LUKE 2
2
Jishuli Kapharā
(Mat 1.18-25)
1 #
Lk 3.1. Chitharan Caesar Augustusna Rome shorkarwui azingli khalei mi mashing shānkhuilu da hukhum sai. 2Hi mishān kharena; kala chitharan Quiriniusna Syriawui governor sāsai. 3Mi saikora mishānli zangkhavai kachichāramli ungsera. 4#Lk 1.27. Josephla Galileeli khalei Nazareth keinungwui eina Judeali khalei Bethlehem kaho Davidwui keinung chili vai, kachiwui vangkhala kaja Joseph hi Davidwui naotunna. 5Awui khām kahaiva̱ Maryli ngasoda ming chankhavai khavā tharan Mary nao vaisai. 6Ani apam chili leilakha Marywui naosak atam ungshunghaowa. 7Kala awui naochizai mayarnao akha pharai kala ali naokhalui eina khaluilaga sigui khongsaili chipethai, khiwui vangkhala kaja kha̱ chili ani shimzun mangarinthuwa.
Yaokahomabing eina Kazingraobing
8Ngalei chili yaokahomabingna luili athumwui yao ashangva̱ ngayāshong mayonpisai. 9#Lk 1.11; Ots 5.19. Athumwui ngalemli Prohowui kazingrao akha rāda Prohowui tekhamatei hingpik kahai china athumli kuimareida hora kala athum ngacheelakhaowa. 10Chieina athumli kazingrao china hānga, “Mangacheealu, kaja yanglu, mi saikorawui vang ringphākhailak kahai paokhamathā ina nathumli khuirākhamina. 11#Joh 4.42; Ots 5.31; Mat 16.16; Ots 2.36. Aja Davidwui keinungli nathumwui vang Huikhame akha pharāhaira, ava Proho Khristana. 12#1 Sam 2.34; 2 Wung 19.29; Isa 7.14. Hina nathumwui vang machut akha ngasāra kaja nathumna angangnao akha naokhalui eina khaluilaga sigui khongsaili chipet kahai samphangra.” 13Kashuirak eina kazingrao chili ngasoda kazingramwui rao tarākha rāda Vareli masochikatta hānga;
14 #
Lk 19.38; 3.22. “Juimeikap kaje Vareli tekmateiranu,
kala okathuili ana ningyāngkhaunga mibingwui alungli chingrihairanu.”
15Kazingraobing china athumwui eina thuihaida kazingli latung kahai tharan, yaokahomabing chi akha eina akha ngazek ngarokta hānga, “Ithum Bethlehemli vāusa, kala Prohona ithumli chitheikhami shokkahai otshot chi vāyangsa.” 16Chieina athumna thaklāk eina vāda Mary eina Joseph kala sigui khongsaili chipet kahai angangnao chili vāsamphanga. 17Athumna nao chi kathei eina kazingraona angangnao chiwui maramli hāngmi kahai chi hāngchithei. 18Yaokahombingwui tui chi kashā saikora matakhakhai. 19#Lk 2.51. Kha Maryna ot saikora chi machuklaga awui wuklungli tipsanghai. 20Yaokahombing china athumwui theikakhui shākakhui saikora chiwui vang Vareli tekmatei khangasak eina ngasoda masochikatta latunghaowa. Kaja chi athumli hānghairasai.
Jishuli Aming Kaphok
21 #
Lk 1.31,59; Mat 1.25. Zimiksho chishatthangwui thili angangnao chili ahui rimkashok tharan ali Jishu phoka, aming hi ava̱va̱na ali mavairanglakha kazingraona phoklu da hāngmi kahaina.
Jishuli khorumshimli Khuikakā
22 #
Pāng 12.2-8. Moseswui Ain athishurda pheomatharkhami atam ungkashung tharan anina nao chi Prohowui mangāli chigat khavai Jerusalemli khuikai. 23#Sho 13.2; 12. Kaja Prohowui ainli hithada kapihai, “Naochizai mayarnao kachiva̱ Proholi tharchigatphalungra.” 24Kala Prohowui ainli kaso kahai pha̱phayā khavai nasha̱ khani lah khana̱ khanila khuiphunga. 25#Lk 2.38; 23.51. Chitharan Simeon kaho mayarnao akha Jerusalemli leisai, a khamashung-khangarong, shitkasang khangazipa Israelli makarkhami honkapama kala Manglā Katharana ngasokhame mina. 26Prohowui Khrista chi matheiranglakha eina tangda a mathimara da Manglā Katharana phongmihairasai. 27Manglāna thānkhami mangā eina ana khorumshimli rai, kala angangnao Jishuli ainwui khangachā athishurda sāmi khavai ava̱ eina avāva̱na khorumshimli khuikakā tharan, 28Simeonna ali vamkhuida Vareli sochikatta hānga,
29“Proho, ara naraoli chingri eina thuingasakmihaolu,
Nawui tuingashit athishurda;
30 #
Isa 52.10; Lk 3.6. Kaja imik eina theihaira nawui huikhami chi.
31Hi nana ngarān kahaina, miyur saikorawui mangāli,
32 #
Isa 42.6; 49.6; Ots 13.47; 26.23. Hi nawui kaphaning Gentilebingli phongshokmi khavai kahorna,
kala nawui miyur Israel tekmatei khavaina.”
33Angangnao chiwui pongli kahāng chi shālaga ava̱ eina avāva̱ matakhakhaowa; 34kala Simeonna somida ava̱va̱ Maryli hānga,
“Yanglu, angangnao hi Israel kachungkha konglui khavai kala ngakarthui khavai,
kala hānghaikasawui khudam sāda kapangkhui kahaina
35(raighai akhana namanglālila tophutshokra)
Chieina kachungkhawui ngathum kahai kaphaning phongmira.”
36 #
Ots 21.9; Jos 19.24; 1 Tim 5.9. Ashershi shangli Phanuelwui naongalāva̱ Anna kahova̱ marān akha leisai, a sarhairasai kala fathuida zingkum shinimang agaharali ngasopama, 37kala kum hangchishata mati kakā eina tangda ra̱meipama. Ana ngashun ngayā mateila kakhumla khum, seihāla sāda Vareli khorumlaga khorumshimwui eina mathuilakmana. 38Ana atam chichangli khorumshimli kāda Vareli ningkashi mi kala Jerusalemli ngatangkhami honda khalei saikorali nao chiwui pongli hāngchithei.
Nazarethli Latkhaung
39Prohowui ain athishurda athumna ot saikora sākup kahai eina Galileeli khalei athumwui keinung Nazarethli latunghaowa. 40#Wung 13.24; 1 Sam 2.26. Nao chi rarsangmamānda kapangla pangsanga, aworla pemtinghaowa kala Varewui khalum chi awuitungli lei.
Naoshinao Jishuna khorumshimli Kapam
41 #
Khal 16.1-8; Sho 23.15. Ava̱ eina avāva̱na kum kachida Makānkhami phanit Jerusalemli azangchinga. 42Jishuna kum tharāda khani kākashung eina khangachā athishurda phanitli azanga. 43Phanitpei athumna latkhaung tharan nao Jishuva Jerusalemli pamsanghaowa. Chi ava̱ eina avā matheisāthuwa. 44Kha yaruili ngasozatta leira da phaninghaoda thangkhawui shongzā zatkahaiwui thili athei-asābing eina ngasotnaobingwuili ngathingvai; 45masamkaphang eina anina ali phākhavai Jerusalemli latvai. 46Zimiksho kakathumathang Jishuna khorumshimli ojābingwui ngachaili pamda athumwui tuila nganā kala khangahānla sāda leikasā chi athei. 47Awui theishingkakhui kala ngahānkakā kashā mi saikorana matakhakhai. 48#Mk 3.31-35. Anina ali kathei eina matakhakhaida ava̱va̱na ali hānga, “Inao nava khi kasāniji? Yanglu, navā iniva malung tātungnanai nali phāhaira.” 49Chieina ana ngahānkai, “Nanina ili phākazat kathakahaini ji? I iwui Avāwui shimli pamra kaji nani matheithulā?” 50Ana kahāng tui chi anina bhap matārarthuwa. 51#Lk 2.19. Chiwui thili anili ngasophungda Nazarethli latungda ana aniwui kahāng nganai kala ot saikora hi ava̱va̱na wuklungli tipsanghai.
52 #
Lk 1.80; 2.40. Jishuna aworla, pha̱sakla mataisangmamānda Varenala mikumonala lumkālaka.
Currently Selected:
LUKE 2: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
