MARK 5

Jishuna Raih Kazanga Mi Akhali Raikhami

(Mat 8.28-34; Lk 8.26-39)

1 # Mat 8.28-34; Lk 8.26-39. Chiwui thili athumna shamadru lākhavāk khalei Gerasanaowui ngaleivāk ashoka. 2Jishuna marikhong eina shokkhaleoda makathar mangla kazanga mayarnao akha chikhurshongwui eina rāngaroka, 3a chikhurli pama kala mi khipānakha ali makhalaphairarmana; 4kaja ali zurthing einala kala marikhānghui einala kachungkha shida narhairasai, kha marikhānghuila sāshathao, zurthingla sākazamserhaida ali tuknarshapa mi khipākha maleisāmana. 5Ngashun ngayā chikhurpamli kala phungreitungli vaoshang vaotāda a khalatta ngaluggui eina aphasali reokazama.

6Ana Jishuli khālada kathei eina yongvāda akhoruma; 7#Ots 16.17; Heb 7.1; Mk 1.24. kala panglāk eina vaoda hānga, “Reikhamataiya Varewui Naomayara Jishu, nana ili khi sāki kajikhala? Varewui mingli kapona kaja ili marekharekmialu.” 8Kaja “Makathar manglā, mipa hiwui eina shokulu” da Jishuna hanghairasai. 9Jishuna ali ngahāna, “Nali khipa hokhala?” Ana ngahānkai, “Ili Legion hoi kaja ithum kachungkhaya!” 10Mipa china athumli ngalei chiwui eina makashamihaialu da poi.

11Atam chitharan chiwui ngalem kaphungpheili hok ashangva̱ akha leisai, 12kala athumna Jishuli “Ithumli hokbing chili chihovāda azang ngasakmilu” da poi. 13Chieina ana mayāmihao. Kala makathar manglabing china shoklaga hokbing chili azanga. Hok thingkhani sha̱kha leikasā chi amaitarenli yongtāda shamadrulungli tāzangda hikthatserhaowa.

14Hok kahombing china kha̱li kala keinungli yongungda pao chi unghānga. Chieina mibingna khi shokhaokhala da ayanga. 15Athumna Jishuwuili kharā tharan legion kazanga mipa chi ning mathingungda kashankachon mathāsek eina ngavailaga pamkasa chi theilaga athum ngacheelakhaowa. 16Makathar manglā kazangapā eina hokbing chili khi shokmameihaokhala kaji chi katheibingna mi khangateili hāngchithei.

17Chieina athumna Jishuli aramwui eina zatthuimihai khavai poi. 18Ana marikhongli kākatong eina makathar manglā zangkasapa china “I nali shurraga” da poi. 19Kha Jishuna mamayathuwa, kala ali “Nashi shimli ungulu kala Prohona nawui vang kayākha sāmihaira kala kayākha lumashanmikhala kaji athumli unghāngchitheilu” da hānga. 20#Mk 7.31. Chieina ana Decapolisli hanungda Jishuna awui vang kayākha samikhala kaji pheichithei kala kashā mi saikora matakhakhaowa.

Jairuswui Naongalāva̱ eina Chontheira̱li Sākaza̱ Sha̱nao

(Mat 9.18-26; Lk 8.40-56)

21 # Mat 9.18-26; Lk 8.40-56. Jishuna marikhong tongda lakhashong huikāluishita, chitharan mi kachungkhana ali ngayipheili kuinamlaga rakazipa, kala ana shamadru ngalemli pama. 22#Lk 13.14; Ots 13.15; 18.8; 17. Chitharan Synagoguewui akhava Jairusna apam chili rai kala Jishuli kathei eina awui pheizingli ngakhumzangta 23#Mk 6.5; 7.32; 8.23; Ots 9.17; 28. ana “Inao ngalāva̱ kathi mayuk eina pida lei. Nana awuitungli napāng kharāsazāmilu. Chithākha a mathimara” da panglāk eina poi.

24Chieina Jishuna ali ngasovai kala mi kachungkhala shurvada ali puiruizata.

25Apam chili zingkum tharāda khani ashee ngayā kahai sha̱nao akha leisai. 26Khanong kachungkhali yangngasakhailala marsangmeihaowa. 27Ana Jishuwui maramli mi khangateibingna khangazek shāhairasai. Chieina ana yarui kakazip khanukshong vālaga, 28“Ina awui kachonli thada saza̱khuisi kaja railakra” da a khalatta machuka.

29Ana awui kachonli saza̱ya kala ashee khangaya̱ chi ngalāngda thenghaowa, kala awui kakazā chila raichaohaowa. 30#Lk 5.17. Hengsāda Jishuna awui eina pangshap shokhaira kaji theida yarui ashangva̱ chili kapeiunglaga hānga, “Iwui kachonli khipāna saza̱khala?” 31Awui sākhangatha̱bingna ngahānkai; “Nali mi hiyākhana kuinamda leilaga kathada ili khipāna saza̱khala da hangli?” 32Kha khipāna saza̱khala da yangkhui khavai ana kuimareida yanga. 33Kha sha̱naopava̱ china ali shokkahai chi theilaga ngacheerarang, kathirriri eina rāda ngakhumshām shokkahai otshot saikora rahānga. 34#Lk 7.50; Mk 10.52. Kala ana ali hānga, “Inao ngalāva̱, nawui shitkasang china nali phāngasakhaira, chingri eina ungulu, kala nawui kazāt raihaoranu.”

35Ana matuimahungda leilakha Jairuswui shim eina kachikathā mi akhana rāda ali rahānga, “Nanao ngalāva̱ aruicham thihaira. Khisāda ojāli sheikhautluisara?”

36Kha Jishuna manganāsangmila synagoguewui akhavā chili hānga, “Mangacheealu, thada shitsangmalu.” 37#Mk 9.2; 13.3. Chiwui thili ana Peter, James kala agato John maningla mi khipālikha mashurra ngasakmana. 38Athumna synagogue akhavāwui shimli vākashung tharan ngaunlop mibingna akhon panglāk eina chapngachāda leikasā chi Jishuna athei. 39Ana shimlungli zanglaga athumli hānga; “Khisāda ngaunlop chapkhangachākhala? Nao hi kathi maningmana kha kapina!” 40Athumna ali mana̱shiya, chi eina ana athum saikorali kayāngli kashamshokserhailaga nao chiwui ava̱ avā kala awui sākhangatha̱ kathum chili hokhuiphungda nao chili chipethaida khaleishong zanga. 41#Lk 7.14; Ots 9.40. Jishuna apāng singkhuida, “Talitha, cumi,” chiwui kakhalata “Kateowa sha̱nao, Ina nali kahāngna, ngakarthuilu” kajina.

42Chieina ana ngalāngda ngakarthuilaga zatphokuwa (A zingkum tharāda khani kāhairasai). Hi kashok eina athum matakhakhaowa. 43#Mk 1.43-44; 7.36. Kala Jishuna athumli mi khipālikha mahāngpailakmara da kasoi kala “Ali shaikhavai khuimilu” da hānga.

Currently Selected:

MARK 5: TANGBSI

Highlight

Copy