NAHUM 2

Nineveh Kongkhalui

1Sakakathāna china nali rāngasunghaira.

Raishaophungli mi hailu;

shongfa yangkazaklu;

nawui shānneira̱ neikhuilu;

nawui yāng katonga kazipkhuilu.

2(Israelwui khangamkharei tākam eina Prohona

Jacobwui khangamkharei hanmidalei,

kaja khangaponbingna athumli kashankachon raimihaira kala athumwui aphāng sākazamihaira).

3Awui rai kapingbingwui chāngvei hunga,

awui raimibing hungshi kahai eina sāri sai.

Siguigaribing ngaherda kakazip tharan meiwon thāda phik-phik ngasheiya; —

raikhokabingna raichak sai.

4Sigui garibingna chānreili lar-lar zata,

athumna kayāng-khareili yongshang yongtā sai;

athumna zingrān thāda hāna,

rikhān khangashei thāda pharvai.

5Athumwui akhavābingli hokhuisera,

athumna kongluimamānda zata,

athumna katotsisi raipanli vai,

kuinamkhuida nganinghaowa.

6Kongwui ngaveibing shohaira,

awunga keinung kaiyānghaira;

7chiwui philava̱wui kashankachon

raimihaida, ali khuithuihaowa,

awui rao sha̱naobingna chapngachai,

malung kapheda nāsha̱ thāda chapa.

8Nineveh hiya tara̱ longthui kahai ra̱khong kathāna,

“Nganinglu! Nganinglu!” da athumna vaowa;

kha khipānakha mangareiungmana.

9Lupā chi ngaponlu,

sinā chi ngapaikhuilu!

lupāchum kala aman kasasaka lan kakān mavaimana.

10Ramcho! achoro ngasāhao!

ning thenghao, khuksao kathira,

akashān tongda ngasheihao,

amai saikora thengchenghaowa!

11Kazingkha̱ khur kali lei,

anaoli khikhana sheikakhaut maleila,

kazingkha̱na awui sāshai khuiungmi khavai akhur chi?

12Kazingkha̱na anaongarāwui vang shapkha tukmihaira,

kala kazingkha̱va̱wui vang kachungkha shimetthatmihaira;

ana awui akhur chi sāshaina chipema,

awui shim asāna pema.

13Yanglu, ina nali mamayāmana da saikorawui Prohona hānga, awui siguigaribing ina meikhutwui alungli chuitā ngasakra kala nawui kazingkha̱naobing raighai shaira; nawui sāshai chi ina okathuiwui eina katatmihaora kala nawui paomebingwui akhon mashāluimara.

Currently Selected:

NAHUM 2: TANGBSI

Highlight

Copy