MARK 7

Awo Ayiwui Tamkachithei

(Mat 15.1-9)

1 # Mat 15.1-11; Lk 11.38. Jerusalemwui eina kharā Phariseebingna ain kathemabing kaikhali akhomkhuilaga Jishuli rāngasokapam tharan, 2awui sākhangatha̱bingna khamakhao pāng, chiya pāng mamazikla phakazā chi thei.

3(Kaja awo-ayibingwui khangachā mayonda Phariseebing kala Jihudi saikorana pāng mamazikla maphazāmana; 4#Mat 23.25; Lk 11.39. athumna leihngapha̱wui eina hankhaung tharan mara̱vairanglakha maphazāmana. Chili lāngmeida tengkot, khongphei kala mariham kathā kapheowui khangachāyan athumna khamayon tarākha lei.)

5 # Gal 1.14. Chieina Phariseebing eina ain kathemabingna Jishuli ngahāna, “Awo-ayiwui khangachāyan thada masāla khisāda nawui sākhangatha̱bingna pāng mamazikla phazākhala?”

6 # Isa 29.13. Ana athumli ngahānkai, “Marān Isaiahna phākakhaning nathumwui pongli mashungda marānmi, kaja hithada kapihaida lei:

‘Mibing hina ili morchai eina khayāshiya,

kha athumwui ning iwui eina katava̱li lei;

7aremali athumna ili khoruma,

athumna miwui khangachāyan chi Varewui tuina da tamchithei.’

8Nathumna Varewui ningkhami horhailaga, miwui khangachāyanli sakmeikhar mayonhaowa.”

9Kala ana athumli hānga, “Nathumwui khangachāyan mayon khavaiwui vang Varewui ningkhami horhai khavai nathum apong khamathā akha lei! 10#Sho 20.12; Khal 5.16; Sho 21.17; Pāng 20.9. Kaja Mosesna ningmihai, ‘Nava̱ navāli khayashilu kala avāva̱li lah ava̱va̱li khonkashe mi chi thira’; 11kha nathumna hānga, mi akhana avāva̱ lah ava̱va̱li, iwui eina nana kānkhanā samphangkapai chi ‘Hi Corbanna’ (kaja Vareli mikahaina) da hānghaiakha, 12chiwui thili nana ava̱ avāwui vang khikha masa ngasakluimana, 13chithada sāda nathumna zatkhana hāngkhamaron chiwui vang eina Varewui ningkhami chi khamasai ngasa ngasaka. Nathumna hithada kasā khangatei kachungkha lei.

Makhao Khangasak Ot

(Mat 15.10-20)

14Chieina Jishuna mibingli hokhuiluishitlaga athumli, “Nathum saikora nganālu kala theishingkhuilu. 15Ayarwui eina kazang china mi chili khikha makhao ngasakrarki kaji maleimana, kha alungwui eina kashok china makhao khangasakna. 16Shākhui khavai khanā kakā a china shākhuiranu.”

17 # Mat 15.15-20; Mk 4.10. Ana yaruili nothāhailaga shimlungli kazang tharan awui sākhangatha̱bingna chānjam chiwui pongli ngahāna. 18#1 Cor 10.25-27; Rom 14.14; Tit 1.15; Ots 10.15. Ana hānga, “Nathumla theishingkakhui maleirangla? Ayarwui eina kazang china mi chili khikha mamakhao ngasakrarmana kaji nathum bhap matāthula? 19Khikhalajila chi wuklungli kazang maningla paiphonli kazangna kala chi ayarli shokpapamhaowa.” (hiya kashakazā katonga thara da phongkhamina.)

20 # Rom 1.28-31; Gal 5.19-21. Kala ana hānga, “Alungwui eina kashok china mili makhao khangasakna. 21Kaja miwui wuklungwui eina makaphā ningphanin, shāmkasa, khaleekasa̱, shaokathat, phokaphā, 22#Mat 6.23; 20.15. kākharām, mikhanam, makhangatun, yuikashi, ngashimkashi, langkaso, mangkhama̱ hikathāthā shoka. 23Saikora hi mi chiwui alung eina kashokna kala makhao khangasakna.”

Sha̱nao Akhawui Shitkasang

(Mat 15.21-28)

24 # Mat 15.21-28. Apam chiwui eina Jishuna zatphoklaga Tyre kala Sidonwui ruinganaishong vāhaowa, ana mi khipālikha mathei ngasakla shim akhali azanga; chithālala mangathumpaithuwa. 25Anao ngalāva̱li makathar mangla kazanga preinao akhana Jishu rāhaira da kashā eina hengsāda vālaga awui pheizingli ngakhumshama. 26Preiva̱ chi Syrophonicianaona. Ana awui naongalāva̱wui eina raih chi kakashamshokmilu da poi. 27Kala ana sha̱nao chili hānga, “Naoshinaobing rida thofaranu, kaja naoshinaobingwui zāt khuilaga fali hormi kahai mangachāmana.” 28Kha sha̱nao china ngahānkai, “Mashunga amei, chithālala naoshinaobingwui zātpā tākatung chi tablezingli kapama fala ngamuizai!” 29Chieina ana ali hānga, “Nana chi kahāngwui vang shimli ungulu. Nanao ngalāva̱wui eina raih chi shokhaira.” 30Ana shim hankhaung eina nao chi petli pisai kala raih chi awui eina shokkachanghairasai.

Khanā Khangakhok Khak Khangasha̱ Mi akhali Raikhami

31 # Mat 15.29-31. Jishuna chiwui thili Tyre apamwui eina Decapolis apamli ngaruivālaga Sidon angaruishokta Galilee shamadruvāk hanunghaowa. 32Kala athumna khanā makashā kala khakla makashok akha khuirāda Jishuli awui pāng parzāmi khavai rāpoi. 33Chieina Jishuna amāngli thānkhuilaga yaruiwui eina thuihaowa kala akhanāli apāng thara̱sanga kala apāngli machora̱ mashorrorlaga kakazāpawui maleli sāza̱ya; 34kala ngahuida kazingram yangkāda hānga, “Ephphatha” kaja “Shohaolu” kajina. 35Kala ngalāngda mipa chiwui khanā shohaowa, amalela khalāmihaoda matuihaowa. 36Kala ana mi khipālikha mahangalu da athumli ningmi; kha athumna mataimeida vaomalāna. 37Kala athum matakhaknāhaida, “Ot saikora ana phālak eina sāmihaira; ana khangakhoka kala khangasha̱ali eina tangda shāngasak, kala matui ngasakhaira” da hānga.

Currently Selected:

MARK 7: TANGBSI

Highlight

Copy