MARK 16

Ringkhalui

(Mat 28.1-8; Lk 24.1-12; Joh 20.1-10)

1 # Mat 28.1-8; Lk 24.1-10; Joh 20.1-2. #Lk 23.56; Joh 19.39. Sabbath kānthui kahai eina Mary Magdalene, Jameswui ava̱ Mary kala Solome athumna Jishuli thao neomi khavai nganamkaphā thaoyur lokhui. 2Haptāwui kharethang ngathorthakva zimik kashok eina chikhurpam chili athum vai. 3Athum akha eina akha, “Chikhurwui lungsham chi ithumli khipāna khalangshokmira?” da ngazek ngaroka. 4Chieina athumna yangkai kala lungsham chi khalangshokhairakasā athumna thei—lungsham chi kahaka lungguina. 5Athumna chikhurli kazang eina yaronnao akha charshi kahai kachon ngavaida yāshong pamkasa chi theida athum matakhakhaowa. 6Kala ana athumli hānga, “Mamatakhakhaialu, nathum shaoshān kahaia Nazarethwui Jishuli kaphāna. A ringshokhaira, hili maleimana, ali kachipetpam hi yanglu. 7#Mk 14.28; Joh 21.1-23; Mat 28.7. Ara nathumna awui sākhangatha̱bing eina Peterli pao hi unghānglu, kaja ‘Ana nathumli rida Galileeli vara’, da ana nathumli hāngkahai thada nathumna ali chili samphangra.” 8Chieina athumna chikhurwui eina shokta yongthuihaowa, kaja kakathir kala kagashui athumli rāshunghaowa; athum ngacheenahaida khipālikha khikhala mahānglakmana.

Jishuna Mary Magdaleneli Rākachithei

(Mat 28.9-10; Joh 20.11-18)

9Haptāwui kharethang ngathorthakva̱ Jishuna ringshok kahaiwui thili Mary Magdalene, kaja ana kameo shini kashamshokmi kahaipāva̱li rimeikapta rāchithei. 10Ana Jishuli ngasokasābingli unghānga, chitharan athum chapngachāda leisai. 11Kha Jishu ringshokhaira kala ana ali theihaira da kahāng tharan athumna chi mashitsangmana.

Jishuna Sākhangatha̱ Khanili Rākachithei

(Mat 24.13-35)

12Chiwui thili Jishuna azak khangatei eina sākhangatha̱ khanili anina kharam vākida zatta leilakha rāchithei. 13Anina latungda kateibingli unghānga, kha athumna chi mashitsangthuwa.

Tharāda Akhali Jishuna Rākachithei

(Mat 28.16-20; Lk 24.36-49; Joh 20.19-23; Ots 1.6-8)

14Naomeikapta athum tharāda akha chi phazā mahunglakha Jishu rai; ana athumwui mashitkasang kala ning khamakangwui vang, kaja a ringshok kahaiwui thili ali katheibingwui tuili mashitkasangwui vang khararra. 15Ana hānga, “Okathui apam katongali vālu kala miyur saikorali paokaphā hi hāshoklu. 16Shitsangda ra̱hik kahai mi chili huimira; kha mashitkasanga mi chili khayon mira. 17Kala shitkasangbingli machut hi ngasora, iwui mingli athumna kameo kashamshokra; athumna tuiyur kadharla matuira. 18athumna phara̱ singkhuilala, kathiri manglala china athumli khikha masāza̱mara. athumna kakazānaobingwuitungli pāng parmiakha, kharai samphangra.”

Kazingram Kakā

(Lk 24.50-53; Ots 1.9-11)

19Proho Jishuna athumli hangchitheikup kahaiwui thili ali kazingramli khuikāhaowa kala Varewui yāshong chipama. 20Chieina athumna apam kachiva̱li vāda pao hāshoka kala Prohona athumli ngasoda ot sai kala athumwui paokapha chi mashunga kaji chi matakhak kahai ot kasā machut china phongshoka.

Currently Selected:

MARK 16: TANGBSI

Highlight

Copy