MARK 4

Athā Khayaoawui Chānjam

(Mat 13.1-9; Lk 8.4-8)

1 # Mat 13.1-9; Lk 8.4-8. Jishuna Galilee shamadrupheili tamchitheiphokluishita. Mi kachungkha rāhaida ana marikhongli kātonglaga alungvāk pama kala yaruina ngayiphei kathengli pama. 2Ana chānjam tui eina apong tarākha athumli tamchithei kala awui tamkachitheili hithada hānga: 3“Nganālu, athā khayaoa mi akhana athā yaokhavai vai. 4Ana khayao tharan athā kaikha shongfali tatunghaida vānaona ngamuizāhaowa. 5Kaikha ngalei tarākha makhalei, lungguina pemting kahai apamli tāzangda thaklāk eina kharshoka, kachiwui vangkhala kaja ngalei chi mathukmana; 6kala zimik kashok eina alungbing chi angayung thukta makhaleiwui vang phuithathaowa. 7Athā kaikha ka̱shatbingwui ngachaili tāzangda kashatrongbing hakkasang eina shangthathaowa, kala atheila mamatheimana. 8Athā kaikha ngalei katumli tāzanga, kala ashon shonshokta hakkasangla haksanga kala atheila matheiya. Arong kaikhali thumrara, kaikhali hangthararuk kala shāshā matheiya.” 9Kala ana hānga, “Shākhavai khanā kakā a china nganākhuiranu!”

Chānjambingwui Kharin

(Mat 13.10-17; Lk 8.9-10)

10 # Mat 13.10-15; Lk 8.9-10. Amāng kapam tharan, sākhangatha̱ tharāda khani kala athumli ngasoda leikasābingna chānjam chiwui pongli ali ngahāna. 11#1 Cor 5.12-13; Col 4.5; 1 Thes 4.12; 1 Tim 3.7. Jishuna athumli hānga, “Nathumli Vare wungramwui khangathuma tui chi mikahaina, kha chili makazangbingli chānjam tui eina shākhui khangasakna. 12#Isa 6.9-10. ‘Kaja, Athumna theikachanglala mamachukmara, athumna shākachanglala bhap matāmara; chithasāsi kaja athum Vareli latunghairara, kala ana athumli pheomihairara.”

Jishuna Athā Khayaoawui Chānjam Meikakhai

(Mat 13.18-23; Lk 8.11-15)

13 # Mat 13.18-23; Lk 8.11-15. Ana athumli hānga, “Chānjam tui hi nathum bhap matāmala? Chithākha nathum khangatei chānjambing kathada bhap tārakhala? 14Khayaoa china tui yaosanga, 15Tui chi yaoda shongfali tātung kahai athābing chi hibingna; athumna tui chi shāngasha̱da Satanna rālaga athumwui wuklungli yaosang kahai tui chi khuithuihaowa. 16Kala chi tākam eina lunggui khaleipamli tātung kahaibing chi hibingna, athumna tui chi shālaga mathānthathup eina khuisanga; 17kala khalattawui lungli angayung maleimana, kha kasha̱nakha ringa; kha tui chiwui vang kachotkachāng, rekakharek kharā tharan heng sāda yāmhaowa. 18Khangateibing chi ka̱shatlungli yaosang kahaibingna; athumna tui chi shai, 19kha okathuiwui malungkharing, kashāng ningkachang, kala khangatatei otli kakahaona yuihaida tui chi shangthathaowa kala atheila mamathei ngasakmana. 20Kha ngalei katumli tākatungbing chi tui chi shālaga khuikasangbing, atheila thumrāra, hangthararuk, shāshā khamatheibing china.

Luk eina Khum kahai Thaomei

(Lk 8.16-18)

21 # Mat 5.15; Lk 8.16; 11.33. Ana athumli hānga, “Thaomei sharlaga meishongli mahaila luk eina khumhai lah petzingli haila? 22#Mat 10.26; Lk 8.17; 12.2. Phongsharki kaji maningla thumkahai khikha maleimana, lah kahorli makhuishokmara da ngathum kahaila khikha maleimana. 23#Mat 11.15; Mk 4.9. Shākhavai khanā kakā a china nganākhuiranu.”

24 # Mat 7.2; Lk 6.38. Ana athumli hānga, “Nathumna shākhui kahai chili hengsanglu; nathumna khami khāntam chi nathumlila mipapamra, chili lāngmeidala mira. 25#Mat 13.12; 25.29; Lk 8.18; 19.26. Kaja khaleipali chungmei mirorra, kha makhaleipali awui leikasā eina tangda khuithuihaora.”

Athā Reikasangwui Chānjam

26 # Mat 13.24-30. Kala ana hānga, “Varewui wungram chi mi akhana luili athā yaosang kahai thada, 27ngayā pi, ngathor thui kala langpongda chithāpamlala athā chi ngachakkhailaga kathada khar kala reisangkhala da ana matheimana. 28Ngalei khalattana kharngasakta rimeikapta akung shok, chiwui thili amazān kala naoda māthei pemda mathei. 29Kha minkahai tharan chāngkui eina hātkhui kaja māhā atam rauwa.”

Kayānghanthāwui Chānjam

(Mat 13.31-32,34; Lk 13.18-19)

30 # Mat 13.31-32; Lk 13.18-19. Kala ana hānga, “Ithumna Varewui wungram hi khi eina pantampaira lah khi chānjam eina hāngsikhala? 31Hiya ngaleili yaokasang tharanva okathuili teomeithui kaje kayānghanthā kathāna. 32thālala lingsang kahai eina haksangda hanthothāp saikorawui ngachaili hakmeikap kaje ngasahaowa; aphāng kahakhakva̱ kachungkha shokta vānaobingna aphāng chiwui khaya̱li athip rāsai.”

33Athumna nganākhuikashap eina tangda paokaphā chi Jishuna chānjam tarākha eina hāshoka; 34#Mat 13.34; Joh 16.25. chānjam mashichinla ana athumli matamchitheimana, kha sākhangatha̱bingli athumāng khaleili meisā eina saikora meikhaichithei.

Jishuna Siphan Zingrot Kakhām

(Mat 8.23-27; Lk 8.22-25)

35 # Mat 8.18,23-27; Lk 8.22-25. Chithang ngazin ana athumli “Ngayi lākhavāk kānkāusa” da hānga. 36Chieina athumna yaruibingli nothāhailaga ali khuiphungda marikhong chili kātongda kankāhaowa. Kala khangatei marikhongbingla ali ngasoda kānruma. 37Chitharan siphan zingrot kashuirak ngasha̱ungda tara̱ ungngaphaosangda marikhong chi pemki jihaowa. 38Kha Jishuva khanukvāk khamkui sanglaga pisai kala athumna mathotkhuida hānga. “Ojā, ithum thihaoki kaji maningkharikmala?” 39Chieina Jishuna thuida masi chili khararra, kala shamadruli, “Chingrihaolu! Vihaolu!” da hānga. Masila maphanthuwa, chingri-vārihaowa. 40Ana athumli hānga; “Khisāda nathum ngacheehaokhala? Nathum shitkasang maleimala?” 41Athum matakhaknahaida akha eina akha, “Thākha mipa hi khipākhala? Masi kala shamadru eina tangdala awui kahāng nganāli!” da hāngngaroka.

Currently Selected:

MARK 4: TANGBSI

Highlight

Copy