MARK 9
9
1 #
Mk 13.30; Mat 10.23; Lk 22.18. Ana athumli hānga, “Kachangkhat eina ina nathumli kahāngna, Varewui wungram china pangshap eina ngasoda kharā matheiranglakha kathi mamazapki kaji mi kaikha hili nganingda lei.”
Azak Khaon
(Mat 17.1-13; Lk 9.28-36)
2 #
Mat 17.1-8; Lk 9.28-36. #Mk 5.37; 13.3. Tharukthangwui thili Jishuna Peter, James kala John athumngli hophungda phungrei kajuiva̱ akhali thankai, kala athumwui miktāchangli azak onhaowa, 3#Mat 28.3. kala awui kachon hānshi eina charshihai kala okathuili kachon khangasa̱ minala chithada ngasa̱khuikapai maningmana. 4Elijah eina Moses apam chili rāda Jishuli chan tākhangazek athumna thei. 5Chieina Peterna Jishuli hānga, “Ojā, ithum hili leikasā phālakhaira, ithumna nawui vang akha, Moseswui vang akha kala Elijahwui vang akha da rāmnao kathum sakhuisa.” 6Kaja athum ngacheenahaida a khi hāngsikhala da matheithuya. 7#2 Pet 1.17-18; Mat 3.17; Joh 12.28-29. Chiwui thili muiyā ngapuiungda athumli rommithaowa kala muiyālungwui eina akhon akha vaorai, “Hi iwui khaluma Naomayarana, awui tui nganālu.” 8Athumna kashuirak eina hengsāda kapeikhayang tharan Jishu maningla athumli khipākha ngasopamkasa matheimana.
9 #
Mat 17.9-13; Lk 9.36. #Mk 8.30; 5.43; 7.36. Athum kaphungwui eina tāmamānlakha Jishuna athumli kasoi, “Miwui Naomayarana kathiwui eina maringshokranglakha eina tangda nathumna theikahai chi mi khipālikha mahānglakalu.” 10Chieina athumna “Kathiwui eina ringshokra kajiwui kakhalat khikhala,” da ngazek ngarokphokuwa, kha shokkahai otshot chiya athum khalattawui ningli thumhai. 11#Mat 11.14. Chieina athumna Jishuli ngahānna, “Khiwui vang eina ain kathemabingna Elijahna rārira da hānghaokhala?” 12#Mk 8.31; 9.31; 10.33. Jishuna, “Elijahna ot saikora hankhuiluishit khavai rida rai; kala miwui Naomayarawui pongli kakhanang kala mana̱kashi kachungkha samphangrada Kathara Lairikli kathada kapihailikhala? 13Kha ina nathumli kachangkhat eina kahāngna, Elijah rāhaira kala awui pongli kapi kahai thada ali athumwui ningyāng khaung sakhuihaira.”
Kameo Kazang Naoshinao akhali Raikhami
(Mat 17.14-21; Lk 9.37-43)
14 #
Mat 17.14-18; Lk 9.37-43. Athumna sākhangatha̱ kateibingwuili hankhaung tharan mi kachungkhana athumli kuinamlaga ain kathemabingna ngayatkasā thei. 15Hengsāda athum katongana Jishuli theida matakhakhai kala athumna ngasamvāda ali vāngarokkhui. 16Chieina ana athumli ngahāna, “Nathum athumli khi khangayatkhala?” 17Yarui ngachaiwui eina mi akhana ngahānkai, “Ojā, inaomayarali khak khangasha̱wui kameo zanghaida nali khuikharāna; 18kameo china nganurhaiakha nao chi ngaleili saosangda aporhop tarārā shoklaga ahāla kajetta phasāla mararshaphaowa; chiwui vang nawui sākhangatha̱bingli kashamshokmi khavai kahāng tharan athum masāmirarthuwa.” 19Chieina ana athumli ngahānkai, “O shitkasang makhalei thot, ina nathumli karankha ngasopamfarakhala kala samifarakhala? Iwuili khuirālu.” 20Athumna nao chi awuili khuirai; kala kameo china Jishuli theikhaleoda naoshinaopā chili nganurkazama kala ngaleili saosangda ngaleokazamlaga khamorli aporhop hiyaya shoka. 21“Hithada kakazā hi karankhahaira?” da Jishuna avāva̱ chili ngahānna. “Nganuilakhawui eina kazāphalunga. 22Kameo china ali shimān khavai kala thikhavai meilunglila, tara̱lunglila tarākhashida horsanghaira, khikhikha sāmipaiakha lumashanmida ishili khangachonmilu.” 23#Mat 17.20; Lk 17.6; Mk 11.22-24. Jishuna ali hānga, “Samipaiakha kajila? Shitkasanga awui vanga ot saikora sapaisera.” 24Avāva̱ china hengsāda chapta hānga, “Ina shitsanga, iwui mashitsangkasangwui vang ngachonmilu.”
25Jishuna yarui ashangva̱ chi athumwuili yongkharā chi theida, ana makathar mangla chili khararda hānga, “Khangasha̱a kala khangakhoka manglā, ina kakasona, awui eina shokulu kala ali marāzangluilakalu.” 26Kala panglak eina chapta ali khanukazamhailaga shokhaowa, kala nao chi kathi angun thāhaowa; chieina athum kachungana, “A thihaira” da hānga. 27Kha Jishuna awui pāng singkhuida khāngkhamathot eina thuinganingrāsai. 28Jishuna shimlung zangkahaiwui thili sākhangatha̱bingna ngathumsāda ali ngahāna, “Khiwui vang ithumna makashamshokrarthu kajikhala?” 29Chieina Jishuna ngahānkai, “Hikatha hiya seihā kasā eina maningla makashamshokrarmana.”
Jishuna Awui Kathi Hāngmarānluishit kaji
(Mat 17.22-23; Lk 9.43-45)
30 #
Mat 17.22-23; Lk 9.43-45. Athumna chiwui eina zatlaga Galilee akāna. Jishuna mi khipālikha a khaleipam mathei ngasakmana; 31#Mk 8.31; 10.33. kachiwui vangkhala jilaga chitharan awui sākhangatha̱bingli tamchitheida leisai: “Miwui Naomayarali mibingwui pāngli horsangmida athumna ali shaothathaora kha kathumthangwui thili ringshokluishitra.” 32#Joh 12.16. Kha athumna awui tamkachithei chi khikhala da bhap matāthuwa kala khangahānla mangahānlengthuwa.
Khipā Reimeikapkhala?
(Mat 18.1-5; Lk 9.46-48)
33 #
Mat 18.1-5; Lk 9.46-48. Chiwui thili athum Capernaumli vai kala shimlungli zangkahaiwui thili Jishuna sākhangatha̱bingli ngahāna, “Nathum shongfali khi khangazekhala?” 34#Lk 22.24. Kha athumna mangahānkāthuwa, khiwui vangkhala jilaga athumna shongfali khipa reimeikapkhala kaji ngazeka. 35#Mk 10.43-44; Mat 20.26-27; 23.11; Lk 22.26. Jishuna pamzangda tharāda khani chili hokhuida hānga, “Khare sāga jiakha saikorali naomeithuira kala saikorawui rao sāra.” 36#Mk 10.16. Kala ana naoshinao akhali thara̱khuida athumwui alungthungli vamkhuilaga athumli hānga, 37#Mat 10.40; Lk 10.16; Joh 12.44; 13.20. “Kachikathāna imingwui vang hikathā naoshinaoli khuikasang chi ili khuikasangna; ili khuikasang chi imāngli maningla ili kashirāta alila khuikasangna.”
Ithumli Mangakaikashe chi Ithumwui Mina
(Lk 9.49-50)
38 #
Lk 9.49-50; 11.23; Mat 12.30; Mis 11.27-29. Johnna ali hānga, “Ojā, mi akhana nawui ming singda kameo kashamkashok ithumna thei, chieina ali ithumna masāluilu da khāmhaowa, khiwui vangkhala kaja a ithumwui mi maningmana.” 39Kha Jishuna hānga, “Ali makhāmhaialu, khikhalajila iwui ming singda matakhak kahai ot kasā mi khipākha ili mamashātmara. 40Kaja ithumli mangakaikashe a chi ithumwui mina. 41#Mat 10.42. Kachangkhat eina ina nathumli kahāngna, nathumna iwui mi kasingwui vang kachikathāna tara̱ tengkotkha mikhamangwui sāman kachilikha mashimānlakmara.”
Morei Sākhavai Kasui
(Mat 18.6-9; Lk 17.1-2)
42 #
Mat 18.6-9; 5.29-30; Lk 17.1-2. “Ili shitkasanga kateoa akhali morei sakhangasakpa chili lungriham ngachāmihailaga shamadruli horsang kahaina awui vang phamei. 43Chiwui vang eina nawui pāngna nali morei sangasakakha, katattāhaolu; nawui vanga pāng khani kālaga kazeiram vāki kajile, pāng makāla katang makhavai kharingli kazang phamei. 44Chile athumwui mathan kathi mavaimana kala meila khamit mavaimana. 45-46Napheina nali morei sangasakakha, katattāhaolu; nawui vanga phei khani kālaga kazeiram horsangki kajile phei mareida katang makhavai kharingli kazang phamei. 47Namikna nali morei sangasakakha, latshokhaolu; nawui vanga mik khani kālaga kazeiramli horsangki kajile mik lākhavākmāng kālaga Varewui wungramli kazangna phamei, 48#Isa 66.24. chili athumli kashaia mathan chi kathi mavaimana kala meila khamit mavaimana. 49#Mat 5.13; Lk 14.34-35. Kaja mi kachivali mei eina tharngasakra. 50#Col 4.6; 1 Thes 5.13. “Machi hi kānālaka, kha machi chi chiwui katum shimānhaiakha khi eina tum ngasakrakhala?
“Nathum khalattawui alungli machi leingasaklu kala akha eina akha chingri eina pānrumlu.”
Currently Selected:
MARK 9: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
