LUKE 4

Jishuli Kasui

(Mat 4.1-11; Mk 1.12-13)

1 # Mat 4.1-11; Mk 1.12-13. Manglā Kathara pemting eina Jishuna Jordanwui eina latunga kala Manglāna lamhāngli thānvai. 2#Khal 9.9; 1 Wung 19.8. Chili zimiksho hangmatithang ali chipeena suipama. Ana zimiksho chirankha khikha mazā-mamang kajiwui vang akuplamva thailakhaowa 3Chipeena ali hānga, “Na Varewui naomayarana jiakha lunggui hi khamui onkhavai kasolu.” 4#Khal 8.3. Chieina Jishuna ngahānkai, “Hithada kapihaida lei; ‘Mina khamuimāng eina maringmana.’” 5Chiwui thili chipeena apam kajui akhali thānkai, kala okathui wungram saikora mikkhayip akhawui alungli chithei. 6#1 Joh 5.19. Kala ana hānga, “Ina nali pangshap kala tekhamatei saikora hi mira. Hi ili mikahaina. Chieina ina mikhangaiali mishapa, 7nana ili khorumakha saikora hi nawui sāserra.” 8#Khal 6.13. Chieina Jishuna ngahānkai, “Hithada kapihaida lei,

‘Nana Proho nawui Varemāngli khorumra,

kala amāngli otram ngatha̱ra.’”

9Chiwui thili chipee china ali Jerusalemli thanvāda juimeikap kaje khorumshim atonli kānganing ngasaklaga hānga, “Na Varewui naomayarana jiakha hiwui eina ngawoktālu, 10#Laa 91.11-12. kaja hithada kapihaida lei, ‘Nali yangmi khavai Varena awui kazingrao chihorāra;

11kala naphei lungguili mangaphokza̱ khavai,

athumwui pāng eina nali ngayuikhuira.’”

12 # Khal 6.16. Chieina Jishuna ngahānkai, “Hithada kapihaida lei, ‘Nana Proho nawui Vareli masuipaimara.’” 13#Lk 22.28. Kala chipee china suiki kaji suikuphailaga atam kachā masamphangranglakha eina tangdawui vang awui eina thuihaowa.

Galileeli Otram Ngatha̱kaphok

(Mat 4.12-17; Mk 1.14-15)

14 # Mat 4.12; Mk 1.14; Mat 9.26; Lk 4.37. Chiwui thili Jishuna Manglā Katharawui pangshap eina Galileeli latunga kala chiwui kuikhamarelili khalei apam saikorali awui ming ngayaovāserhaowa. 15#Mat 4.23; 9.35; 11.1. Ana athumwui Synagogueli tamchithei kala mi saikorana ali soi.

Nazarethli Jishuli Makhamayā

(Mat 13.53-58; Mk 6.1-6)

16 # Mat 13.53-58; Mk 6.1-6; Ots 13.14-16. Chiwui thili ana ali nganaokakā ram Nazarethli hanunga kala khangachā sākasā thada ana sabbaththang Synagogueli vai. Kala ana lairik pākhavai thuinganinga. 17Kala Isaiah marānwui lairik chi ali mi. Ana lairik chi harkhayang eina hithada kapi kahai tuipam chi samphanga;

18 # Isa 61.1-2. “Prohowui Manglā chi iwuitungli lei.

Khikhalajila kachāmabingli paokaphā hashok khavai,

ana ili thao neomihaira.

Narkahaibingli chihomi khavai,

khangapeobing theiluishit khavai,

chāngkhareng kahaibing ningkhān khavai.

19Prohowui mayākhami zingkum rāhaira da,

vaomalānmi khavai ili kashirātna.”

20Ana lairik chi khaluikhuida rao chili mihailaga pamkazang eina, chili leikasā mi saikorana ali yangvāsera. 21Chieina ana athumli hāngphokuwa, “Varewui tui chi aja nathumna kashā eina ungshunghaira.” 22#Joh 6.42; 7.15. Mi saikorana sosera kala awui khamor eina lukhamashan tui kashok chi shālaga matakhakhaida hānga, “Hi Josephwui naomayara chi maningmalā?” 23#Mk 1.21; 2.1; Joh 4.46. Chieina ana hānga, “Makahatlakla chānjam tui hi nathumna ili hāngra, ‘Khanong, na khalatta raikhuilu, nana Capernaumli sākahahai ithumna shākahai chi naram ngaleilila sālu’ jira.” 24#Joh 4.44. Chieina ana hānglui, “Kachangkhat eina ina nathumli kahāngna, marān khipālikha khalattaramli khamayā maleimana.” 25#1 Wung 17.1,8-16; 18.1; Jam 5.17-18. Kha ina nathumli mashuntui hi kahāngna, “Elijahwui atamli zingkum kathum, kachāng tharuk Varena kazing maro ngasakthuda apam hupva̱li chāmrei kharā tharan Israelli ra̱meinao kachungkha leisai, 26thālala Elijahli, Sidon ngaleiwui Zarephatli khalei rameiva̱wuili maningla khangateiwuili mashivātmana. 27#2 Wung 5.1-14. Kala Elisha marānwui atamli Israelli phārrei kakazā mi kachungkha leisai; thālala Syriawui Naaman maningla khangatei khipālikha matharmimana.” 28Tui chi kashā eina Synagogueli leikasā mi saikorana malungvātlakhaowa. 29#Ots 7.58; Mis 15.35. Chieina athumna ngakarthuida ali keinungwui eina shimenshoka kala athumwui keinung sakā kahai kaphungton chiwui eina sha̱tā khavai ali thānvai. 30#Joh 8.59; 10.39. Kha ana yaruiwui ngachaili ngara̱thuihaowa.

Raih Kazanga Mi akha

(Mk 1.21-23)

31 # Mk 1.21-28. Chiwui thili ana Galileewui keinung Capernaumshong tāda sabbaththang athumli tamchithei. 32#Mat 7.28; 13.54; 22.33; Mk 11.18; Joh 7.46. Athumna awui tamkachithei chili matakhakhaowa, kaja ana sāshap pangshap eina matui. 33Chitharan Syngogueli raih kazanga mi akha leisai, ana panglāk eina vāoshoka, 34“He Nazarethwui Jishu! nana ithumli khi sāki kajikhala? Ithumli shimān ngasak khavai kharāla? Na khipākhala da ithumna thei; na Varewui Tharkhamathengpā china.”

35Kha Jishuna makathar manglā chili kaharda hānga, “Akhon mashoklu, awui eina shokhaolu.” Makaphā manglā china ali horkarsanghailaga zakkashi khikha masāla awui eina shokhaowa.

36Mibing chi matakhakhaida akha eina akha ngazek ngarokta, “Hi khitui khala? Ana sāshap pangshap eina makathara manglā chili kakaso eina athumnala yāmshokli” da matuiya. 37#Lk 4.14; 5.15; Mat 9.26. Chieina ngalei chiwui kuikhamareili khalei apam saikorali awui pao hi ngayaonaphaowa.

Jishuna Mi Kachungkhali Raikhami

(Mat 8.14-17; Mk 1.29-34)

38 # Mat 8.14-17; Mk 1.29-34. Jishuna ngakarthuida Synagoguewui eina shoklaga Simonwui shimli vai. Chitharan Simonwui aniva̱ kharurda leisai. 39Ana preiva̱ chiwui ngalemli anganingda kakharur raikhavai kakaso eina raihaowa kala ana hengsāda ngakarthuilaga athumli otram ngatha̱mi.

40Zimik tunkahaiwui thili kazātyur khangatateiwui eina kakazānaobing awuili khuirai. Ana mi kachiva̱wuitungli pāng parrorda athumwui kakazā raimi. 41Mi kachungkhawui eina chipeebing china “Na Varewui naomayarana” da panglāk eina vaolaga yāmshoka. Kha ana athumli khararda tuila mamatui ngasakmana, khiwui vangkhala kaja athumna a Khrista china da theihaowa.

Jishuna Synagogueli Pao Hākashok

(Mk 1.35-39)

42 # Mk 1.35-38. Kazing kathang eina Jishuna ngachakyang kahai apam akhali vai kala mibingna ali phāda samkaphang eina ali mathui khavai sai. 43Kha ana athumli hānga, “Ina khangatei keinungbinglila Vare wungramwui paokaphā hi hashokphalungra; kaja hi sākhavai ili kashirātna.” 44#Mat 4.23; Mk 1.39; Mat 9.35. Chieina ana Judeali khalei Synagoguebinglila pao hāshoka.

Currently Selected:

LUKE 4: TANGBSI

Highlight

Copy