MARK 14

Jishuli Tukkhui khavai Khangarān

(Mat 26.1-5; Lk 22.1-2; Joh 11.45-53)

1 # Mat 26.1-5; Lk 22.1-2; Joh 11.47-53. Atam chi Khawok-makazanga Khamui eina Makānkhami Phanit sākida zimiksho khanithang vatsai. Pāngmon akhokabing eina ain kathemabingna Jishuli ngathum sāda tukkhui khavai kala shaothat khavai khangarān sāda leisai; 2kaja athumna hānga, “Phanitlungli masāpaimara, mibing ngama̱-ngashaopaishina.”

Jishuli Bethanyli Thao Neokhami

(Mat 26.6-13; Joh 12.1-8)

3 # Mat 26.6-13; Lk 7.36-38; Joh 12.1-8. Jishuna Bethanyli phārrei kakazā Simonwui shimli phazāda leilakha, sha̱nao akhana aman kasaka nard thao kachara ngalunghamnao akhali sangda khuirai kala hamnao chi ana sākhailaga thao chi Jishuwui akuili heirorra. 4Kha chili leikasā athum kaikhana malungvātlak eina hānga, “Khisāda aremali thao hi shimān khangasakkhala? 5Kaja hi lupā shākathum lang eina yorkhuilaga kachamabingli mihaipai.” Chieina athumna ali khararra. 6Kha Jishuna hānga, “Ali aningkhānranu. Khisāda ali sheikhautkhala? Ana ili khamathā ot sāmihaira. 7#Khal 15.11. Kaja kachāmbingva nathumli ngasopamchingra kala nathumna samikhangai tharan athumli kaphā samipai; kha iva nathumli mangasopamluimara. 8#Joh 19.40. Ana samikashap chi sāhaira; chifa khavai ana sānngarānda iwui phasā thao neomi kahaina. 9Kachangkhat eina ina nathumli kahāngna, ali phaningkhaung sāda ana sāmi kahai chi paokaphā hākashokpam kachida hāngmira.”

Jishuli Yansai khavai Judasna Khamayā

(Mat 26.14-16; Lk 22.3-6)

10 # Mat 26.14-16; Lk 22.3-6. Chiwui thili tharāda khaniwui ngachaili Judas Iscariotna Jishuli yansai khavai pāngmon akhokabingli vai. 11Athumna chi kashā eina ringphālakhaowa kala lupā mira da khangashit sai. Chieina Judasna Jishuli yansai khavai atam kachā yangphokuwa.

Sākhangatha̱bingli ngasoda Makānkhami Phanit Kazā

(Mat 26.17-25; Lk 22.7-14; Joh 13.21-30)

12 # Mat 26.17-19; Lk 22.7-13. Khawok-makazang khamui Phanitwui kharethang, makānkhamiwui yaonao taikathat tharan awui sākhangatha̱bingna ali ngahāna, “Makānkhamiwui phāzat zakhavai ithumli kali khangarān sālu jikhala?” 13Chieina Jishuna awui sākhangatha̱ khanili chihoda hānga, “Keinungli vālu, mi akha tara̱ham phunglaga nanili ngarokra; ali shurvālu, 14kala ana akakā shimva̱ chili, ‘Ojāna kahāng awui sākhangatha̱bingli ngasoda makānkhami phazat zārumki kaji kā kali leikhala’ da angahānlu. 15Chieina ana mathāng atoli kā kahaka ngarankhariklaga haikasā chitheira. Chili nanina angarānlu.” 16Chieina sākhangatha̱ khani china zatphokta keinung chili vai kala anili hāngmi kahai tākam eina samphanga; kala anina makānkhamiwui phazat chi angarāna.

17 # Mat 26.20-25; Lk 22.14,21-23; Joh 13.21-30; Laa 41.9. Kala kazing khaying eina Jishuna awui sākhangatha̱ tharāda khani chili ngasoda rai. 18Athumna tableli phazāmahunglakha Jishuna hānga, “Kachangkhat eina ina nathumli kahāngna, phazārumda khalei nathumwui ngachaili mi akhana ili yansaira.” 19Sakhangatha̱bing chi wukhananghaoda athum kachiva̱na “Chi ila” da ngahāna.

20Ana athumli hānga, “Tharāda khaniwui ngachaili khongphei akhali ili khamui rurshairumda khalei mipa china. 21Kaja kathara lairikli kapi kahai thada miwui Naomayara chi thira; kha miwui Naomayarali yankasaia a chiwui kalāshāt! Awui vanga marāpharākasāna phāmei.”

Prohowui Phākachizat

(Mat 26.26-30; Lk 22.14-20; 1 Cor 11.23-25)

22 # Mat 26.26-29; Lk 22.17-19; 1 Cor 11.23-26. #Mk 6.41; 8.6; Lk 24.30. Athum phazāmahungda leilakha Jishuna khamui khuisingda ningkashiwui seihā sakuphailaga khamui serkhaida athumli mida hānga, “Shailu, hi iwui asāna.” 23#1 Cor 10.16. Kala ana tengkot khuida Vareli ningkashi mihailaga athumli mi, kala athum saikorana chiwui eina manga. 24#Sho 24.8; Heb 9.20. Kala ana athumli hānga, “Hi kachungkhawui vang heishokmi kahai iwui tuingashitwui asheena. 25Kachangkhat ina nathumli kahāngna, Vare wungramli kadhara drakhāra̱ mangki kaji zimiksho chi marāranglakha eina tangda ina drakhāra̱ hi mamangluimara.”

26 # Mat 26.30-35; Lk 22.33-34,39. Athumna laa akha sāchang kahaiwui thili Olive phungreishong vāhaowa.

Peterna Hatki kaji Hāngkhamarān

(Mat 26.31-35; Lk 22.31-34; Joh 13.36-38)

27 # Zec 13.7; Joh 16.32. Kala Jishuna athumli hānga, “Nathum yāmserhaora; kaja hithada kapihaida lei: ‘Varena yaokahomali sāthathaora kala yaobing chaiyānghaora.’ 28#Mk 16.7. Kha I ringshok kahaiwui thili nathumli ina Galileeli rida vāra.”

29Peterna ngahānkai, “Athum yāmserhailala I mayāmmara!” 30#Mk 14.66-72; Joh 13.36-38; 18.17-18,25-27. Chieina Jishuna Peterli hānga, “Kachangkhat eina ina kahāngna, arui ngayā harvāna khanishida makhongranglakha nana ili matheimana da kathumshida hatra.” 31Kha Peterna pinglak eina, “Nali ngasoda shaothatrumra jilala ina nali mahatlakmara” da ngahānkai. Khangatei sākhangatha̱bing saikoranala chithada hāngsera.

Jishuna Gethsemaneli Seihā Kasā

(Mat 26.36-46; Lk 22.39-46)

32 # Mat 26.36-46; Lk 22.40-46; Heb 5.7-8. Chiwui thili Gethsemane kaho apam akhali athumna vai kala Jishuna, “Ina seihā salakha nathum hili pamsālu” da hānga. 33Ana Peter, James, John athumli thankhui, kala kakhanang sikafana pemtinghaowa. 34#Joh 12.27. Chieina ana athumli hānga, “I wukkakhanangna thiki jiura, hili nathum ningkharikta yangpamsalu.” 35Ana khavāmeilaga ngaleili ngakhumshamzangda sapaisi kaja atam chi awui eina kānthuimihaoranu da seihā sai. 36#Rom 8.15; Gal 4.6; Mk 10.38; Joh 18.11. Kala ana hānga, “Abba, Avā, nawui vanga saikora sāpaisera, tengkot hi iwui eina kakhuithuimihaolu, thālala iwui kaphaning maningmana kha nawui kaphaningna.” 37Ana hankhaung tharan athum pida leisāda ana Peterli hānga, “Simon, na pihaola? Pung akhamāngla mapamrarthulā?” 38#Mat 6.13; Lk 11.4. Kasuili mazang khavai nathum ningngasharda seihā sālu; manglava sāngaikachangkhata kha asāna ngazanhaowa.” 39Chiwui thili valuishitlaga kharewui tākam eina seihā vāsālui. 40Ana hankhaung tharan athum piphup eina ungtheilui; kaja athum pingaishun haowa; kala khi ngahānkāsikhala da matheithuwa. 41Ana hanung kakathumali hithada unghānga, “Aruila pichingda ngasāmda leifala? Shaphaira; morei kaphungbingwui pāngli miwui Naomayarali yorkasang atam chi rāshungura. 42Ngakarthuilu, zatusa, yanglu, ili yorzaki kaje hili rāhaira.”

Jishuli Tukkakhui

(Mat 26.47-56; Lk 22.47-53; Joh 18.3-12)

43 # Mat 26.47-56; Lk 22.47-53; Joh 18.2-11. Ana matui mahungda leilakha hengsāda tharāda khaniwuili zangkasa Judas kaho china pāngmon akhokabing, ain kathemabing kala ararbingna kachiho mi kachungkhali ngasoda raighai, thinghun singlaga rai. 44Yorkazapa china ingkit akha athumli milaga hānga, “Ina amaya̱ki kaje chi a kho; ali tukkhuilu kala shantri sakazazakta thanthulu.” 45Judasna rākhaleoda Jishuwuili vai kala “Ojā!” da hānglaga amaya̱ya. 46Chieina athumna ali yonsa̱khuida tukkhuihaowa. 47Kha chiwui ngalemli nganingkasā mi akhana awui raighai sutkhuilaga pāngmon kharei rao akhawui khanā yortāmihaowa. 48Kala Jishuna athumli hānga, “Ili nathumna khaleli tukkhuiki kaji thada raighai kala thinghun singda kharāla? 49#Lk 19.47; Joh 18.19-21. Thangkachida khorumshimli tamchitheida nathumli ngasopama, kha nathumna ili matukkhuimana. Kha kathara lairikli kapi kahai chi ungshungranu.” 50Kala athum katongana ali horhailaga yāmserhaowa.

51Yaronnao akhana khamenga kachon kateonao akhamāng ngavailaga Jishuli shurvai; kala athumna ali tukkhui; 52Kha ana kachon chila raitāhailaga asāmsai eina yongthuihaowa.

Jishuna Hanga̱pamli Kākhanganing

(Mat 26.57-68; Lk 22.54-55,63-67; Joh 18.13-14,19-24)

53 # Mat 26.57-68; Lk 22.54-55,63-71; Joh 18.12-24. Athumna Jishuli pāngmon khareiwuili khuivai, kala pāngmon akhokabing ararbing kala ain kathemabing saikora rākazipa. 54Peterna athi shurvāda pāngmon khareiwui kayāngli lachāham eina shantribingli ngasoda meili tikpama. 55Pāngmon akhokabing eina hangva̱nao katongana Jishuli shaothat khavai shākhi phai, kha akhala masamphangmana. 56Mi kachungkhana kakapik shākhi awuitungli rāmi, kha athumwui shākhi khami akhala mangarummana. 57Kaikhana nganingkada awuitungli kakapik shākhi mida hānga, 58#Mk 13.2; 15.29; Ots 6.14; Joh 2.19. “‘Miwui pāng eina sākakhui khorumshim hi sakhaihailaga ina kathumthangwui thili miwui pangna masākakhui khangatei akha sakhuira’ da ana kahāng ithumna shai.” 59Chithālala athumwui shākhi khami akhala mangarummana. 60Chieina pāngmon kharei china alungthungli nganingkāda Jishuli ngahāna, “Nali athumna kaphen hili khikha ngahānkā khavai maleithula?” 61Kha Jishuna khikha mangahānkāla kasainakha pamhaowa. Chieina pāngmon kharei china ali ngahānlui, “Sokhame Varewui Naomayara Khrista chi nala?” 62#Dan 7.13; Mk 9.1; 13.26. Kala Jishuna hānga, “Ilaka, kala miwui Naomayarana Pangshapwui yāshong kapam kala muiyā tongda kharā nathum saikorana theira.” 63#Ots 14.14; Mis 14.6. Kala pāngmon kharei china awui kachon serkhaida, “Hili lāngkhamei shākhi khangatei khi darkar sākhala? 64#Pāng 24.16. Nathumna awui kachipat tui shāhaira, nathumwui tuikup khikhala?” Athum saikorana ali shaothatngayiphalunga da khayon misera. 65Kaikhana Jishuli machora̱ mashorrorphoka, amaila rommi, kashaola shaoda, “Marānlu!” da hānga. Kala shantribingna ali kapheya.

Peterna Jishuli Kahat

(Mat 26.69-75; Lk 22.56-62; Joh 18.15—18.25-27)

66 # Mat 26.69-75; Lk 22.56-62; Joh 18.16-18,25-27; Mk 14.30. Kala Peterna kayāng tākhamazeshong pamda leilakha pāngmon khareiwui raosha̱nao akha rai; 67Peter mei tikkapam theilaga ali yangkāda “Nala Nazarethpa Jishuli ngasosai” da hānga. 68Kha chi ana mamayāmada hānga, “I katheila matheimana, nana kahāng chila bhap matāmana.” Kala khanukvāk shokhaowa. (Chichangli harvā khonghaowa). 69Rao sha̱nao china ali theiluishitta chiwui ngalemli khanganingbing chili, “Mipa hi athumwui mina” da hānglui. 70Kha Peterna chi mamayaluimana.

Khaleilaga chili khanganingbing china Peterli phenda hānga, “Mashoila na athumwui ngachaili akhana, kaja na Galileenaona.” 71Chieina Peterna khonshāt tui eina shākhi sāda hānga, “Nathumna hāngda khalei mipa hi I matheimana.” 72Chichang chili harvā khongkakhane khonguwa. Jishuna ali hānghaikasa, “Harvāna khanishida makhongranglakha nana ili kathumshida hatra” kaji chi phaningunga. A wukhanangnāhaida chapa.

Currently Selected:

MARK 14: TANGBSI

Highlight

Copy