MATTHEW 28

Ringkhalui

(Mk 16.1-10; Lk 24.1-12; Joh 20.1-10)

1 # Mk 16.1-8; Lk 24.1-9; Joh 20.1-2. #Lk 8.2; Mat 27.56. Ara sabbath zimikshowui thili, haptawui kharethang zingthanlam Magdalawui Mary eina Mary akhapāva̱ china chikhur chi yangkida vai. 2#Mat 27.51,60. Kala yanglu, kashuirak eina neina̱ panglāk eina khanukuwa; kala Prohowui kazingrao akhana kazingramwui eina tālaga lungsham chi khalanghailaga chiwui atungli pama. 3Awui zakmai chi rikhān khangashei thai kala awui kashankachon chi horām kachar thai. 4#Mat 27.62-66. Chieina khamayonbing chi ngacheenāhaida kathiririhaowa kala kathi thāhaowa. 5Kha kazingrao china sha̱nao khani chili hānga. “Mangacheealu, khikhalajila nathumna krushtungli shaothat kahaiya Jishuli kaphāna kaji ina thei. 6A hili maleimana, khikhalajila ana hāngkahai athishurda ava ringshokhaira. Ali chipet kahai pam hi rāyanglu. 7#Mat 26.32; 28.16; Joh 21.1-23. Chieina thaklāk eina vāda awui sākhangathabingli ahānglu, ‘A kathiwui eina ringshokhaira, kala ana nathumli rida Galileeli vāura, nathumna ali chili theira!’ Ina nathumli hāngkahai chi phaningunglu.” 8Chieina anina khangcheela thā, khamathānla thā da chikhurpamwui eina katotsisi thuihaowa kala sākhangatha̱bingli ngasamvāhaowa. 9#Joh 20.14-18. Kashuirak eina Jishuna anili samngarokta, “Nanili chingrihairanu” da hānga. Anina vālaga awui pheili singda ali khoruma. 10Jishuna anili hānga, “Mangacheealu, vālaga ichināngarāli Galileeli tākhavai hānglu kala apam chili athumna ili theira.”

11 # Mat 27.62-66. Sha̱nao khani china shongfali zatlakha chikhur khamayona shipai kaikhana keinungli vālaga pāngmon akhokabingli shokkahai saikora chi hāngchithei. 12Pāngmon akhokabingna ararnaobingli ngasoda kaziplaga ngasanrum kahaiwui thili, athumna shipaibingli lupā tarākha mida 13hānga, “Hithada hānglu, ‘Ithum piphup eina leilakha awui sākhangatha̱bingna rālaga awui angun rālithuihaowa,’ 14kala Governorna shaakha, nathum mayonmana da ithumna nathumwui vang phayetmihaora kala chiwui vang nathumna malung ringkhavai khikha maleimana.” 15Chieina athumna lupā chi khuilaga athumli hāngchithei kahai chithada sai. Chiwui vang eina aja rāshungda Jihudibingwui ngachaili khararchān hi ngachānda lei.

Jishuna Sākhangatha̱bingli Rākachithei

(Mk 16.14-18; Lk 24.36-49; Joh 20.19-23; Ots 1.6-8)

16 # 1 Cor 15.5; Joh 21.1-23. Sākhangatha̱ tharāda akha china Jishuna vālu da hāngkahai Galileewui phungrei chili vai. 17Athumna ali kathei tharan athumna ali khoruma; kha kaikhana ningmaonga. 18#Mat 11.27; Lk 10.22; Phil 2.9; Eph 1.20-22. Kala Jishuna athumli vānganaimeida hānga, “Kazingram eina okathuili khalei pangshap saikora ili mihaira. 19#Lk 24.47; Ots 1.8. Chiwui vang eina nathumna vāda miyur saikorali iwui sākhangatha̱ sāngasaklu; athumli Avā kala Anaomayara kala Manglā Katharawui ming singda ra̱hikmilu, 20#Mat 13.39,49; 24.3; 18.20; Ots 18.10. kala ina nathumli kaso kahai saikora chi mayon khavai athumli tamchitheilu, kala mithot khangachang eina tangda ina nathumli ngasomichingra.”

Currently Selected:

MATTHEW 28: TANGBSI

Highlight

Copy