MARK 8

Jishuna Mi Thingmatili Mikazā

(Mat 13.32-39)

1 # Mat 15.32-39; Mk 6.32-44; Mat 14.13-21; Lk 9.11-17; Joh 6.5-13. Chitharan mi kachungkha rakazipluishitta athum zākhavai makhalei tharan Jishuna awui sākhangatha̱bingli hokhuida hānga, 2“Mibing hili lumashanlaka, kaja athumna ili ngasokapam hi zimiksho kathumthang kaura kala athum ara zākhavaila maleithura; 3ina athumli kakhum eina shimli shiunhaiakha, athum shongfali vānhaora kaja kaikhava katava̱wui eina kharāna.” 4Kala awui sākhangatha̱bingna ngahānkai, “Siwuk hili kachiwui khamui vākhuida mi hiyakhali phāchizatpaira?” 5Jishuna athumli ngahāna, “Nathumwuili khamui kayākha leikhala?” Athumna ngahānkai, “Shini lei.” 6Chieina Jishuna mi saikora chili pamzanglu da kasoi, kala khamui shini chi khuida Vareli ningkashi mi kala serkhailaga yaruili yaokhavai awui sākhangatha̱bingli mi; athumna yaruili yaowa. 7Athumwuili khaihla kateokha leisai; Jishuna chiwui vang Vareli ningkashi milaga yaruili yaokhavai mi. 8Athumna chi shailaga tholakhaowa kala athumwui shaitai luk shini pemda kazipkhui. 9Kala chili mi thingmati sha̱kha leisai. 10Kala Jishuna mibing chili shiunhaowa; kala ana hengsāda marikhong kātonglaga awui sākhangatha̱bingli ngasoda Dalmanutha ngaleivāk vāhaowa.

Machut Ningkachāng

(Mat 16.1-4)

11 # Mat 12.38; Lk 11.16. Chiwui thili Phariseebingna Jishuli rangaphata kala khayon tukkhuikida kazingramwui eina machut chithei khavai hānga. 12Kha ana khananglak eina ngahuida hānga, “Mithot hina khisāda machut kaphākhala? Ina nathumli kachangkhat eina kahāngna, mithot hili machut khikhala machitheimara.” 13#Mat 16.4-12. Ana athumli nothāhailaga marikhong tongda lākhavāk kānkāhaowa.

Pharisee eina Herodwui Khawok

(Mat 16.5-12)

14Sakhangatha̱bingna athumwui khamui malaihaida makhuiphungthuwa; marikhong chili athum khamuihāng akhamāng leisai. 15#Lk 12.1; Mk 6.14; 12.13. Jishuna athumli “Ning ngasharda khuiphunglu, Pharisee eina Herodwui khawok chili ngasharlu kala mangarumhaialu.” da hānga. 16Athum akha eina akha ngazek ngarokta “Ithum khamui maleimana” da hānga. 17#Mk 6.52; Jer 5.21; Isa 6.9-10; Mat 13.10-15. Chi theihaoda, Jishuna athumli hānga, “Khamui makhuikaphungwui vang khisāda nathum ngazek ngarokhala? Nathum aruila mamachukrang kala bhap matārangla? Nathumwui ning makanghaola? 18Mik kālaga matheirarmala, khanā kalaga mashārarmala? Kala nathum maphaningungmala? 19#Mk 6.41-44. Ina mi thingphangāwui vang khamui phangā serkhailaga mizāthang nathumna shaitai luk kayākha kaziphuikhala?” Athumna “Tharada khanina” da ngahānkai. 20#Mk 8.1-10. “Kala mi thingmatiwui vang ina khamui shini serkhaida mishaithang shaitai luk kayākha nathumna kazipkhuikhala?” da Jishuna ngahānna. Athumna “Shinina” da hānga. 21Ana athumli “Arui eina tangda bhap matārangla?” ji.

Bethsaidali Khangapeo akhali Raikhami

22 # Mk 10.46-52; Joh 9.1-7. #Mk 6.45; Lk 9.10. Chiwui thili athumna Bethsaidali vai. Mi kaikhana khangapeo mi akha Jishuwuili khuirada awuitungli kasāza̱mi khavai poi. 23#Mk 7.33; 5.23. Jishuna khangapeoa chili thara̱khuilaga kha̱wui ayarvāk thānshoka; ana mipa chiwui mikli machora̱ mashorrorhailaga awuitungli pāng parrorda, “Khikhikha matheilikhala?” da ngahāna. 24Ana yangkāda, “Mi theili, kha thingrong kazat thai.” 25Jishuna mipa chiwui mikli apāng saza̱luishita; ana panglāk eina kharak tharan saikora mathingrik eina theihaowa. 26Jishuna ali, “Kha̱lunglila mazangluialu” da kasolaga shimli shiunhaowa.

Peterna Jishuli Hāngkaphat

(Mat 16.13-20; Lk 9.18-21)

27 # Mat 16.13-20; Lk 9.18-21; Joh 6.66-69. Chiwui thili Jishuna awui sākhangatha̱bingli ngasoda Caesarea Philippiwui kha̱bingli vai kala shongfali “Ili mibingna khipāna jikhala?” da athumli ngahāna. 28#Mk 6.14. Chieina athumna, “Mi kaikhana Ra̱hikme Johnna ji, kaikhana Elijahna ji, khangatei kaikhana marānbingwui ngachaili akhara ji” da ngahānkai. 29“Kha nathumna ili khipāna da phaningkhala?” da ngahāna. Peterna “Na Khrista china” da ngahānkai. 30#Mk 9.9; 1.34. Kala Jishuna athumli awui maramli khipālikha mahāngalu da ningmi.

Jishuna Awui Kachotkachang kala Kathiwuipongli Kahāng

(Mat 16.21-28; Lk 9.22-27)

31 # Mat 16.21-28; Lk 9.22-27. Kala ana awui sākhangatha̱bingli, miwui Naomayarana apong kachungkhali kakhanang kachot samphangra kala kathānabing, pāngmon akhokabing kala ain kathemabingna mamayāmada ali shaothatra, kha kathumthangwui thili ringluira da tamchitheiphokuwa. 32Kala ana chi shenglak eina hāngmi. Kala Peterna ali hokhuilaga kaharphoka. 33#Mat 4.10. Kha Jishuna ngareiungda sākhangatha̱bingli yanglaga Peterli kaharda hānga, “Ikhanukshong unghaolu, Satan! Na Varewuishong maningla mikumowuishong lei.”

34 # Mat 10.38; Lk 14.27. Kala ana yarui chi awui sākhangatha̱bingli ngasoda hokhuida hānga, “Kachikathā mina ithi shurga jiakha, a khalattawui ningkachāng horhailaga awui krush phungda ithi shurranu. 35#Mat 10.39; Lk 17.33; Joh 12.25. Kaja khalatta awui mirin huikhuiki kaje a chi awui mirin shimānra; kala iwui vang kala paokaphāwui vang mirin shimankhame a china ringra. 36Mi akhana okathui katonga samphanglala awui mirin shimānhaiakha awui tongkazā khi leikhala? 37Mi akhana awui mirin chi khi eina ngatha̱khuishapkhala? 38#Mat 10.33; Lk 12.9. Vareli makathei makaphā thot hili kachikathāna iwui kala iwui tuiwui vang khayakakha, miwui Naomayarana Avāwui tekhamatei eina kazingraobingli ngasoda kharā tharan awui vangla khayakhaora.”

Currently Selected:

MARK 8: TANGBSI

Highlight

Copy