LUKE 1

1Leikashiya Theophilus, ithumwui ngachaili ungshung kahai otshotbingwui khararchān kapishok khavai mi kachungkhana athumwui kashap sāhaira. 2#1 Joh 1.1; Ots 1.21; Heb 2.3. Haokaphok eina thuida mik eina kathei samphang kahaibing kala tui chi hākashokbingna ithumli hāngmi kahai thada athumna kapishok kahaina. 3#Ots 1.1. Chiwui vang eina khayāshikapaiya amei Theophilus! Shokkahai otshotbing saikora haokaphok eina thuida ina munlak eina kazunyanglaga otshotbing chi nawui vang maron-maron eina kapikhami hi phārada phaninga. 4#Joh 20.31. Chithākha nali tamchithei kahaibingwui khamashung chi nana pongda theikhuipaira.

Ra̱hikme Johnwui Kapharā Kachishāt

5 # Mat 2.1; 1 Thot 24.10; 2 Thot 31.2. Judeawui awunga Herodwui atamli Abijah pāngmonshiwui eina Zechariah kaho pāngmon akha leisai. Apreiva̱li Elezabeth hoi; Aaron pāngmonshi shimkhurwui einana. 6Ani khanini Varewui mangāli khamashung-khangarong mi sāda Prohowui ningkhami kala shiyan saikora mayonda shāt makālakla okthuisai. 7Kha ani nao maleimana, kachiwui vangkhala kaja Elizabethva nao kashumva̱na kala ani kasarla sarhairasai.

8Thang zimikshokha khorumshimli otram khangatha̱ chi Zechariah ashangva̱wui yar sāhaida ana pāngmonwui ot sāda leisai. 9#Sho 30.7. Pāngmonbingwui khangachāyan athishurda Prohowui khorumshimli zangda nganamkaphā riktā khavai ka̱lā yanglaga awuili tāhaowa. 10Nganamkaphā riktāda leilakha yarui saikora kayāngli seihā sāpama. 11#Lk 2.9; Ots 5.19. Prohowui kazingrao akha nganamkaphā riktā khavai hanphut chiwui yāvāk rānganinga. 12Zechariahna ali kathei eina kashuihaowa kala khangacheela ngacheehaowa. 13#Lk 1.30,60. Kha kazingrao china ali hānga, “Zechariah, mangacheealu, Varena nawui seihā kasā shāmihaira, chieina napreiva̱ Elizabethna mayarnao akha pharāra. Nana awui ming John phokra.

14Nana ringphāda mathānra

kala mi kachungkhana awui kapharāli mathānrumra;

15 # Mis 6.3; Lk 7.33. Kaja Prohowui miktāli a kahaka mi ngasāra

kala zamkhorla, khamaripa otla masāza̱mara,

Ava̱wui naopamli leilakhawui eina,

ali Manglā Kathara pemtinghaora.

16Israelnao kachungkhali ana athumwui Proho Vareli latung ngasakra.

17 # Mat 11.14; 17.13; Mal 4.5. Marān Elijahwui thada pangshap leilak eina kala hakmahālak eina zatra;

ana avāva̱ eina naongarābingwui ning ngarum ngasakra,

kala kahāng makhanganābingli mashun thangmei chili latung ngasakra

kala Prohowui mibingli awuivang ngaranpinghaisā ngasakra.”

18 # Lk 1.34. Chieina Zechariahna kazingrao chili hānga, “Hi ina kathada theikhuipairakhala? Kaja I kasarnaona kala ipreiva̱la sarhaira.” 19#Dan 8.16; 9.21; Mat 18.10. Kazingrao china ali ngahānkai, “I Varewui mangāli khanganinga Gabrielna, nali ngazek khavai kala khamathā chānpao hi khuirāmi khavai ili chihokharāna. 20Yanglu, na khak mashokmara kala shokki kaji mashokranglakha eina tangda khak ngasha̱ra; khiwui vangkhala kaja ngashitmi kahai atamli ungshungki kaji iwui tuili nana mashitsangthuwa.” 21Mibingna Zechariahli ngaraipama. Ana khorumshimli sha̱rākha pamkahaiwui vang eina athum ningkashakhaowa. 22Kala ana ayarli kashok tharan athumli khichānkhala mangazekrarthuwa. Chieina ali khorumshimli khamahā akha samphang kahaina da athumna phaninga kala ana tui mamatuipaithuda athumli khudam eina sāchithei. 23Zechariahna awui otram khangatha̱ atam peiuda shimli hanunghaowa.

24Khaleilaga apreiva̱ Elizabeth nao vaihaowa kala kachāng phangā sha̱kha shimli ngathumpama. 25#Hao 30.23; Isa 4.1. Ana hānga, “Ara ili Prohona ngachonmida mibingwui mangāli iwui maikashi khuithuimihaira.”

Jishuwui Kapharā Kachishat

26Elizabethna nao vaida kachāng katharuka kakā tharan Varena kazingrao Gabrielli Galileewui keinung Nazarethli shivāta. 27Ana Davidwui naotun Joseph kaho mayara chili khāmhaikasa kachingva̱ sha̱nao chili pao khuirai, kachingva̱ chili Mary hoi. 28Kazingrao china ali rāhānga, “Ringphālu, he ngahānkhangaiva̱, Prohona nali ngasomida lei.” 29Kha tui chi shālaga a ning kazāhaowa kala hāngda khalei tui chi khi ngasānikhala da ningli machuka. 30#Lk 1.13. Chieina kazingrao china ali hānga, “Mangacheealu, Mary, kaja na Varewui lukhamashan samphanghaira. 31#Lk 2.21; Mat 1.21. Yanglu, nana nao vaida mayarnao akha pharāra kala nana awui ming Jishu phokra.

32A kahaka ngasāra, kala juikhamataia Varewui Naomayara hora;

Proho Varena avāva̱ Davidwui wungram chi ali mira,

33 # Mat 28.18; Dan 2.44. Jacobwui ara̱-azāli katang mavaila

ana mungra kala awui wungpam katang mavaimara.”

34 # Lk 1.18. Chieina Maryna kazingrao chili hānga, “Hi kathada shokpairakhala, iva gaharala maleimana?.” 35#Mat 1.20. Kala kazingrao china ali hānga,

“Manglā Katharana nawuitungli tāra,

kala juikhamataiawui pangshap china nali rakhayinmira;

chiwui vang eina pharāki kaje nao chili

kathara Varewui Naomayara hora.

36Yanglu, nawui athei-asā kashokva̱ Elizabethla asarlam mayarnao akha vaihaira. Kashumva̱ hokasā ana nao vaida hina katharuka kachāngna. 37#Hao 18.14. Kaja Varewui vang saknā kahai khikha maleimana.” 38Chieina Maryna ngahānkai, “Yanglu, iya Prohowui rao sha̱naona, nawui kahāng athishurda shokranu.” Chiwui thili kazingrao chi awui eina thuihaowa.

Maryna Elizabethli Khavā

39Chiwui thili Maryna ngakarthuida kaphungli khalei Judeawui keinung akhali hengsāda vai. 40Ana Zechariahwui shimli azunda Elizabethli samphang khangarokwui shālam sai. 41Elizabethna Marywui shālam tui shāngasha̱da awui naopamli khalei nao chi ngasonkai kala Elizabeth Manglā Katharana pemtinghaowa. 42#Lk 11.27-28. Chieina ana panglāk eina “Sha̱naowui ngachaili na hi somi kahaiva̱ ngasaranu; kala nawui naopamwui eina shokki kaje athei chi sokhami kala khamahai ngasāranu! da hānga. 43Khiwui vang eina ili hiyākha ka̱lā mahai ngasakta iwui Prohowui ava̱va̱ iwuili kharākhala? 44Yanglu, nawui shālam tui shākhaleoda iwui naopamli khalei nao hina khamathānwui vang ngasonkai. 45Prohona ali hāngkahai chi ungshunglakra da shitkasanga sha̱nao chi sokhami ngasāranu.”

Marywui Masot Kachikat Laa

46Chieina Maryna hānga,

“Iwui wuklungna Proholi sochikata.

47Iwui Huikhame Varewui mangāli imanglā mathāna.

48Kaja ana awui khangazanva̱ rao sha̱naoli phaningmihaira.

Khikhalajila yanglu, aja eina thuida thot kachiva̱na,

ili somi kahaiva̱ da hora.

49Khikhalajila Reikhamataia Varena iwui vang hakkhamahā ot sāmihaira,

kala Kathara kaho hi awui mingna.

50Ali khangacheebingwuitungli awui lukhamashan thot-thot kachida lei.

51Awui pāngthei katingshokta sāshap pangshap chithei,

kala langkasobingli athumwui wuklungwui khangarān chi sākhayangmi.

52Ana Pangshapa khamungabingli wungpamkhong eina khuishoka,

kala khangazanbingli khāngkāmi;

53Ana kathaibingli kaphā ot eina thongasaka,

kala kashāngbingli khamasai eina chihohai.

54Ana awui lukhamashan phaningungda

awui rao Israelli ngachonmi,

55 # Mic 7.20; Hao 17.7; 18.18; 22.17. ana ishāvā ngarā Abraham eina awui naotunbingli katang mavaila ngazeka.”

56Maryna Elizabethli kachāng kathum sha̱kha angasopamlaga shimli hanunghaowa.

Ra̱hikme Johnli Kapharā

57Ara Elizabethwui naosak atam ungshunguda ana mayarnao akha pharai. 58Prohona ali hakkhamahā lukhamashan miya kaji awui khongnainaobing kala athei-asābingna shai kala ali ringphārumma. 59#Pāng 12.3; Hao 17.12. Kachishatathang nao chili athumna ahui rimshokmi khavai rai kala avāva̱wui ming khuida ali Zechariah phokki jihairasai. 60Kha ava̱va̱na “Chi maningmana, ali John hora” jihaowa. 61Chieina athumna ali hānga, “Nashi theisā khipālikha hikathā aming maphoklakranga.” 62Chiwui thili athumna avāva̱li awui ming khi phokrakhala da ingkit eina ngahāna. 63#Lk 1.13. Chieina ana kapi khavai slate akha poi kala chili “Awui ming John” da kapimi. Chieina athum saikora matakhakhaowa. 64Kala ngalāngda a tui matuipaihaoda ana Vareli masochikata. 65Chieina khongnainaobing saikora ngacheeshunhaowa kala shokkahai otshot saikora hi Judea kaphungwui kha̱wung kachida ngazeklophaowa. 66Kashā mi saikorana shākakhui tui chi athumwui ningli tipsanghailaga “Nao hi kachikathā ngasāsānikhala” da matakhakhai, kaja Prohowui pāng chi ali ngasomi.

Zechariahwui Laa

67Avāva̱ Zechariahli Manglā Katharana pemtinghaoda ana marānda hānga;

68“Israelwui Proho Vareli sosersa,

kaja ana awui mibingli rāngachonmida athumli ngatangkhuihaira.

69Awui rao David shimkhurwui eina ana ithumwui vang pangshap khaleia

Huikhame akha shokngasakhaira;

70ana achālakhawui eina awui kathara marānbingwui khamor eina hāngmarānmi kahai thada,

71ithumli yangkashebing kala ithumli

yangkakharinga saikorawui einala kanmira;

72ishāvā ngarāli lukhamashan chithei khavai,

kala awui kathara tuingashit phaningung khavai.

73ithumwui avāva̱ Abrahamli ngashitmi kahai tuingashit,

74ithumli samphang ngasaki kaji chiya;

yangkashe pāngwui eina kanmi kahai mibing ngasāda,

khangachee maleila ali otram ngatha̱paira.

75kala awui mangāli ithum mirin peichaoda kathar kala khamashung-khangarong eina otram ngatha̱paira.

76 # Lk 7.26; Mal 4.5. “Chieina inao, nali Juikhamataiya Varewui marān hora,

kaja awui shongfa ngarānmi khavai nana Proholi rida zatra,

77 # Mic 1.4. awui mibingli huikhamiwui awor tamchithei khavai;

morei pheokhami lungli huimira da.

78 # Mal 4.2; Eph 5.14. Varewui lukhamashan mangā eina,

ithumwuitungli ana huikhamiwui kahor shokkhangasak chitharan,

79 # Isa 9.2; Mat 4.16. tangkhamang kala kathi khaya̱lungli kapambingli kahor mira,

kala chingri kahai pongli zatkhavai thānmira.”

80 # Lk 2.40; 2.52. Kala nao chi rarsangmamānda manglārinla pangsanga kala Israelnaobingli phonglāk eina machitheiranglakha eina tangda ana lamhāngli pama.

Currently Selected:

LUKE 1: TANGBSI

Highlight

Copy