NAHUM 3
3
1Ashee ningkachānga,
kakapik kala ngaponkakhuina pemting kahai khangapon khangasām makhavai keinung!
kalākashi ngasāranu.
2Lijei khangaphit akhon kala garikāng akhon,
sigui khayong kala siguigari kathao!
3Sigui katongbingna muivai,
phikphik kahai raighai eina hānshi kahai kazei,
sorkhangasai angun,
katang makhavai kathi angun athumna kathingunli ngahuiya!
4Kala saikora hi khayorva̱̱wui otsakwui vāngna,
tengkakui kala thikapai ningchāng khangasak otsakwui vangna,
khayor otsak eina yurli, kala awui ningchang khangasak otsak chieina mibingli yorzai.
5Yanglu, ina nali mamayāmana,
da saikorawui Prohona hānga,
kala nawui kashan namaili lankāmira;
kala ina nawui mahonghat kahai chi yurbingli,
kala nawui khayākhamalā chi wungrambingli yangngasakra.
6Ina nali khamakhao horrorra,
kala nali ningkachaida sāra,
mina yangnganao khavai sāngasakra.
7Nali kathei mi saikorana phasā ngayumda hāngra;
Nineveh shimānkachanghaira,
khipāna awui vang chaprakhala?
Ali ringphā khangasaka chi kali phākhuira?
8Tara̱na kuinam kahai Nile ngalemli khalei,
awui raishaophungna shamadru,
tara̱na raipan ngasāda khalei Thebeshli na phāmeila?
9Ethiopia hi awui yāng ngasāsai,
Egyptla ngasāsai kala katang mavaisāmana;
Pur eina Libyanaobing awui khangachonana.
10Chithālala ali khuithuihaida, raikathāli vai;
awui naomayarali chānrei pamngaretli ngapokazamthatserhaowa.
Kaja awui khayākakā mibingwui vang kalā yanga;
kala awui khangambing saikorali mari khānghui eina khalaphaowa.
11Na mariphaora, ning pāhaora,
nana nawui yangkashewuili ngayin khavai phāra.
12Nawui raipan katonga athei minphok kahai khaorārong thai—
khanukkashaiawui khamorli tāzanga.
13Yanglu, nawui raimibing sha̱naomānga,
nawui ngaveibing yangkashebingwui vang shongaomihaira;
raipan marila meina yummihaira.
14Raishotwui vang tara̱ phungsanglu,
nawui raipan makang ngasaklu; leipā khuida naikazamlu,
chek semkhavai akhong ngarānlu!
15Chili nali meina chuithatra, raighaina katatpat tāhaora,
khaoh thāda nali shaihaora,
khaoh thāda mayāsang ngasaklu, khaohsom thāda mataisang ngasaklu.
16Nawui leihkhalonbing kazingramwui sirāli chungmeida mataisang ngasakra.
Khaohna awui angachāng hārda yongthuihaowa.
17Nawui wungnaobing khaohsom kathāna,
nawui lairik kakapebing muiyā thāda ngashing kazata,
kasik atamli raipanli pa̱kapama khaoh thāda zimik kashok eina paithuihaowa;
athum kali vāhaokhala kaji khipānakha matheilui.
18Nawui yaokahombing pivāhaira, O Assyriawui awunga;
nawui khangambing piphuphaira.
Nawui mibing kaphungli yaoyāng eina,
ngakuikhui khavai khipākha malei.
19Nawui sākaza̱ chi suikatā maleimana,
nawui khamā chi marlakhaira,
nawui pao kashā saikorana nali pāng kapherorra.
Kaja nawui katang makhavai makaphā otsak chi khipāli maza̱rangkhala?
Currently Selected:
NAHUM 3: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
