MARK 1

Ra̱hikme Johnna Pao Hākashok

(Mk 3.12; Lk 3.1-18; Joh 1.19-28)

1Varewui Naomayara Jishu Khristawui paokaphā haokaphok. 2#Mat 3.1-12; Lk 3.2-16; Joh 1.6,15,19-28. #Mal 3.1; Mat 11.10; Lk 7.27. Marān Isaiahwui lairikli hithada kapihai:

“Yanglu, nawui shongfa sākhavai,

nali rida iwui paophungme chihora.

3 # Isa 40.3. Kachikathāna lamhāngli vaozatta lei:

Prohowui shongfa ngarānlu;

awui apong ngatar ngasaklu.”

4 # Ots 13.24. Chieina Ra̱hikme Johnna lamhāngli vai kala ningngateida morei pheomi khavaiwui pao hāshokta ra̱hikmi. 5Judea ngaleili kala Jerusalem keinungli khalei mi kachungkha rāda athumwui morei hangphata. Chieina athumli Jordan kongli ra̱hikmi.

6Johnna ut-hah eina kasā kachon ngavai, sāhui eina shanneira̱ sai kala khaoh eina khuira̱ awui kashakazāna. 7Ana hithada hashoka, “Ili hakkhameiya mi akha iwui thili rāra, ina hamzangda awui pheihop khara̱ khalāmi khavai I matik machāmana. 8Ina nathumli tara̱ eina ra̱hikmi, ana nathumli Manglā Kathara eina ra̱hikmira.”

Jishuli Ra̱hikkhami

(Mat 3.13—4.11; Lk 3.21-22; 4.1-13)

9 # Mat 3.13-17; Lk 3.21-22; Joh 1.29-34. Atam masāngleila Jishuna Galileeli khalei Nazarethwui eina rai kala Johnna ali Jordan kongli ra̱hikmi. 10Ana tara̱wui eina kashok tharan hengsāda kazingram shokahai kala Manglāna nāsha̱ thada awuitungli tākapa̱ thei, 11#Laa 2.7; Isa 42.1. kala kazingramwui eina akhon akha vaorai, “Na iwui khaluma Naomayarana, Ina nali ningyāng unglaka.”

12 # Mat 4.1-11; Lk 4.1-13. Hengsāda Manglāna ali lamhāngli vāngasakhaowa. 13Ana chili zimiksho hangmatithang pamda Satanna ali sui. Ana ramsāli ngasopama kala kazingraobingna ali otram ngatha̱mi.

Khaih Kaphā Mi Matili Kaho

(Mat 4.12-22; Lk 4.14-15; 5.1-11)

14 # Mat 4.12-17; Lk 4.14-15. Johnli tukthui kahaiwui thili Jishuna Galileeli vāda Varewui Paokaphā hashokta hānga, 15“Retkahai atam chi rāhaira, kala Varewui wungram nganaishunhaira. Ningngateilu kala paokaphā chili shitsanglu.”

16 # Mat 4.18-22; Lk 5.1-11; Joh 1.40-42. Galilee ngayipheili Jishuna zatlakha Simon eina agato Andrew ngayilungli khaihlan horkazat thei, kaja ani khaih kaphā mina. 17Jishuna anili, “Ithi shurlu, nanili ina mi kaphā sāngasakra” da hānga. 18Chieina anina ngalāngda khaihlan hortahaiphungda athi shurthuwa.

19Khavāmeinakta Zabedeewui naomayara James eina John marikhong lungli khaihlan khopkasā thei. 20Chieina ana hengsāda anili kaho eina avāva̱ Zebedee eina langphatbingli marikhongli nothāhailaga awui thi shurthuwa.

Raih Kazang Mi Akha

(Lk 4.31-37)

21 # Mat 7.28-29; Lk 4.31-32. Athumna Capernaumli vai kala Sabbaththang Jishuna synagogueli vāda tamchithei. 22Awui tamkachithei shālaga athum matakhakhai, kaja ain kathembing thada matamchitheila, sāshap pangshap akhavā akha thada tamchithei.

23 # Lk 4.33-37. Atam chichangli makathar manglā kazanga mi akha synagogueli leisai. 24#Joh 6.69. Ana “Nazarethwui Jishu, nana ithumli khi sāki kajikhala? Ithumli shimān ngasak khavai kharāla? Na khipākhala da ina thei, na Varewui tharkhamathengana” da vaowa.

25Jishuna ali khararda hānga, “Kasainakha pamlu, kala awui eina shokhaolu.”

26Chieina raih china mipā chili nganurkazamlaga panglāk eina vaoda yāmshokhaowa. 27Mibing chi matakhakhaida akha eina akha ngazek ngaroka. “Hi khikhala? Kadhara tamkachithei tuila? Sashap pangshap eina ngasoda makathar manglālila kasoli kala athumnala awui kahāng nganāli!”

28Chieina awui sākashap chānpao chi Galileeli khalei apam kachiva̱li ngalāngda ngayaohaowa.

Peterwui Aniva̱li Raikhami

(Mat 8.14-17; Lk 4.38-41)

29 # Mat 8.14-15; Lk 4.38-39. Chiwui thili ana James eina Johnli ngasoda Synagoguewui eina shoklaga Simon eina Andrewwui shimli vai. 30Chitharan Simonwui aniva̱ kharurda pisai kala hengsāda athumna awui pongli Jishuli hānga. 31Chieina ana apāng rāsingkhuida akhāngmathota; chieina awui kakharur phāhaoda athumli ana otram ngatha̱mi.

32 # Mat 8.16-17; Lk 4.40-41. Chithang ngazin zingtunlam mibingna kakazānaobing eina kameo kazangbing Jishuwuili khuirai. 33Kala keinung chiwui mi kachungkha kayāngli rākazipa. 34Kazātyur khangatatei kakazā mi kachungkhali raimi, kala raih kachungkha kashamshokmi; kala ana raihbingli mamatui ngasakmana, kachiwui vangkhala kaja athumna a khipākhala da thei.

Jishuna Pao Hākashok

(Lk 4.42-44)

35 # Lk 4.42-43. Akhama kathā ngathorthakva̱, kazing mahorranglakha ana ngakarthuida ngachakyāng kahai apam akhali seihā asāpama. 36Simon eina awui ngasotnaobingna ali shurvai, 37kala aphākhuida hānga, “Mi saikorana nali phāda lei.” 38Kha Jishuna athumli ngahānkai, “Ithum ruinganai keinungbingli vāusa, chili paokaphā hāshok khavai lei, khikhalajila I chiwui vang kharāna.”

39 # Mat 4.23-25; Lk 4.44. Ana Galileewui apam saikorali yaovai kala synagogueli pao hāshokta raihla kashamshokmi.

Phārrei Kakazā Akhali Raikhami

(Mat 8.1-4; Lk 5.12-16)

40 # Mat 8.2-4; Lk 5.12-16. Phārrei kakazā akha Jishuwuili rai kala khuktizanglaga, “Nana phaningmiakha ili tharngasakshapra” da ngachonmi khavai poi.

41Jishuna lumashanhaida apāng katingvai kala saza̱da, “Ina phaningmilakra, tharchaohaolu.” da hānga. 42Chi kahāng eina khangaphār chi phāhaowa kala tharchaohaowa. 43-44#Pāng 13.49; 14.2-32. Jishuna ali, “Hi khipālikha mahāngalu, kha pāngmonli vāda chitheilu kala Mosesna kaso kahai thada nali tharmihaira kaji mibingna machutkhui khavai achigatlu” da saklak eina ningmi kala heng sāda shiunhaowa.

45Kha mipā hina a kazazatli phongshar eina hāngkazatwui vang pao chi ngayaovāserhaowa. Chiwui vang Jishuna keinungli phongshar eina mazangpaithuda mi makapāna apamli apamhaowa. Chithālala apam kachiva̱wui eina ali phārai.

Currently Selected:

MARK 1: TANGBSI

Highlight

Copy