalattawui mikna hi theira, kala nathumna, “Israelwui thari kanvāda Proho chi Reikhamataina” da hāngra.
Prohona Pāngmonbingli Kakahar
6“Naomayarana avāva̱li khayāshi, kala raona akhavāli khayāshi. Chithākha, I avāva̱ akhana jilaga ili khayākashi kali leili? Kala I akhavā akhana jiakha ili khangachee kali leikhala? da saikorawui Prohona awui mingli yangkakharinga, pāngmonbing, nathumli kahāngna. Nathumna hānga, Ithumna nawui mingli kathāda yangkharinghaokhala? 7Khamakhao kashakazā eina iwui hanphutli pha̱ya. Laga nathumna ithumna chi kathāda makhao ngasakhala? da hānga. Chi kaphaning eina Prohowui table yangkharingpai. 8#Khal 15.21. Nathumna pha̱kaphayāli khangapeo sāyur kachigat chi makaphā maningmala? Kala pheikatek, kakazā kachigat chi makaphā maningmala? Chi nathumwui lammungali miyanglu; ana nathumli penrala, kala lumashanmingairala?” da saikorawui Prohona hānga.
9Ara Varewui lukhamashan polu, chieina ana ithumli lumashanmipaira. Nathumwui hikathā kachigat hieina ana nathumli lumashanmipairala? da saikorawui Prohona hānga. 10Iwui hanphutpamli aremawui vang mei mathot khavai nathumwui ngachaili khāmong shungmi khavai mi akhamangla leisasi kaja chong! Ina nathumli ringkaphā maleimana, kala nathumwui pāng eina kachigat akhala makhuisangmara da saikorawui Prohona hānga. 11Khikhalajila zimik kashok eina thuilaga katun eina tangda yurbingwui ngachaili iwui ming hakkhamahāna, kala apam kachida nganamkaphā thao chi iwui mingli chigata, kala kathara kachigat mi; khikhalajila yurbingwui ngachaili iwui ming hakkhamahāna da saikorawui Prohona hānga. 12Kha nathumna Prohowui table chi makatharana kala chiwui kashakazā chi horhaipai da kahāng eina makhao ngasaka. 13“Hi kayākha kachot ot khala” da nathumna hānga, kala ili khamor chipita da saikorawui Prohona hānga. Nathumna ngapaikakhui lah pheikatek, kakazā chi khuirai, kala chi chigat khavai khuirai. Chi ina khuisangmirala? da Prohona hānga. 14Kakapika, awui yaoshangli yaovā akha khalei chi thumhailaga achukmakapei chi Proholi kachigata mipa chili khonkashi ngasāranu, kaja I kahaka Awunga akhana, kala yurbingwui ngachaili iwui mingli ngacheesera, da saikorawui Prohona hānga.
Currently Selected:
MALACHI 1: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
