LUKE 3

Ra̱hikme Johnwui Tamkachithei

(Mat 3.1-2; Mk 1.1-8; Joh 1.19-28)

1 # Lk 23.1; 9.7; 13.31; 23.7. Caesar Tiberiusna mungda tharāda kaphangā kum Pontius Pilatena Judeawui governor, Herodna Galileewui tetrarch kala agato Philipna Iturea eina Trachonitiswui tetrarch kala Lysaniasna Abilenewui tetrarch sāda leilakha, 2#Joh 18.13; Ots 4.6; Mat 26.3; Joh 11.49. Annas eina Caiaphasna pāngmon kharei kasā atamli Zechariahwui naomayara Johnna lamhāngli leilakha Varewui tui chi rāphongmiya. 3#Mat 3.1-10; Mk 1.1-5; Joh 1.6,23. Chieina Jordanwui kuikhamareili khalei apam saikorali vāda morei pheomi khavai ningngateida ra̱hiklu da pao hāshoka. 4#Isa 40.3-5. Kaja Isaiah marānwui lairikli hithada kapihai;

“Akhon akhana lamhāngli vaozatta lei:

Prohowui shongfa ngarānlu,

awui apongbing ngatar ngasaklu.

5Tampāk kachiva̱ chipemkāra,

kala phungrei phungrā kachiva̱ nemngasakra.

kala khamakhui ngatar ngasakra,

kala kokatro apongbing khayammira;

6 # Lk 2.30. kala phasā khavaia saikorana Varewui huikhami theisera.’”

7 # Mat 12.34; 23.33. Chiwui vang eina ra̱hikmilu da kharā mi ashangva̱ chili ana hānga, “He, phara̱wui dharābing! Rāki kaji malungkhavātwui eina yāmkhavai nathumli khipāna hāngkhala? 8#Joh 8.33,39. Ning khangateiwui ngarakzak kahai athei mathei ngasaklu kala nathum khalatta ‘Ithumwui avāva̱ Abraham lei’ da mahāngalu, kaja ina nathumli kahāngna, ngalungbing hiwui eina Varena Abrahamli nao kachungkha semmishapa. 9#Mat 7.19; Heb 6.7-8. Arui eina tangda thingngayungli ngahā parhaida lei, chiwui vang eina athei khamathā makhamathei thingrong kachiva̱ ta̱teklaga meilungli horsanghaora.”

10Chieina mi kachungkha china ali ngahāna, “Chithākha ithumna khi sarakhala?” 11#Lk 7.29. Ana athumli ngahānkai, “Phahon khani khaleia mi china akhala makhaleia mipā chili ngayarmilu; kala kashakazā khaleia chinala makhaleia chili chithada miranu.” 12Khashinā khalokabingla ra̱hikmi khavai rāda ali hānga, “Ojā, ithumna khi sarakhala?” 13Chieina ana athumli ngahānkai, “Nathumna ngashaiki kaji chili lāngda mangashaialu.” 14Shipaibingnala ali ngahāna, “Thākha ithumna khi sara̱khala?” Chieina ana athumli hānga, “Khipālikha tandi sāda mangaponalu, kaphenla maphenphāphaalu, nathumwui tolop chi shapa da phaninglu.”

15 # Ots 13.25; Joh 1.19-22. Mibingwui kachihān leihaogada athum saikorana John hi Khrista chiralā da athumwui wuklungli machuklakha, 16#Mat 3.11-12; Mk 1.7-8; Joh 1.26-27,33; Ots 1.5; 11.16; 19.4. Johnna athum saikorali hānga, “Ina nathumli tara̱ eina ra̱hikmi kha ili reikhamei a chi rārāli, I awui pheihop khara̱ eina tangda khalāmikida matik machāmana. Ana nathumli Manglā Kathara kala Mei eina ra̱hikmira. 17Lanpumwui mā chi heikhui khavai kala kapanga mā chi kazipkhuida chumli haikhavai yāmkok chi awui pāngli lei, kha ana ahikbing chi masāshimitkapai meilungli chithothaora.”

18Hithada sāda apong kachungkha eina ana kasatkasang eina ngasoda mibingli paokaphā hāshoka. 19#Mat 14.3-4; Mk 6.17-18. Kha Johnna Herod Governorli agato preiva̱ Herodiasli ngakum kahaiwui vang kala ana makaphā ot kachungkha sāhaida hāngkhamachinwui vang, 20Herodna makaphātungli makaphā ngarorda Johnli phātop sanghaowa.

Jishuli Ra̱kahik

(Mat 3.13-17; Mk 1.9-11)

21 # Mat 3.13-17; Mk 1.9-11; Joh 1.29-34. #Lk 5.16; 6.12; 9.18,28; 11.1; Mk 1.35. Mi saikorali ra̱hikmi kahaiwui thili kala Jishulila ra̱hikmihailaga seihā sāmahunglakha kazingram shohaowa; 22#Laa 2.7; Isa 42.1; Lk 9.35; Ots 10.38; 2 Pet 1.17. kala Manglā Katharana nasha̱wui azak khuida awuitungli tapa̱ya kala kazingramwui eina akhon akha vaorai, “Na iwui khaluma Naomayarana, Ina nali ningyāng unglaka.”

Jishuwui Mi-un

(Mat 1.1-17)

23 # Mat 1.1-17; Hao 5.3-32; 11.10-26; Rut 4.18-22; 1 Thot 1.1-4; 24.28; 2.1-15. #Joh 8.57; Lk 1.27. Jishuna awui ot sākaphok tharan, awui zimgkum thumra sha̱kha kāhairasai. Ava (mina kaphaning thada) Heliwui naomayara Josephwui naona, 24Heli Mathatwui nao, Mathat Leviwui nao, Levi Melchiwui nao, Melchi Janna-iwui nao, Janna-i Josephwui nao, 25Joseph Mattathiaswui nao, Mattathias Amoswui nao, Amos Nahumwui nao, Nahum Esliwui nao, Esli Nagga-iwui nao, 26Nagga-i Maathwui nao, Maath Mattathiaswui nao, Mattathias Seme-inwui nao, Seme-in Josechwui nao, Josech Jodawui nao, 27Joda Joananwui nao, Joanan Rhesawui nao, Rhesa Zerubbabelwui nao, Zerubbabel Shealtielwui nao, Shealtiel Neriwui nao, 28Neri Melchiwui nao, Melchi Addiwui nao, Addi Kosamwui nao, Kosam Elmadamwui nao, Elmadam Erwui nao, 29Er Joshuawui nao, Joshua Eliezarwui nao, Eliezar Jorimwui nao, Jorim Matthatwui nao, Matthat Leviwui nao, 30Levi Simeonwui nao, Simeon Judahwui nao, Judah Josephwui nao, Joseph Johnamwui nao, Johnam Eliakimwui nao, 31Eliakim Meleawui nao, Melea Mennawui nao, Menna Mattathawui nao, Mattatha Nathanwui nao, Nathan Davidwui nao, 32David Jessewui nao, Jesse Obedwui nao, Obed Boazwui nao, Boaz Salmonwui nao, Salmon Nahshonwui nao, Nahshon Amminadabwui nao, 33Amminadab Adminwui nao, Admin Arniwui nao, Arni Hezronwui nao, Hezron Perezwui nao, Perez Judahwui nao, 34Judah Jacobwui nao, Jacob Isaacwui nao, Isaac Abrahamwui nao, Abraham Terahwui nao, Terah Nahorwui nao, 35Nahor Serugwui nao, Serug Reuwui nao, Reu Pelegwui nao, Peleg Eberwui nao, Eber Shelahwui nao, 36Shelah Cainanwui nao, Cainan Arphaxadwui nao, Arphaxad Shemwui nao, Shem Noahwui nao, Noah Lemechwui nao, 37Lamek Methuselahwui nao, Methuselah Enochwui nao, Enoch Jaredwui nao, Jared Mahalaleelwui nao, Mahalaleel Cainanwui nao, Cainan Enoswui nao, 38Enos Sethwui nao, Seth Adamwui naona kala Adam Varewui naona.

Currently Selected:

LUKE 3: TANGBSI

Highlight

Copy