MARK 13
13
Khorumshim Kashimān Hāngkhamarān
(Mat 24.1-2; Lk 21.5-6)
1 #
Mat 24; Lk 21.5-36. Jishuna khorumshimwui eina kashok tharan sākhangatha̱ akhana ali, “Yanglu, Ojā, kayākha matakhak kahai ngalung kala khorumshimkhala!” da hānga.
2 #
Lk 19.43-44; Mk 14.58; 15.29; Joh 2.19; Ots 6.14. Kala Jishuna ali hānga, “Shim kahahakbing chi na theida leila? Maja̱tāla ngalung akhawuitungli ngalung akha ngarorda maleisaluimara.”
Rekkakharek kala Kakhanang Kachot
(Mat 24.3-14; Lk 21.7-19)
3 #
Mk 5.37; 9.2. Khorumshimli kāroda khalei Olive kaphungli Jishuna pamda leilakha Peter, James, John kala Andrew athumna ngathumsāda ngahānna, 4#Lk 17.20. “Hi katharan shokra kala ot saikora hi ungshungura kajiwui khudam chi kathara, ithumli kahāngmilu.” 5Chieina Jishuna athumli hānga, “Ngasharlu, kala nathumli mi khipānakha mathanngui ngasakhaialu. 6#Joh 8.24; 1 Joh 2.18. Mi kachungkhana iwui ming singda rālaga ‘I ana’ da hāngra, kala athumna mi kachungkhali thannguira. 7Kala nathumna katā khanaiwui raipao kashā tharan, malung matātunghaialu; hi shokphalungra, kha china khangachanga atam maningmana. 8Kaja yur akhana yur akhawuitungli, wungram akhana wungram akhawuitungli rai sāra; apam kachungkhali neina̱ khanukra, chāmrei rāra, kha hi nao ra̱kaphokna.
9 #
Mat 10.17-22. “Kha nathum khalatta ning ngasharlu, kaja nathumli athumna kārotli khuikara; nathumli synagogueli kashaola shaora; kala iwui vang nathum khamungbing eina awungabingwui mangāli shākhi mikhavai kānganingra. 10Yur saikorali paokaphā hi rida hāshokphalungra. 11#Joh 14.26; 16.7-11; Lk 12.11-12. Nathumli bichar sākhavai athumna khuikhavā kala mikasang tharan nathumna khi hāngra da rida makhanangalu; kha atam chichangli khami chi hānglu, kaja nana khamatui maningmana kha Manglā Katharana khamatuina. 12Achinā ngarāna achināngarāli, avāva̱ ngarana naongarāli, naongarāna ava̱ avāli thikhavai sāra; 13#Joh 15.21. iwui mingwui vang mi saikorana nathumli yangkharingra. Kha khanao eina tangda kakhānga chili huimira.
Khangachee-khangachā Otshot
(Mat 24.15-28; Lk 21.20-24)
14 #
Dan 9.27; 11.31; 12.11. “Kha masaimi kahai ningkakachai ot china maleikharān apamli khalei nathumna kathei tharan(pākakhuibingna bhap tākhuiranu) Judeali khaleibingna phungreili yāmkāranu; 15Shimtungli leikasāpana mataluiaranu, kala awui shimlungli zangda thongthāng mazangkhuiluiaranu; 16Luili leikasapa china kachon maungkhuiluiaranu. 17#Lk 23.29. Iyavo, atam chili nao vaikasābing kala na̱ shimanda leikasābingwui ka̱lāshāt! 18Sikachāng atamli mashok khavai seihā sālu. 19Kaja chitharan atamli Varena okathui kasāwui eina thuilaga aja rāshungda mashoklakrang kaji kala mashokluilaki kaji kakhanang kachot shokra. 20Kala zimiksho chi Prohona masha̱sang ngasakakha mi khipālikha mahuikhuimara; kha kapangkhui kahai athumwui vang eina ana atam chi sha̱sang ngasakhaira. 21Chiwui thili kachikathāna nali, ‘Yanglu, Khrista hili lei,’ lah ‘Yanglu, a chili lei!’ — da hānglala mashitsangalu. 22#Mat 7.15; Joh 4.48. Minama Khrista kala minama marānbing shokra kala shapakha Varena kapangkhui kahaibingli thanngui khavai khudamla kala matakhak kahai kachungkhala athumna chitheira. 23Kha ngasharlu; ina nathumli sānngarānda ot saikora hāngchitheihaira.
Miwui Naomayara Kharā
(Mat 24.29-31; Lk 21.25-28)
24“Kha chitharan, kachotkachāng chiwui thili zimikla tangmanghaora, kachāngla mahorluimara, 25sirābingla kazingramwui eina tātungra kala atungshongwui pangshapbingla nganukhaora. 26#Mk 8.38; Mat 10.23; Dan 7.13. Chiwui thili miwui Naomayarana hakkhamahā pangshap kala tekhamatei eina ngasoda muiyālungli kharā nathumna theira. 27Ana kazingraobingli achikun matili chihovāda awui kapangkhui kahaibingli okathuiwui akatang eina thuilaga kazingram akatang eina tangda kazipkhui ngasakra.
Khaorārongwui eina Theikakhui
(Mat 24.32-35; Lk 21.29-33)
28“Khaorarongwui eina tamkhuilu; aphāngli shondhar shokta thingnah matekchim kahai eina yāngyir kachāng raura da nathumna thei. 29Chi tākam eina nathumna hi shokura da kathei tharan a kharā nganaihaira, khamongpheili rāshunghaira da theira. 30#Mk 9.1. Kachangkhat eina ina nathumli kahāngna, ot saikora hi mashokranglakha thot hi makānthuimara. 31#Mat 5.18; Lk 16.17. Kazingram kala okathuila shimānhaora, kha iwui tui mashimānlakmara.
Khipānakha Zimiksho eina Pung chi Matheimana
(Mat 24.36-44)
32 #
Ots 1.7. “Kha zimiksho eina pung chi khipānakha matheimana, kazingramli khalei kazingraobing eina tangdala, Naomayarala matheimana. Kha Avāva̱māngna thei. 33#Eph 6.18; Col 4.2. Ningngasharda rimpamlu; kaja otshot chi katharan rānikhala da nathumna matheimana. 34#Mat 25.14. Hiya mi akhana shimwui eina zatkaphok tharan awui raobingli shim chi mayon khavai horsangmihailaga kala mi ava̱va̱li kachichāwui otphun mihailaga kala khamong khamayonali mayonkazakzaklu da kasohailaga kharam vākahai kathāna. 35#Lk 12.35-40. Chiwui vang eina mayonkhariklu, kala shimva̱ china ngazinnika, ngayasailunglinikā, harvā kakhonglinika, ngathorshongnika, katharan ungnikhala kaji nathumna matheimana. 36Ana kashuirak hankhaung tharan nathum pisāpaishina. 37Ina nathumli kahāng hi mi kachiva̱li kahāngna: Rimpamlu!”
Currently Selected:
MARK 13: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
