MARK 6

Nazarethli Jishuli Makhuikasang

(Mat 13.53-58; Lk 4.16-30)

1 # Mat 13.53-58; Lk 4.16-30. Ana apam chiwui eina thuihailaga awui ramli unghaowa; kala awui sakhangathabingna ali shurzata. 2#Mk 1.21; Mat 7.28. Kala Sabbaththang ana synagogueli tamchitheiphokuwa; kala awui tui nganākakhui mi kachungkhana matakhakhaida hāngngaroka, “Ana saikora hi kachili atamkhui khala? Ali mikahai hi khi thangmeikhala? Apāngna kayakha hakhamahā ot sashapkhala! 3#Mat 11.6. Hi Marywui naomayara, kala James, Joseph, Judas kala Simonwui achinā mistrypa chi maningmala? Azarva̱ngara ithumli mangasopammala?” Chieina athumna ali mamayāngaithuwa.

4Chieina Jishuna athumli hānga, “Marānliva kachichāramli shangnao ramnao kala shimkhurna kajimada apam kachiva̱li khayāmakashi maleimana.”

5 # Mk 5.23; 7.32; 8.23. Apam chili ana kakazānao akha khaniwuitungli pāng parza̱da raikhami maningla matakhak kahai ot khangatei masāpaithuwa. 6#Mat 9.35. Kala ana athumwui mashitkasang chi theilaga matakhakhai.

Chiwui vang ana kha̱kha̱li vāda tamchithei.

Tharāda Khanili Kachiho

(Mat 10.5-15; Lk 9.1-6)

7 # Lk 10.1. Ana tharāda khani chili hokhuida khanini eina chihovai kala athumli raih kashamshok khavai pangshap mi. 8Ana athumli, khāmshui maningla khangatei kaja kashakazā, paidu, kala shāneirali lupā akhala makhuiphung khavai; 9kha pheihopva tonglaga, phahonva khani masangkhavai ningmi. 10Ana hānga, “Nathumna vāzang kahai shim chili nathum mazatranglakha eina tangda pamlu. 11#Mat 10.14. Kala kachikatha apamli nathumli mazun ngasakakha kala manganāsangakha, nathum kazat tharan athumli makhamayawui shākhi kachithei sāda pheili kakā chifa chi kathangtāhailu.”

12 # Mat 11.1; Lk 9.6. Chieina athumna vāda ningngatei khavai pao hāshoka. 13#Jam 5.14. Kala athumna kameo kachungkha kashamshoka kala kakazānao kachungkhali thao neomida raimi.

Ra̱hikme Johnwui Kathi

(Mat 14.1-12; Lk 9.7-9)

14 # Mat 14.1-2; Lk 9.7-9; 9.19; Mat 21.11. Herod awungana chi shai, kaja Jishuwui aming ngayaonaphaowa. Mi kaikhana “Ra̱hikme John ringluishithaira, chiwui vang eina ana sākashapna” da matuiya. 15Kha kaikhana “Elijahna” da hānga kala khangatei kaikhana “Achālakhawui maran kathā akhana” da hānga. 16Kha Herod awungana chi kashā eina “Ina akui rangtāmi kahai John chi ringlui kahaina” da hānga. 17#Mat 14.3-4; Lk 3.19-20. Kaja Herodna agato Philip preiva̱ Herodiasli ngakum kahaiwui vang Johnli tukkhui khavai a khalattana kasoi kala khalaplaga phātopli sanghai. 18Kaja Johnna Herodli, “Nana nagato preiva̱li khangakum hi ain maningmana” da hānga. 19#Mat 14.5-12. Chiwui vang eina Herodiasna awuitungli malungvātlakhaoda shaothatngai. Kha a chi mararsamana; 20#Mat 21.26. kaja Herodna John hi khamashunga kala kathara mina da katheiwui vang ali ngacheelaka, chiwui vang eina ana ngākmi. Awui tui shākachida ning pa̱ngapālaklala ana awui tui nganāngailaka.

21Kha Herodna awui kapharā zimiksho ungshungthang khangam-kharei, akhavā kasābing kala Galileewui kathānabing saikorali zātkhān kasā chitharan khamahai atam samphanga. 22Herodiaswui nao ngalāva̱na chakoi rasāda Herod eina awui ngasotnaobingli penngasaka; chieina Herodna ngalāva̱ chili hānga, “Nana ningkachāngchāng polu, ina nali mira.” 23#Est 5.3,6. Ana “Nana kapopo ina mira, iwui wungram tangkhai eina tangdala mira” da ngashithaisai. 24Ana ava̱va̱li, “Ili khi polu jikhala?” da ungngahāna. Ava̱va̱na “Ra̱hikme Johnwui kui” da ngahānkai. 25Ngalāva̱ china awungawuili totot vālaga “Ra̱hikme Johnwui kui arui khongphei hili sangmilu” da apoi. 26Kala awunga wukhananglakhaowa, chithālala awui tuingahit kala ngasotnaobingwui vang eina ali ngashitsang kahai tui chhi mahatngathuwa. 27Kala awungana hengsāda shipai akha hokhuilaga Johnwui kui khuirā khavai kasoi. Ana phātopli Johnwui kui arangkhui, 28laga kui chi khongpheili sanglaga ngalāva̱ chili khuiungmi kala naongalāva̱na ava̱va̱li mihaowa. 29Johnwui sākhangatha̱bingna pao hi kashā eina athumna awui angun chi akhuilaga chifahaowa.

Mi Thing Phangāli Mikazā

(Mat 14.13-21; Lk 9.10-17; Joh 6.1-14)

30 # Lk 9.10; Mk 3.20. Paokazatbingna Jishuwuili latungda athumna sākahai kala tamchithei kahai unghānga. 31Jishuna athumli, “Ngachakyang kahai apam akhali vāhaosa, laga nathum chili angasāmkhuilu” da hānga. Kaja mi chungnā kashok-kazang sāhaoda athum leiyālak eina phākashak-phakazā atamla masamphangmana. 32#Mat 14.13-21; Lk 9.11-17; Joh 6.5-13; Mk 8.1-10; Mat 15.32-39. Chieina athumna marikhong tonglaga ngachakyang kahai apam akhali vai.

33Athum zatkahai chi mi kachungkhana theihaoda keinung saikorawui eina athumli kharomrai kala Jishu eina awui sākhangatha̱bingli athumna vāshungrihaowa. 34#Mat 9.36. Jishuna marikhongwui eina kārkashok tharan mi kachungkha chili theida lumashanlakhaowa, kaja athum yaokahoma makhalei yaobing thai. Chieina ana athumli apong kachungkha tamchitheiphoka. 35Kazing khaying eina sākhangatha̱bingna Jishuli vahānga, “Hiya mi makapāna apamna kala kazingla yingura; 36kachichāwui kashakazā alozā khavai kuikhamareili khalei kha̱ kala keinungbingli athumli chihovāhaosa.” 37#2 Wung 4.42-44. Kha Jishuna ngahānkai, “Nathumna athumli zākhavai khamilu.” Athumna ngahāna, “Athumli mizā khavai denari shākhani sha̱khawui khamui alokhuilu kajila?”

38Chieina Jishuna athumli hānga, “Nathumwuili khamui kayākha leikhala? Angathingyanglu.” Kala athumna ngathingkakhui eina “Khamui phangā, khaih khani leili” da ngahānkai.

39Chieina yarui ashang chi khum-khum sālaga wonuitung chili pamngasaklu da Jishuna sākhangatha̱bingli hānga. 40Chieina mibing china shāshā, hangphangānga eina ashang sālaga pama. 41#Mk 14.22; Lk 24.30-31. Jishuna khamui phangā kala khaih khani chi singkhuilaga kazingramli yangkāda sokhami pomi kala khamui chi serkhaida yaruili yaovā khavai sākhangatha̱bingli mi kala khaih khani chila chithada ngayarmisera. 42Athum saikorana shai kala ningyāng unglakhaowa. 43Athumna khamui eina khaih shaitai chi luk tharāda khani kazipkhui. 44Khamui chi kazā mi mashing chi thing phangāna.

Jishuna Tara̱tungli Kazat

(Mat 14.22-33; Joh 6.15-21)

45 # Mat 14.22-33; Joh 6.15-21. Jishuna yaruili chihomahungda leilakha, hengsāda awui sākhangatha̱bingli marikhong kātong ngasaklaga ali rida lākhavāk vāngasakhaowa. 46Athumli ngapak kahaiwui thili ana phungreili seihā sākhavai vai. 47Kazing khaying tharan marikhong chi ngayi alungthungli leisai, kha ava ngayipheili leisai. 48#Mk 13.35. Masi chi athumli ngasunglaga phanhaokada athumna marikhong chi khananglāk eina huikazat ana thei. Kala ngaya pung khamate kathali ana ngayitungli zatta athumwuili rai. Athumli rikhui khavai khavāna, 49kha ana tara̱tungli kazat chi athumna theilaga kameona da phaninga kala vaotaraiya, 50#Mat 9.2. kaja athumna ali kathei eina ngacheeshunhaowa. Kha Jishuna hengsāda athumli hānga, “Pingmeilu, ilaka, mangacheealu.” 51Ana athumwuili vālaga marikhonglungli kākatong eina masi chi va̱rihaowa. Sakhangatha̱bing chi matakhakhaowa, 52#Mk 8.17. kaja athumna mi thingphangāli mikazāwui kakhalatla bhap matāthuwa; athumwui ning makanghaowa.

Jishuna Gennesaretli Kakazā Raikhami

(Mat 14.34-36)

53 # Mat 14.34-36. Athumna ngayi chi kānkāda Gennesaret ngaleili vashoka kala marikhong chi ngayipheili ahokhai. 54Athumna marikhongwui eina kashok tharan mibingna hengsāda Jishuli theihaowa, 55chieina athumna apam saikorawui eina kakazānaobingli pet eina phonda Jishu leiyi ji da kashapam kajida khuirai. 56#Mk 3.10; Mat 9.20. Ana kha̱lila, keinunglila kala ayarlila khavāvāpam kachida mibingna leihngapha̱li kakazānaobing rachipetta awui chontheirali eina tangda saza̱khui ngasak khavai poi, kala saza̱kakhui mi saikora kharai samphanga.

Currently Selected:

MARK 6: TANGBSI

Highlight

Copy